Македонија и нашата метропола Скопје овој последен викенд во август, на 26-ти и 27-ми, ќе бидат горди домаќини на првиот „Светски Тату-фестивал“. Се вика Светски, бидејќи на фестивалот ќе настапат многу познати имиња од тату-уметноста од целата планета.
Скопскиот хотел „Парк“ ќе биде ексклузивно место на кое ќе се одвива настанот „Skopje Tattoo show 2023”.
Во пресрет на настанот, организаторот и еден од нашите најуспешни (и светски) тату-артисти Горан Миќиќ, вели дека смислата и целта на одржувањето на ова светско tattoo show е подигање на тату-културата на едно високо заслужено уметничко ниво.
По завршувањето на официјалниот дел на „Skopje Tattoo show 2023”, ќе се доделат и награди за најдобрите тетоважи во повеќе различни категории. Покрај се ова за што кажав на конвенцијата ќе настапат и бендот Shugarfree, DJ Goce и DJ Strajk, а за љубителите на танцот, ќе има и перформанс.
„Исклучително пријатно изненадување ќе биде и изложбата на уметничките дела на почитуваниот македонски уметник Михаил Корубин. Во склопот на настанот, м-р Ивана Хаџиванова ќе има свое значајно стручно предавање на темата: „Под површината – Психологијата и подлабокото значење на телесната уметност”, како и многу други придружни настани и работилници. Ве чекаме, без разлика на пол, со голема почит и внимание викендов во хотелот „Парк“. Причини има за тоа, а меѓу нив и за да ја одберете вашата најомилена тетоважа”, гордо порачува тату-артистот Горан Миќиќ.
