Фолк-фестивалот „Роса“ годинава ќе се одржи по 19 пат на 26 октомври во МОБ. По повод 25-годишнината од постоењето на Радио „Роса“ кое е организатор, изведувачите ќе пеат во живо, во придружба на фестивалски оркестар.
„Решивме фестивалот да го поместиме за крајот на октомври. На сцената ќе се појави фолк-елитата и затоа фестивалот годинава ќе биде во живо. Ќе има и фестивалски оркестар, ’Браќа Нуне’, кои ќе ги следат пејачите на сцена. Фестивалот ќе се одржи во МОБ со почеток во 20.00 часот.
Македонската телевизија ќе го снима и одложено ќе го емитува“, вели Александар Димитров, директор на радио „Роса“.
Годинава на фестивалската сцена ќе се појават најдобрите имиња од македонскиот фолк, меѓу кои и: Миле Кузмановски, Јордан Митев, Горан Кукиќ, Марјан Коцев, Душко Ѓеоргиевски, Наум Петрески, Благоја Грујовски, Ленче Кукиќ, Сузана Гавазова, Анета Мицевска, Благица Павловска… кои на големо се подготвуваат и со песните и со имиџот, за сè да биде на високо ниво.
Како и секогаш, фестивалот е од ревијален карактер, а единствените награди што ќе се доделат се традиционалните награди за животно дело. Годинава добитници се Наум Бурназ, Нино Величковски и Ферус Мустафов. Водителка ќе биде атрактивната Ирена Спировска.
