Посебно се апелира до младата и малолетна популација да не користи алкохолни пијалоци заради нискиот праг на толеранција кон алкохолот, како и да се воздржат од користење разни пиротехнички средства и огнострелно оружје со што ќе се избегнат несакани повреди, изгореници и други потешки последици.

Службата за Итна медицинска помош со домашно лекување во состав на ЈЗУ „Здравствен дом на Скопје” – Скопје најави дека за новогодишните празници ќе се грижи за здравствената состојба на граѓаните во текот на 24 часа.

На новогодишната ноќ Итната медицинска помош ќе  располага со 10 медицински тима и осум дежурни ординации  за здравствена заштита во трета смена, недела и празници во поликлиниките  „Јане Сандански“, „Чаир“, „Ченто“, „Шуто Оризари“, „Ѓорче Петров“, „Драчево“, „Идадија“ и „Бит Пазар“. Истовремено со секојдневното работно време ќе функционира и единицата за домашна посета.

И МВР и Републичкиот совет за безбедност на сообраќајот на патиштата (РСБСП) имаат препораки за претстојните празници. Апелираат граѓаните да не употребуваат пиротехнички средства и да не возат под дејство на алкохол. Да бидат внимателни, да ги почитуваат правилата за ограничување на брзината и сообраќајната сигнализација, апелираат институциите.

Министерството за внатрешни работи е дециндо: нема да се толерира и најстрого ќе се казнува препродавањето и употребата на петарди и други пиротехничките средства.

Согласно Законот за прекршоци, 200 до 500 евра е глобата за неовластено пукање од огнено оружје, употребување пиротехнички средства или сличен експлозивен или лесно запалив материјал, додека согласно Кривичниот законик, оној што неовластено изработува, држи, продава, набавува или врши размена на огнено оружје, муниција или експлозивни материи, се казнува со затвор од три до десет години.

– Ако предмет на делото е поголемо количество огнено оружје, муниција или експлозивни материи, или огнено оружје, муниција или експлозивни материи кои на граѓаните им се забранети, сторителот ќе се казни со затвор од најмалку пет години. Ако делото е сторено во група, банда или друго злосторничко здружение, сторителот ќе се казни со затвор од најмалку осум години, информира МВР. (МИА)