Овој викенд Скопје ќе биде најатрактивното место за незаборавен помин, ќе ечи убава квалитетна музика и ќе се пие најубавото пиво. Така барем најавуваат организаторите, во својата покана.
„Со задоволство ви го најавуваме првото издание на “Skopje Beer Weekend”, четири денови резервирани за одлична забава, ладно пиво, вкусна храна и богата музичка програма“! Фестивалот започнува во четврток 14 септември и ќе трае до недела 17 септември, секоја од вечерите стартот на музичката програма е од 18 часот и ќе трае до 01 часот по полноќ.
Локацијата е во најголемата скопска општина Аеродром, на паркингот од спортскиот центар Јане Сандански веднаш до паркот на езерцата!
Списокот на изведувачи е навистина импресивен, а настапуваат: Амадеус бенд, Ален Исламовиќ со својот бенд, ДНК, Бени Нон-Стоп, Дац и Александар, Бојана Скендеровска, Ламбе Алабаковски, Миле Кузмановски, Наум Петрески, Џони Лајв, Џек Даниел…
Отворањето на фестивалот ќе биде посебно и неповторливо, ве очекува специјално кабаре шоу на EAT THE BEAT кое не смеете да го пропуштите. Влезот ќе биде бесплатен и организаторите Ве канат заедно да ја започнеме традицијата!
