Десетина дена по Греми наградите, во лондонската О2 Арена вчеравечер се одржа доделувањето на БРИТ наградите, а најзначајните музички признанија – пејачка и пејач на годината ги освоија Џорџа Смит и Џорџ Езра.
Наградите за интернационални соло-пејачка и пејач ги добија Аријана Гранде и Дрејк, а пак Том Вокер е прогласен за најдобар дебитант.
Титулата најдобар британски бенд, како и онаа за албум на годината, им припаднаа на рокерите од групата „1975″.
Најдобар странски бенд се дуетот „Картерс“ составен од Бијонсе и Џеј Зи, кои на церемонијата наместо во живо, беа присутни со интересно видеообраќање.
Наградата за британска песна на годината ја освоија Калвин Харис и Дуа Липа за „Оnе Кiss”, а на шкотскиот музичар му е доделена и наградата за најдобар продуцент.
Ед Ширан ја доби наградата за специјални достигнувања, а вечерта ја затвори годинашната добитничка на наградата за исклучителен придонес во музиката – американската ѕвезда Пинк.
За најдобар видеоспот е прогласен oнoj за песната „Wоmаn Likе Ме” на групата „Литл Микс“ изведена во соработка со Ники Минаж. Нивниот настап на свеченоста привлече можеби најмногу внимание и реакции кај гледачите.
Водители на вечерта беа комичарот Џек Вајтхол и радио-водителката Клара Амфо.
БРИТ наградите се доделуваат од 1977 година како британски пандан на американските Греми награди, а организатор е Британската фонографска асоцијација.
