По една клоца и по некоја „заушка“… за среќно и со Норвешка! (ФОТО)

Македонската репрезентација вчера попладне ги почна подготовките за пријателскиот натпревар со Норвешка кој не очекува в сабота (11. ноември) на националната арена „Филип Втори“ во Скопје.

Па, како по обичај, и првиот тренинг во новиот собир мина со вообичаените „среќни честитки“ за успесите или новините кај дел од репрезентативците… По една клоца и по некоја „заушка“ денеска добија дел од репрезентативците за среќно и со Норвешка! Најмногу го „крка“ оној што бил најдобар во својот тим во изминаттото коло викендов! Таков е редот во непишаното правило! Го нема Илија Несторовски кој остана во Палермо, па најмногу го „окрка“ Езџијан Алиоски!

Во секој случај, во крајно ведра атмосфера одработен тренингот и покрај неколкуте откажувања поради повреди. Како што е познато, од првичниот објавениот список, селекторот Игор Ангеловски нема да може да смета на Илија Несторовски, Висар Муслиу, Љупчо Дориев, Никола Ѓоргев…, и најверојатно и на Кире Ристевски и Аријан Адеми… Но, и сето тоа не значи, дека се намалени амбициите со триумф против Норвежаните да се заврши годината!