Балкански ѕвезди ќе настапат на годинашниот „Фестивал на музика од светот“ во Битола, кој ќе се одржи следниот викенд, на 10 и на 11 ноември во големата сала на Центарот за култура – Битола. Првиот ден е резервиран за домашните имиња „Љубојна“ и специјалниот гостин Џамбо Агушев, а следниот ден ќе настапат босанскиот лирски тенор Божо Вречо и составот „Џипси грув“, кој изведува автентична балканска ромска музика.
Од Центарот за култура најавија дека се подготвени за ова деветто издание на фестивалот, кој е еден од најпосакуваните и најпосетувани музички манифестации во градот во текот на годината. Селекторот на фестивалот, Оливер Јосифовски рече дека годинава фестивалот е насочен на музика од Балканот.
„Таканаречната ’балканската музичка струја’ е така густа и содржајна и на сите светски фестивали ги очекуваат сите тие имиња со големо нетрпение и внимание. Во Битола ќе настапат бравурозни имиња, како Божо Вречо, нов изведувач на севда-музиката, со неверојатна експресија, и составот ’Џипси грув’, момци кои сакаат да докажат дека Балканот е простор полн со крвоток и дека во политички контекст треба слободно да се испочитуваат сите стилови на овој простор“, рече Јосифовски.
Фестивалот е поддржан од Министерството за култура и Општина Битола.
