Како и вчеравечер и вечерва и утре во 19.00 часот, во двата последни денови во Офицерски дом во Битола ќе може да се проследи мултимедијалниот спектакл „ЗИМСКА ПРИКАЗНА“ кој се подготвуваше подолг период, како изненадување на сите кои сакаат да ја почувствуваат и доживеат магијата на празниците.
Инспирирани од “Снежната кралица” на големиот Ханс Христијан Андерсен еден врвен креативен тим воден од сценографот Валентин Светозарев, подготви неверојатно визуелно уживање за кое долго ќе се зборува и ќе биде круна на 8-те денови ЗИМСКА ПРИКАЗНА.
И вечерва ќе доживеете театар надвор од “црната театарска кутија”. Филмски амбиент на една од фасадите на офицерскиот дом, 3D мапинг по пример на светските метрополи за вакви празници, музика компонирана специјално за овој проект, професионални актери, аматери актери, танчари и статисти, измешани со празничните мириси на цимет од новогодишните куќарки поставени околу сцената се само некои од посебностите на овој проект.
Мултимедијален спектакл за деца и возрасни ,, ЗИМСКА ПРИКАЗНА“ адаптација на приказната „Снежната кралица„ на Ханс Кристијан Андерсен 29, 30, 31 декември Офицерски дом – Битола, со почеток 19.00 часот.
