референдум – Вистина.мк

Со прстот в уста!

Антонио Димитриевски — Wed, 12 Sep 2018 08:47:02 +0000

30 септември полека се ближи. Доаѓа денот „Д“ , судниот ден за Македонија, денот на одлука за македонскиот народ, за хамлетовската разрешница: „Да се биде или не“? СДС наголемо тера кампања - „ЗА“ референдум! Од неубедливи говори, до ступидни билборди, секојдневно фрчат пароли и повици да се излезе и гласа - за! Како оној последниот, дека по успешен Референдум низ цела Европа ќе сме се лечеле гратис!? Тој што го смислил гарантирано не бил ни до Халкидики на одмор, а камо ли подалеку? Во Европа и да кивнеш на улица ќе ти наплатат под изговор дека ја загадуваш околината, шириш бацили и си потенцијален извор на зараза, а не да ти дозволат бесплатно лечење! Дефинитивно, оној што го смислил ова е ЗА... И „ЗА“ референдум и ЗА... „лечење“!

Агитаторите на владината референдумска кампања почнаа и по куќи и станови да одат, од врата на врата... Таканаречените „невладини“ со кесенца в рака, а во нив памфлет, пенкалце и запакла со парола и повик - гласај ЗА! Бетер од изборна кампања! Таму барем знаеш чии ти тропнале на порта! Овие „се фолираат“ дека се самосвесни, самоорганизирани, со самоиницијатива за пропагирање... „невладини“?! И мислат дека некој уште им верува во она, за што се претставуваат?

Премиерот пак, сакајќи да поентира, „да даде гол“, секој ден си дава по некој „автогол“! При еден од последните говори „големиот оратор“ признава дека е неспособен и нема работни манири, па му треба некој со камшик да виси над него и да му кажува што треба, а што не треба да прави? Тоа ли е капацитет самостојно да се управува и води суверена држава? https://www.youtube.com/watch?time_continue=1&v=VXBsFcjkn1E И опозицијата конечно го објави својот став. Секој граѓанин на 30 септември да си одлучи самиот како ќе се однесува. Ќе излезе или не, и ако излезе, како ќе гласа! Избор по сопствено убедување. Секој паметен ќе сфати што сакале да кажат. Пораката е испратена... меѓу редови!

Јасно е дека притисокот е голем, пресијата неподнослива, а подготвени се и алтернативните методи власта да си го протурка она што го наумила со сесрдна поддршка на оние од ЕУ и НАТО, ако не преку референдум, тогаш инстутиционално. На власта нема да и биде сеедно ако референдумот пропадне, ама со тоа не планираат да им пропадне и договорот со Грција. Ќе си го протуркаат на „мала врата“, како што го протуркаа парламентот, спикерот... И во собраниското бифе ако треба, ќе го ратификуваат! А на македонскиот народ со сменето име и корени што одат во пакет со „пактот со ѓаволот“, токму „адвокатите на ѓаволот“ ќе го лажат и ќе му ветуваат дека е на чекор пред влезот на „рајските порти“ на НАТО и ЕУ. Па дури и да има трошка вистина во нивните „евтини приказни“, повеќе од јасно е дека Македонецот и овој пат, на ова најново историско распетие ќе остане „со прстот в уста“. Ем излажан, ем за*бан!

Можеби на тоа најдобро асоцира една мисла на познатиот српски актер и режисер Драган Бјелогрлиќ („Сенки над Балканот“), која важи колку за северниот сосед, исто толку и за нас, како земји кои ги третираат како слепо црево на Западен Балкан: „Нашиот влез во ЕУ сега е како кога ќе дојдеш на журка во 5 часот наутро. Сите најдобри 'риби' веќе си заминале и нема ни пијалок. Ние сме, за жал, тие кои доаѓаат на журката во 5 наутро. Журката наголемо замира, а ние влегуваме полни со ентузијазам“! Само што додека дојде време нас Македонците не поканат на „журка“, ќе го снема и „станот“, во кој журката некогаш се правела!

Кампања за „режирано самоубиство“

Антонио Димитриевски — Wed, 05 Sep 2018 12:56:32 +0000

СДС е во кампања. За, „ЗА“ за Референдумот! Заедно со се’ што е на располагање од меѓународната заедница. Не кампања, офанзива е тоа. Поголема отколку оние, изборните. Убедувања, ветувања, лажни аргументи, закани, плашења, апсења... Сите можни средства и оружја што им се на располагање се користат во име на „подобар живот и посветла иднина“ која треба божем да дојде од историскиот момент – натаму! Во меѓувреме, ги темпираат настаните, како да се на тајмер. Судски процеси, пресуди, одлуки... точно тогаш и токму такви, какви што ним им се од полза. За да го одвлечат вниманието на народот, да ја дефокусираат јавноста и уште повеќе да му ја заматат свеста за она што е реалност и вистина: дека на 30–септември на истиот тој народ му подготвуваат „режирано самоубиство“! Со виртуелен „хепи енд“! Министерката за одбрана го убедува народот со пропаднати примери од соседството од типот: откако влегоа во ЕУ и НАТО на Бугарите два пати им скокнаа платите, Хрватска процвета, Романците и Унгарците живеат во изобилство, Црна Гора после НАТО е Монако... Е моја Радо, радо би биле и тие тоа за што ги претставуваш, ама ниту оддалеку не е така. Зашто на сите им е јасно дека и покрај „влезот во европскиот рај“ и друштвото на „северноатланските набилдани браќа“, грото од граѓаните на споменатите „соседи за пример“, ја живеат својата „имитицаја на животот“ во однос на оние кои ги примија во нивно друштво! Конечно глобализацијата ја голта цивилизацијата, па поголемите риби ги јадат помалите, а оние најмалите како нас... го јадат стапот! Само што, ако веќе е дојдено „нож до коска“, можевме очигледно подобро да се испазариме. Премиерот, насмеан „од седмица до седмица“ мафта со Викиликс документи од 2008-ма, а не ни прочитал што точно пишува внатре. И да бил прифатлив сличен компромис, не би бил прифатен ваков, срамен, понижувачки, и предавнички договор со владата на земјата на која парчето од „Јужна Македонија“ и припаѓа. Тогаш немаше да прифатиме да си извршиме „харикири дома на сопствено задоволство“. Зашто барем дома ќе си бевме она што отсекогаш сме биле – свои! Ако веќе надвор мора да бидеме некои други, прекрстени, разнебитени и туѓи! Зашто таквиот договор немаше да биде капитулантски, а работите ќе беа многу поинакви, со поразличен развој на настаните и сосема поинаква разврска! Конечно и самиот Никола Груевски како што кажа на последниот прес: „ Ако се согласев на се’ што сакаа Грците, ќе се согласите дека друга песна ќе беше денес, но јас сум човек со принципи, пред се’ и со достоинство“ – мислејќи на ситуацијата во која сега се наоѓа. Затоа пак, принципите и достоинството не се баш одличје на оние што преговараа во наше име за нашето име и не само за него, па истите едно мислат, друго зборувааа, а трето прават! Како и да е, нивната кампања за успешен Референдум е во полн ек. Ја тераат и познато и непознато и нивните и странците... И тоа бетер од избори! Последниот претседателски кандидат на СДС дури и го прекори народот, велејќи дека би било крајно недолично и неодговорно на 30 септември да се седи дома?! Само што според истражувањата и анкетите, за поголемиот дел од народот очигледно успешен Референдум е доколку тој не успее. Затоа и нема да седат дома. За на 30 септември, ден недела, веќе има огромен број најави за патување и букинг аражмани. Па, кој на нива, кој на полјана, кој на излет, кој на шопинг во Солун, кој на викендичка, кој на викенд на Халкидики, кој каде... Како „патриотите“ за време на конфликтот 2001-ва! За луѓето да не бидат неодговорни и да седат дома!