Македонскиот рок-музичар, гитарист, поет и сликар Симеон Иванов – Канго денеска почина на свои 67 години, по долго боледување.
На денешен ден, 26-ти март 2018 година почина нашиот сакан и почитуван творец, патриот и уметник Симеон Иванов Канго! Нашиот сопруг, татко и дедо. Бог да го прости, со сочувство од фамилијата”, е напишано на неговиот Фејсбук профил.
Симеон Иванов е роден во Кочани на 2 Ноември 1951 година, каде што го завршил основното и средното образование и каде живееше до последно. Дипломирал на правниот факултет во Скопје. Со рокенрол музиката се занимава од раната младост, а во 2005 година го прослави 40-годишниот јублиеј од својата музичка кариера со концерт во Домот на АРМ во Скопје. Во неговата долга музичка кариера, свирел заедно со скоро сите музичари од неговиот град и пошироката околина. Канго беше и гитарист, текстописец, аранжер, композитор и продуцент на неговиот истоимен бенд, кој опфаќа гитара/вокал, бас гитара и тапани.
Над 20 години, Канго е и сопственик на училиште за рокенрол музика каде го предава своето искуство на помладите генерации. Автор е на 4 збирки поезија: „Воскреснување“ (1988), „Вознесување“ (1989), „Вдахновение“ (1990) и поемата „Распетие“ (1997). Има издадено 6 музички албуми: „Воскреснување“ (1991), „Вознесување“ (1994), „Реинкарнација“ (1995) албум со преработки на песни на легендарниот гитарист Џими Хендрикс во изведба на Канго, „Вдахновение“ (1996), „Проповеди“ (1997), „Проповеди“ (1998) кој е компилација од најдобрите песни на Канго по повод 35-годишнината од неговата кариера. Кон крајот на 2007 година излезе седмиот албум наречен „Откровение“.
Покрај многуте свирки и концерти во Македонија, Канго има настапувано и во странство на Заечарската гитаријада во 1994 и 2001 година, има одржано концерти во Нови Сад и Белград 2004 и концерт во Виена во 2004 година.
Со своето движење „Мактеон“ има организирано повеќе македонски космополитски средби како и чествувања по повод раѓањето на цар Александар Македонски на локалитетот Горно Гратче, на планината Осогово, во близината на Кочани. Симеон Иванов – Канго беше женет и татко на 3 деца.
Почина по тешко боледување од канцер на 26 март 2018 година.
