синтезис – Вистина.мк

Концерт на „Синтезис“ во чест на 61. „Охридско лето“

Христина Ѓоргиевска — Wed, 04 Aug 2021 12:20:32 +0000

рупата „Синтезис“ ќе одржи концерт вечерва (04.08.2021) во 21 часот во Античкиот театар во чест на 61. роденден на фестивалот „Охридско лето“. „Синтезис“ ги комбинира корените на македонското народно музичко наследство со современи аранжмани, користејќи оригинални македонски инструменти: кавал, гajда, тапан, тарабука и тамбура. Бендот е основан во 1995 година со цел да спроведе длабоко истражување во непроценливото богатства на изворната музика во земјава. Името „Синтезис“ го изразува концептот на групата-музичка синтеза добиена со комбинација на традиционалните звуци со современи аранжмани. Копајќи во длабочините на македонското народно наследство, со сериозна грижа за основите на традиционалните композиции, групата добива големи пофалби за давањето нов живот на музичкото поле. Со текот на годините, тие соработуваа со врвни музичари и бендови (Билја Крстиќ и Бистрик Оркестар – Србија, Хусну Сенлендиричи – Турција, Мауро Пагани – Италија, Тоше Проески, Влатко Стефановски, Наум Петрески, Хроматик Поинт, како и соработка со филхармониски и симфониски оркестри (Македонска филхармонија, Бургос – Филхармонија на Саламанка, Национална опера на Виетнам, Националниот филхармониски оркестар од Алмати и Астана – Казахстан,Нишки филхармониски оркестар). Како признание за големиот придонес што Синтезис го дава за афирмација на македонската музика и култура преку бројните концерти низ целиот свет (Јапонија, Израел, САД, Италија, Франција и многу други), во 2006 година, Стопанска комора на Македонија бендот го прогласи за почесен амбасадор на македонската култура. Во 2008 г. во Сплит ја добиваат наградата за Придонес во развојот на културниот туризам, а истата година од страна на Toronto Exclusive Magazine добиваат награда за најдобра инструменталнa група, и уште многу други награди кои говорат за нивната специфичност и музички квалитет. Синтезис продолжува со третманот на стари, заборавени, а понекогаш и скоро никогаш не чуени песни, кои се дел од богатото македонско музичко наследство, на тој начин зачувувајќи ги и провмовирајќи ги трајните вредности на македонската култура и традиција.

Синтезис со концерт ќе прослави 25 години артистичка кариера

Христина Ѓоргиевска — Wed, 23 Sep 2020 10:58:22 +0000

Групата Синтезис вечер со славенички концерт на плоштадот Мајка Тереза (плато пред МОБ), ќе го одбележи 25 годишниот јубилеј од артистичката кариера. Концертот почнува во 20 часот, а специјални гости ќе бидат Влатко Стефановски и Наум Петрески. Етно групата Синтезис во изминативе 25 години има одржано повеќе од 500 концерти на сите континенти и настапи во некои од најпознатите светски сали и фестивали. Од своето основање во 1995 година, Синтезис се чувари на македонската традиционална музика, и нејзини оплеменувачи со нови музички форми и елементи. Групата има издадено осум албуми и има соработувано со најпознатите македонски музичари – Влатко Стефановски, Тоше Проевски, Наум Петрески и Борис Трајанов, како и со познати балкански имиња меѓу кои и Биља Крстиќ и Бистрик. Концертот ќе биде одржан со почитување на протоколите за организирање на настани во време на пандемија од Covid 19, а билетите во строго ограничен број по цена од 200 денари се пуштени онлајн и на сите продажни места на Купи Карти За Се. Концертот е поддржан од Министерството за култура, Град Скопје и Комерцијална Банка АД Скопје. Извор: Курир.мк

“Љубојна” и “Синтезис” на „Меѓународниот тамбурашки фестивал 2020“ во Куманово

Антонио Димитриевски — Sat, 15 Aug 2020 09:48:24 +0000

16-то издание меѓународниот тамбурашки фестивал – Куманово ќе се одржи од 28-ми до 29-ти август со почеток во 20 часот на Градскиот плоштад во Куманово. Фестивалот ќе се одржи по сите протоколи за превенција од Covid-19, со почитување на социјална дистанца и задолжително носење на заштитни маски. На првата фестивалска вечер (петок, 28.08.2020) ќе настапат: – Група “Боеми” од Битола; – “Синтезис” од Скопје. На втората фестивалска вечер (сабота, 29.08.2020) ќе настапат: – Група “На здравје” од Куманово; – “Љубојна” од Скопје. Фестивалот е во комплетна организација на Фондација за култура и спорт “Куманово” – Куманово, под покровителство на Градоначалникот и Советот на Општина Куманово и со поддршка од Министерството за култура на Република Македонија.

Сузана Јовчева со љубов кон татковината ја опеја својата – „Македонија“ (ВИДЕО)

Антонио Димитриевски — Thu, 19 Dec 2019 13:11:47 +0000

Љубовта кон татковината и кон Македонците што живеат насекаде низ светот претставувала инспирација за новата песна на Сузана Јовчева, насловена „Македонија“. Таа е автор на музиката и текстот, додека аранжманот е заеднички на сите изведувачи кои учествуваа во реализацијата на оваа нумера. За снимањето и продукцијата се погрижија самата Јовчева, Ангел Ќосев и Александар Стефановски, а песната е работена во две студија: „Подрумот“ и „Alex Home Studio“ во Скопје. Во изведбата на„Македонија“ учествуваат едни од нашите најдобри музички уметници како што се Гоце Димовски, Гоце Узунски, Марјан Јовановски, Горан Гешовски, Ангел Ќосев, Илија Филиповски, Александар Стефановски и Перо Стефановски. Дел од музичките уметници што учествуваа во снимањето се членови и соработници на култната музичка група „Синтезис“ со којашто Јовчева соработува долги години наназад, а неодамна беше со нив и на турнеја во Австралија, група во која членува и нејзиниот брат Ване Јовчев. Инаку Сузана Јовчева е професорка по музичка култура и има настапувано на речиси сите релевантни музички зафолк и забавни фестивали во Македонија како што се „Фолк фест Валандово“, „Цветници“, „Макфест“, македонскиот избор за „Песна на Евровија“ и други, а добитник е и на бројни музички признанија и награди. Погледнете го видеото и слушнете како Сузана Јовчева низ својата вокално-музичка експресија ја доживува „Македонија“:

„Јано, Јановице“ е новиот видеоспот на СИНТЕЗИС (ВИДЕО)

Антонио Димитриевски — Fri, 01 Dec 2017 09:25:48 +0000

Темата „Јано, Јановице“ се првиот пилот сингл и видео новиот албум „Остров“, кој е осми по ред на најдобрата и најпознатата македонска етно - група „Синтезис“! Тој како и претходните донесува епски композиции кои се натопени со македонска традиција и влијанија од тоа што се нарекува светска музика (world music).

Албумот содржи седум песни, меѓу кои насловната „Остров“, „Мома Катерина“, „Дима љубит самовила“, „Смиљана ми се армаса“, како и оваа - „Јано, Јановице“, за која е снимен видеоспотот. Материјалот за албумот е снимен во студиото „Подрумот“ на Анѓел Ќосев, а издавач е „СЈФ рекордс“. Како гостин на „Остров“ во две песни се појавува и легендарниот Влатко Стефановски.

Видеото е снимено на неколку локации во центарот на скопје, како и во еден познат скопски угостителски локал. https://www.youtube.com/watch?v=pmz_F_snfaE

Промовирани новиот албум „Остров“ и монографијата на „Синтезис“

Антонио Димитриевски — Fri, 01 Dec 2017 09:12:09 +0000

Македонскиот етно-состав „Синтезис“, завчеравечер, 29 ноември во клуб-ресторанот „МКЦ“, го промовираше своето ново албумско издание „Остров“, како и монографијата „Патување низ музичкото време“, во која хронолошки е претставена историјата и развојот на групата. Промоцијата помина во опушетна атмосфера, а на неаа присуствуваа голем број новинари, пријатели, колеги и почитувачи на групата и нивната музика.

„Остров“ е осми албум на групата кој како и претходните донесува епски композиции кои се натопени со македонска традиција и влијанија од тоа што се нарекува светска музика (world music). Албумот содржи седум песни, меѓу кои насловната „Остров“, „Мома Катерина“, „Дима љубит самовила“, „Смиљана ми се армаса“, како и „Јано, Јановице“, за која е снимен и видеоспот. Материјалот за албумот е снимен во студиото „Подрумот“ на Анѓел Ќосев, а издавач е „СЈФ рекордс“. Како гостин на „Остров“ во две песни се појавува Влатко Стефановски, чиј впечатлив и препознатлив звук на неговата гитара го бои ова музичко дело на „Синтезис“ во темите во кои тој гостува. https://www.youtube.com/watch?v=kmv0Ds5oG84 Монографијата „Синтезис – Патување низ музичкото време“ пак ја одбележува 20-годишнината од постоењето на групата. Нејзин автор е Милан Банов. Подготовката и дизајнот се на Горан Атанасовски, а издавач „Интермедија“. За групата „Синтезис“ во монографијата пишуваат и Оливер Белопета, Михаил Ренџов, Владимир Мандичевски, Бранка Костиќ-Марковиќ, Венко Андоновски и Елени Новаковска. Ова ексклузивно издание содржи текстови, податоци и голем број фотографии кои на оние што ќе го имаат в раце ќе им ја приближи интимната приказна и развојот на групата.

„Синтезис“ – промоција на новиот албум „Остров“ и нивната монографија

Антонио Димитриевски — Mon, 27 Nov 2017 10:19:14 +0000

Во среда, 29.11.2017, во МКЦ Клуб & Ресторан со почеток во 20 часот ќе се одржи промоцијата на новото ЦД на групата Синтезис, „Остров“, како и промоција на нивната монографија „Синтезис - Патување низ музичкото време“.

„Остров” е осми по ред албум на Синтезис. Снимен е во студиото „Подрумот“. Продуценти се Синтезис и Ангел Ќосев. Дизајнот е на Иван Дургутовски. Издавач SJF Records (Скопскиот џез фестивал). Специјален гостин на албумот е Влатко Стефановски.

Монографијата „Синтезис - Патување низ музичкото време” ја одбележува 20-годишнината од постоењето на групата. Нејзин автор е Милан Банов. Подготовката и дизајнот се на Горан Атанасовски. Издавач Интермедиа. За групата Синтезис во монографијата пишуваат и Оливер Белопета, Михаил Ренџов, Владимир Мандичевски, Бранка Костиќ-Марковиќ, Венко Андоновски и Елени Новаковска.