Брачното или партнерското советување за некои двојки се покажало како многу успешен метод за надминување на проблемите и кризите во врската. Терапевтите ги споделуваат најчестите извори на фрустрација кои луѓето ги пријавиле додека посетувале терапија за парови.
Пријатели
Кога сте во сериозна врска со некого, нивните пријатели најчесто стануваат ваши, што може да донесе дополнителна радост во животот, но и стрес и фрустрација, вели психотерапевтката Џорџина Штурмер.
„Можеби навистина не ви се допаѓаат луѓето со кои вашиот партнер се дружи или можеби не ви се допаѓа начинот на кој тој/таа се однесува кога се со своите пријатели“, истакнува таа.
Терапевтката советува и во двата случаи да му ги признаете чувствата на партнерот и внимателно да се обидете да најдете решение.
„Можеби сте лути или фрустрирани поради она што неговите или нејзините пријатели го зборуваат или начинот на кој се однесуваат. Можеби сте љубоморни на врската што ја имаат со вашиот партнер или можеби се чувствувате несигурно или загрижени дека нема да им се допаднете. Во секој случај, бидете искрени за тоа како се чувствувате, но погрижете се вашиот партнер да знае дека не ги обвинувате пријателите или го критикувате нивниот избор. Можеби треба да поминувате повеќе време со пријателите на партнерот, за навистина да ги запознаете. Или можеби и двајцата треба да прифатите дека кога не сте заедно, секој ќе поминува време со своите пријатели“, изјави таа за Metro.
„Често слушам од клиентите дека нивните партнери не се заинтересирани за нив или нивните чувства. Тоа може да доведе до чувство на осаменост, исклучување и намалено чувство на лична вредност и затоа е клучно во љубовната врска нашите партнери да покажат интерес за нас и да нè слушаат. Секако дека немате контрола врз партнерот и неговите ставови кон вашите чувства“, вели брачната терапевтка Шарлот Витли.
Сепак, додава таа, најдете време еднаш неделно да седнете заедно и да разговарате за работите што добро одат во вашата врска и за работите што би сакале да ги подобрите.
„Погрижете се да разговарате и слушате наизменично, за да не ве прекинуваат кога ги изразувате вашите чувства на осаменост и исклучување“, истакна таа.
„Гневот е исконска и примарна емоција и кога ќе се соочиме со налутен партнер, може да се чувствуваме исплашени или да реагираме со тоа што самите ќе се налутиме, што и двете се нормален одговор и начин на преживување. Кога лутината се појавува во врските, важно е да се направи простор за неа и да ја сослушате. Можеби кога ќе се смират страстите, можете да зборувате зошто вие или вашиот партнер сте лути, што води до тоа и како гневот влијае на двајцата“, вели д-р Витли.
Таа додава дека можеби ќе можете да смислите некои стратегии за најлошиот момент на лутина, како на пример да направите десетминутна пауза или да одите на прошетка, да слушате музика и да танцувате или нешто друго што е посебно за вас.
Можеби не звучи многу привлечно, но добрата финансиска компатибилност е една од работите на кои се градат добри и долгорочни односи.
„Што ви паѓа на ум кога размислувате за компатибилноста? Можеби тоа е смисла за хумор, заеднички интереси, физичка привлечност, но не размислуваме често за финансиска компатибилност. Меѓутоа, темата пари и трошење често се појавува во врската“, вели терапевтот.
За да избегнете финансиска некомпатибилност, таа препорачува редовно да зборувате за парите и да се трудите подобро да го разберете вашиот личен однос кон нив.
„Сите имаме мислење за заработката, потрошувачката и буџетот, но имаме и емотивен однос со парите. Можеби трошењето ви дава задоволство или ве прави да се чувствувате успешни или ви предизвикува страв и вознемиреност. Бидете отворени за вашите финансии и за тоа како размислувате за трошењето и најдете начин да управувате со вашите финансии заедно“, објаснува таа.
Извор: Кајгана.мк
