30 септември полека се ближи. Доаѓа денот „Д“ , судниот ден за Македонија, денот на одлука за македонскиот народ, за хамлетовската разрешница: „Да се биде или не“?
СДС наголемо тера кампања – „ЗА“ референдум! Од неубедливи говори, до ступидни билборди, секојдневно фрчат пароли и повици да се излезе и гласа – за! Како оној последниот, дека по успешен Референдум низ цела Европа ќе сме се лечеле гратис!? Тој што го смислил гарантирано не бил ни до Халкидики на одмор, а камо ли подалеку? Во Европа и да кивнеш на улица ќе ти наплатат под изговор дека ја загадуваш околината, шириш бацили и си потенцијален извор на зараза, а не да ти дозволат бесплатно лечење! Дефинитивно, оној што го смислил ова е ЗА… И „ЗА“ референдум и ЗА… „лечење“!
![](https://arhiva.vistina.com.mk/wp-content/uploads/2018/09/Screenshot_5-7.jpg)
Агитаторите на владината референдумска кампања почнаа и по куќи и станови да одат, од врата на врата… Таканаречените „невладини“ со кесенца в рака, а во нив памфлет, пенкалце и запакла со парола и повик – гласај ЗА! Бетер од изборна кампања! Таму барем знаеш чии ти тропнале на порта! Овие „се фолираат“ дека се самосвесни, самоорганизирани, со самоиницијатива за пропагирање… „невладини“?! И мислат дека некој уште им верува во она, за што се претставуваат?
![](https://arhiva.vistina.com.mk/wp-content/uploads/2018/09/41420226_476076102891386_2095613418160521216_n.jpg)
Премиерот пак, сакајќи да поентира, „да даде гол“, секој ден си дава по некој „автогол“! При еден од последните говори „големиот оратор“ признава дека е неспособен и нема работни манири, па му треба некој со камшик да виси над него и да му кажува што треба, а што не треба да прави? Тоа ли е капацитет самостојно да се управува и води суверена држава?
И опозицијата конечно го објави својот став. Секој граѓанин на 30 септември да си одлучи самиот како ќе се однесува. Ќе излезе или не, и ако излезе, како ќе гласа! Избор по сопствено убедување. Секој паметен ќе сфати што сакале да кажат. Пораката е испратена… меѓу редови!
![](https://arhiva.vistina.com.mk/wp-content/uploads/2018/09/41412362_10155969542978315_3549065393765089280_n.jpg)
Јасно е дека притисокот е голем, пресијата неподнослива, а подготвени се и алтернативните методи власта да си го протурка она што го наумила со сесрдна поддршка на оние од ЕУ и НАТО, ако не преку референдум, тогаш инстутиционално. На власта нема да и биде сеедно ако референдумот пропадне, ама со тоа не планираат да им пропадне и договорот со Грција. Ќе си го протуркаат на „мала врата“, како што го протуркаа парламентот, спикерот… И во собраниското бифе ако треба, ќе го ратификуваат!
А на македонскиот народ со сменето име и корени што одат во пакет со „пактот со ѓаволот“, токму „адвокатите на ѓаволот“ ќе го лажат и ќе му ветуваат дека е на чекор пред влезот на „рајските порти“ на НАТО и ЕУ. Па дури и да има трошка вистина во нивните „евтини приказни“, повеќе од јасно е дека Македонецот и овој пат, на ова најново историско распетие ќе остане „со прстот в уста“. Ем излажан, ем за*бан!
![](https://arhiva.vistina.com.mk/wp-content/uploads/2018/09/41502744_2098301613536624_8416037855880544256_n.jpg)
Можеби на тоа најдобро асоцира една мисла на познатиот српски актер и режисер Драган Бјелогрлиќ („Сенки над Балканот“), која важи колку за северниот сосед, исто толку и за нас, како земји кои ги третираат како слепо црево на Западен Балкан:
„Нашиот влез во ЕУ сега е како кога ќе дојдеш на журка во 5 часот наутро. Сите најдобри ‘риби’ веќе си заминале и нема ни пијалок. Ние сме, за жал, тие кои доаѓаат на журката во 5 наутро. Журката наголемо замира, а ние влегуваме полни со ентузијазам“!
Само што додека дојде време нас Македонците не поканат на „журка“, ќе го снема и „станот“, во кој журката некогаш се правела!
![](https://arhiva.vistina.com.mk/wp-content/uploads/2018/09/Screenshot_4-8.jpg)