Јелена Розга мета на манијак: Пејачката ја прогонува опседнат обожавател

Јелена Розга живееше во страв неколку месеци, бидејќи, додека беше во родниот Сплит за време на својата корона изолација, таа била прогонувана од еден опседнат обожавател.
Ова не е прв пат Розга да има проблеми со своите обожаватели, но сега, како што вели, таа е навистина исплашена.

„Се исплашив дури и во тек на денот. Морав да излезам да го прошетам кучето, и одеднаш сфатив дека не сум сама. Само што се свртев – тој. Воопшто не ми беше сеедно. Па, кој сака да живее во страв, трчајќи да бара спас кон лифтот и слично? Ужасно чувство… Ми се чини како да сум магнет за нив, дека едноставно привлекувам такви луѓе!? Но, се надевам дека ова беше последен пат“ – рече Јелена во интервјуто за „РТЛ Ексклузив“, без да наведе дали се работи за истата личност која веќе со години ја прогонува. Се работи за извесен Синиша, кој живее и работи на релација Хрватска-земјите од Западна Европа, но ја следи во чекор, доаѓајќи буквално на секој нејзин настап, каде таа и да пее.

Опседнат со Розга, тој и праќал букети цвеќиња, скапи подароци, се обидел дури и да ја побара за жена… Сведок на еден таков негов „излет“ при настапот на пејачката во Македонија, поточно во еден познат ноќен клуб во Струмица пред неколку години беа и новинарите на нашиот портал.

Тогаш дотичната личност отседнал во истиот хотел каде што беше сместена пејачката и земал соба до собата на Розга, која потоа го смени престојот на друг кат во хотелот, а цела ноќ мораше да ја чува приватно обезбедување, но за среќа се’ мина мирно и без никакви инциденти.

Инаку Розга откри и дека во моментов единствен маж во нејзиниот живот е осумгодишното куче Ринго.

„Тој е многу љубоморен на моите фанови. Ги сака жените, но не и мажите“ – се пошегува таа.