Скопскиот бенд „Фанк Шуи“ ја заокружи годинава со нов сингл. Имено, новите ексклузивци на Авалон продукција деновиве го претставија своето најново музичко парче насловено „Стаклени нозе“, како втор сингл од новиот албум што ќе излезе следната година.
Инаку, во прашање е третиот студиски албум на „Фанк шуи“ кој ќе го носи насловот „Импулс“, а ќе ги наследи „Етер“ од 2012 и „R.E.M.“ од 2015 година. Изданието ќе излезе за „Авалон“, а за насловната фотографија се погрижи Лилика Стрезоска.
Песната „Стаклени нозе“ е комплетно авторско дело на триото, а снимањето, миксањето и мастерингот ги направи Ангел Ќосев во студиото „Подрумот“. Придружните вокали ги отпеаја Елени Мицковска и Магдалена Трповска, а на виолончело гостува Ирис Стефановска Арсовска. „Стаклените нозе“ стигнаа со текстуално видео во изработка на Михаил Намичев, а како звучи сето тоа можете да слушнете во продолжение.
