роман на годината – Вистина.мк

Свечено врачување на наградата „Роман на годината“

Антонио Димитриевски — Mon, 29 May 2023 12:25:59 +0000

Свеченото врачување на наградата „Роман на годината” за 2022 година ќе се одржи утре, вторник (30 мај) во Музејот на современата уметност во Скопје, со почеток во 20 часот. Лауреат на наградата е романот „Вистината но не многу веројатна историја за семејството Пустополски за куќата покрај Вардар и за четирите прстени” од Влада Урошевиќ, а во издание на „Арс Ламина”. Наградата „Роман на годината”, што ја доделува Фондацијата за унапредување и промоција на културните вредности „Славко Јаневски”, годинава ќе биде врачена по 24. пат. Наградата се состои од плакета, оригинална статуетка (авторство на скулпторот Сашо Саздовски) и паричен износ од 150.000 денари. На Свеченото врачување ќе настапи и џез бендот на Гоце Стефковски.

Доделување на наградата „Роман на годината“

Антонио Димитриевски — Mon, 17 Oct 2022 08:41:13 +0000

Фондацијата за унапредување и промоција на културните вредности „Славко Јаневски“, вечерва во 20 часот, во кафе-барот „Филхармонија“, ќе ја врачи наградата „Роман на годината“ за 2021 година. Годинашен лауреат на наградата е Симона Јованоска за романот „Денот на црвот“ („Или-или“, 2021). Генерален покровител на наградата е „Комерцијална банка“ АД Скопје, а наградата е поддржана од Министерството за култура на Република Македонија.

Свечено доделување на наградата „Роман на годината“ пред МКЦ

Антонио Димитриевски — Wed, 18 Aug 2021 12:59:45 +0000

Свеченото врачување на наградата „Роман на годината“, што ја доделува Фондацијата за унапредување и промоција на културните вредности „Славко Јаневски“, ќе се денес (среда, 18 август) на платото пред Младинскиот културен центар во Скопје, со почеток во 20.30 часот. Годинашен лауреат е романот „Скриени желби, немирни патувања“ на Владимир Јанковски („Антолог“, 2020). Годинашната петчлена жири-комисија, во состав Оливера Николова (претседател), Зоран Анчевски, Калина Малеска, Живко Грозданоски и Катерина Богоева, со мнозинство гласови го избра овој роман, во конкуренција на 40 пристигнати романи. Генерален покровител на наградата е „Комерцијална банка“ АД Скопје, а наградата е поддржана и од Министерството за култура на Република Македонија. Наградата се состои од оригинална статуетка, плакета и паричен износ од 150.000 денари.

Конкурсот за наградата „Роман на годината“ трае до 15 јануари

Антонио Димитриевски — Mon, 04 Jan 2021 12:38:19 +0000

Конкурсот за наградата „Роман на годината“, што го доделува Фондацијата за унапредување и промоција на културните вредности „Славко Јаневски“, трае до 15 јануари. Според конкурсот, право на учество имаат романите кои за првпат се објавени на македонски јазик во 2020 година. Кандидатите се обврзани да достават по пет примероци од романот, што не се враќаат, во читалницата „Славко Јаневски“ во Скопје (ул. „Димитрие Чуповски“ бр. 23/1-1) или по пошта, на адреса на Фондацијата, бул. „Кузман Јосифовски Питу“ 19/6-40, Скопје). Доколку бидат испратени по препорачана пошта, ќе бидат прифатени оние романи коишто благовремено ќе бидат доставени со дата на печатот заклучно со 15 јануари 2021 година. Пожелно е и доставување на романи во електронска верзија на адресата: [email protected] Наградата „Роман на годината“ се состои од паричен износ од 150.000 денари, статуетка и плакета. Одлуката за добитникот на наградата петчлената жири-комисија е обврзана да ја донесе најдоцна до 15 март 2021 година, а следниот работен ден да ја објави на прес-конференција. Наградата „Роман на годината“ која беше заштитен знак на згаснатиот „Утрински весник“, ќе биде доделена по 22 пат. „Песот со тажен поглед“ на писателката Оливера Николова е лауреатот на „Роман на годината“ за 2019 година, а Николова е и првата од досегашните добитници која оваа награда ја доби по вторпат, по наградата за романот „Куклите на Росица“ објавен во 2004 година.