Пејачката и професорка по музика, Андријана Јаневска преку својот статус на Фејсбук ги натера своите пријатели и следбеници да размислат за суштината на животот и нештата за кои во време на брз начин на живот се помалку размислуваме.
Имено, таа на некој начин напиша дефиниција за нештта во секојдневието кои ја тераат да размислува позитивно и кога тоа можеби навидум не изгледа така.
Нејзиниот статус гласи вака:
Да повториме, како себеси се терам да размислувам позитивно:
Кога Димитар ќе расфрла во истата минута кога сум исчистила, помислувам како некои жени се’ би дале само за да почувствуваат како е да се биде мајка.
Кога долго чекам на семафор во кола, помислувам како некој воопшто нема кола.
Кога некој студент нема да најави отсуство, наместо да чекам до другиот час, излегувам на прошетка без никаква цел (која, кога би дошол студентот не би си ја дозволила). Тогаш сфаќам дека и услуга ми направил.
Кога ќе се разболи некој од синовите, помислувам дека тие болести се минливи, дека има лек и дека ќе оздрават.
Кога имам многу обврски, помислувам како ќе можам да си дозволам да му ја купам на Димитар колата што ми ја збори со месеци.
Кога нема да имам обврски, помислувам колку е убаво што сум постојано со децата.
Поентата е никогаш да не се споредуваме со оние кои имаат повеќе од нас, зашто веројатно секогаш ќе имаат повеќе и секогаш ќе бидеме фрустрирани и несреќни, а почесто да ни текнува дека има многу луѓе кои имаат помалку. Да бидеме среќни со она што го имаме, оти на крај, само тоа е и поентата: да живееме среќно.
Многу често забораваме колку сме среќни и дека секој ден е дар и поубав од претходниот, а веруваме дека оваа позитивна мисла на Андријана ќе ве тера да размислите поубаво за малите ама големи нешта во животот.
