Вечерва, петок, 01.10.2021 год. со почеток од 18 часот во МКЦ ќе се одржи промоција на „Момент-документ“ – книга на фотографии од Зденко Петровски во издание на МКЦ. Промоцијата, проследенa со придружна изложба на фотографии од Зденко е во склоп на настанот „30 години Канал 103“.
МКЦ е издавач на „Момент документ“ – импресивна книга со фотографии која ги документира музичките настани одржани во Скопје изминативе 15-тина години. Авторот – Зденко Петровски страсно и посветено ја живее фотографијата и музиката.
Книгата е доказ дека кога се прави она што навистина искрено се сака, успехот е неминовен. Таа е извонреден приказ за живата музичка сцена во Скопје во период од 2007 до 2020 година. „Момент-документ“ ќе остане како документ за едно време, луѓе и настани што Скопје и неговите граѓани заслужуваат да го имаат и за идните генерации, вели Дејан Колевски, КМФ при Фото Сојуз на Македонија.
