Пандемијата целосно го смени начинот на кој живееме, а особено се одрази на социјалниот живот на луѓето кои се сингл.
Шефот на Tinder вели дека коронавирусот имал „драматичен“ ефект на начинот на кој луѓето ја користат дигиталната апликација за запознавање партнер, макар што промените може позитивно да се одразат на плановите кои тој ги имал за популарната платформа.
Пандемијата и карантинските услови што произлегоа од неа различно се одразија на онлајн платформите за запознавање и забавување, како Tinder, вели извршниот директор Ели Сајдман. Од една страна, има поголема активност на корисниците, тренд што го потврдија и други слични апликации.
Сајдман вели дека има драматична промена во метричките податоци за активноста кои во нормални услови се стабилни. Сепак, економските последици од пандемијата се одразија во помала потрошувачка. Тоа не е добра вест за Tinder, апликација што е бесплатна, но профитот ѝ зависи од премиум претплатите.
Од лансирањето во 2012 година, Tinder била симната над 340 милиони пати. Најголемиот дел од приходите доаѓа од само 6 милиони корисници кои плаќаат премиум услуга од апликацијата. Како што се влошуваше пандемијата, бројот на овие претплати опаѓаше поради намалената платежна моќ на корисниците.
Сепак, Tinder и апликациите слични на неа се користат за да се запознае потенцијален партнер со кој потоа би се сретнале во живо, за да видите дали има вистинска хемија меѓу вас, без разлика дали станува збор за краток флерт, секс за една вечер или сериозна врска.
Тука веќе сериозно се чувствуваат предизвиците со кои се соочуваат сингл луѓето. Кафулињата, рестораните, диско клубовите, кината и театрите не работат, па каде воопшто ќе одите на дејт?
Дури и да се отворат, следува уште поголемото прашање: Дали би се осмелиле да излезете на прв состанок среде пандемија, кога императив на социјалниот живот е физичката дистанца дури и со најблиските, па не со странец?
Предноста на луѓето е тоа што како вид сме прилагодливи на промените и токму затоа ќе најдеме начин на кој ќе го одржиме социјалниот живот без да го жртвуваме ни во најмал дел психичкото здравје и мир.
Експертите имаат интересни видувања. Од една страна, сметаат дека оваа досега невидена ситуација ќе даде уникатна можност да се формираат и изградат врски без големо влијание од околината. Од друга страна, одржувањето на врската онлајн и со малку физички контакт може да се покаже како голем предизвик, особено бидејќи не знаеме колку долго ќе важат мерките за заштита и како ќе функционираме воопшто.
Некои експерти очекуваат дека во светот по пандемијата ќе има помалку кратки врски и необврзни секс авантури, а повеќе сериозни и долгорочни врски.
извор: kajгана
