тринити стрингс – Вистина.мк

Женското гудачко-вокално трио со нова поп-класика: „Trinity Strings“ ќе ви ја отсвират и испејат – „Кон тебе полетав“ (ВИДЕО)

Антонио Димитриевски — Thu, 02 Jun 2022 12:21:10 +0000

Александра Мирсинова - виолина, Ирена Стојановска - виолина и Марта Куч - волончело, познати како женското трио „Trinity Strings“ имаат нова песна и спот. Станува збор за авторска песна на Николче Мицевски кој ги направи музиката и аранжманот, а снимена е во студиото ХXL на Дејан Момироски. Текстот е дело на Ирена Стојановска, а носи наслов „Кон тебе полетав“. За разлика од нивната последна тема „Да или не“? во која девојките го синтетизираа модерниот звук со класичните инструменти, создавајќи своевиден микс на етно, техно поп и класика, овој пат покрај доминацијата на класичните инструменти се работи за стандардна поп - денс тема, збогатена со звуците на гудачкото трио и нивната свиречка умешност. Инаку ова е нивна четврта песна која е визуелизирана и со видеозапис кој е снимен на две атрактивни локации, под режисерската палка на Крсте Шупев. Во продолжение проследете како звучи и изгледа кога девојките од „Trinity Strings“ ќе ви отсвират и испејат - „Кон тебе полетав“:

Трите македонски симфо-грации од „Тринити стрингс“ прашуваат – „Да или не?“ (ВИДЕО)

Антонио Димитриевски — Wed, 07 Jul 2021 12:47:17 +0000

Македонското гудачко трио „Тринити стрингс“ деновиве ја објави својата нова, трета по ред песна со наслов: „Да или не“? Црни свечени тоалети во амбент како да се антички божици, Ирена Стојановска и Александра Мирсинова (виолина) и Марта Куч (виолончело и вокал) темата ја визуелизирале на една од најубавите локации во Македонија, античкиот локалитет „Хераклеа“ кај Битола. Автори на музиката и стиховите се Марта Куч и Ирена Стојановска, додека аранжманот се погрижил да го направи Иван Јованов - Ивајо. Налик на она што го свират девојките од „Бонд“ или Ванеса Меј, трите македонски убавици во нивната нова тема го синтетизирале модерниот звук со класичните инструменти, создавајќи своевиден микс на етно, техно поп и класика, но на специфичен начин, во амбиентален стил кој им дава сопствен печат, препознатливост и уникатна оригиналност. Кога на сето тоа ќе му се придодаде еротскиот набој кој го создава нивната сексапилна појава, сликата за творештвото на трите македонски симфо грации аудио-визуелно го комплетира впечатокот, кој е доволно импресивен. Како видео продуцент и режисер на видеото кое одлично соодвествува со амбиентот на музиката сипреплетувајќи го аудиото и визуелното во една компактна целина, се јавува Горан Симјановски. Проследете во продолжение како звучи и изгледа кога „Тринити стрингс“ прашуваат: „Да или не“?

„Trinity Strings“ освежуваат со „Summer breeze“ (видео)

Слободанка Илиева — Wed, 26 Aug 2020 11:48:10 +0000

„Trinity Strings“, македонското женско трио има нова песна и спот. Станува збор за авторска песна на Марта Куч, Александра и Ирена-Ина. насловена „Summer breeze“ , а е комбинација на жичани инструменти, диско-фанк бас и ритам секција. „Summer breeze“ како што гласи и насловот, има летна тематика и се тоа спакувано во видео-приказна која ја режираше Ина Виолина која се потпишува и на текстот, аранжманот и музиката на песната и Силвија Кировска, додека продукцијата е na Trinity strings production.