Украина со рап и изворен фолклор победи на Евросонг: И ние гангста рап-оро имавме далеку пред Украинците, само… не го препознавме?! (ВИДЕО)

Антонио Димитриевски — Mon, 16 May 2022 10:19:54 +0000

Без оглед на сите воено - политички случувања во Украина и политики вткаени во годинешниов „Евросонг“, Украина победи со песна која е интересна музичка компилација на навидум две неспоиви нешта: изворниот фолклор и рап музиката. Иако на прва се чини дека ваквата комбинација е „невозможна“, ако ја погледнете генезата на двата музички правца ќе видите дека доаѓаат од исто место, имаат ист корен - народот! Само од „различни дрвја“, од различни средини, географски локации... Но, патината за која најчесто се пее и во едниот и во другиот жанр е иста. Само кај различни народи, нации, во различни средини, области, гета... Географски, дијаметрално спротивни на две различни страни на светот! Спојот на изворниот фолклор со современите музички поп, рок, ар ен би... жанрови не е ништо ново на „Евровизија“, не е откривање „топла вода во бојлер“, но очигледно е добар рецепт за пристоен, а неретко и победнички успех на оној што ќе се сети „кога и како да го вклучи бојлерот“! Тоа се покажало и со фолклорот во победничките песни на северно-европските земи како Ирска или Норвешка на пример, a и со оној на балканските земји од регионот како Босна и Херцеговина, Србија, Бугарија, Турција, Грција... Па дури и ние сме имале обиди за вакви испреплетени жанровски комбинации преку спој на фолклорното и современото како песната на кралицата Есма и Лозано, на пример пред неколку години. Но, по се' изгледа дека треба да ти се погоди моментот или да си претставник на земја - важен фактор на континентот? Украина очигледно годинава беше. Трето објаснување - нема! Арно ама, ако се навратиме едно два-тринаесет години наназад и се потсетиме на една видеоснимка, од Скопскиот фестивал, односно тогашниот македонски избор за песна на Евровизија 2009, ќе видите дека и НИЕ гангста рап-оро имавме и тоа далеку пред Украинците, само... изгледа не го препознавме?! Имено, токму во таа 2009-та година на домашниот евровизиски избор се појави рап-фолк формацијата наречена „Сленг“ со нивнта песна „Гангста оро“ со која се обидоа да бидат избрани да ја претставуваат Македонија. Завршија како што завршија иако нивниот настап беше повеќе од необичен и над се симпатилчен, ама и мошне оригинален... Денес се покажува дури и победнички! До душа, како што осамнаа некои пораки ( скраја да е) на социјалните мрежи: „Треба(ше) ли некој да ја бомбардира и Македонија за да победиме на Евровизија?“ веројатно треба да се „склопат и коцкичките“ за да го добиеш мозаикот... Иако, ако е победата на Украина навистина придобивка на војната, на тој начин сигурно никој не ја посакува! Затоа пак, потсетете се на македонскиот изворен фолк -“Генгста оро“ стајл од пред повеќе од дузина години:

На Син4ак и 9Дима им е тешко и во „Пролет“ (ВИДЕО)

Антонио Димитриевски — Sat, 30 Mar 2019 10:29:16 +0000

Битолското дуо Син4ак и 9Дима(Синчак и Девет-дима) го претстави своето прво видео за темата насловена „Пролет“, која е дел од заедничкиот проект што започна пред речиси една година. Имено, зад псевдонимот Син4ак се крие младиот трап-продуцент Петар Ристевски, кој настапува и твори и под името „Перомикс“.

9Дима му е колегата и сограѓанин Дима Тасевски, за кого ова е прв потфат во музичките води.

„Песната е снимена уште минатата пролет, но дури сега спонтано одлучивме да снимиме спот за неа. И покрај тоа што немавме никаков буџет, сфативме дека ја имаме главната алатка за снимање – апаратот, па помисливме, зошто да не? И така излеговме низ градот и цело време се снимавме, па на крајот направивме монтажа од снимките и резултатот е видеото за ’Пролет’“, вели Петар, додавајќи дека инспирацијата за самата песна ја добиле еден тажен и мачен ден, обземени од мрзеливост.

И покрај тоа што ова е прво видео за битолските музичари, тие зад себе имаат уште неколку заеднички песни, а се надеваат дека сето тоа ќе го заокружат и со албум. „Би сакале тоа да се случи, но сè уште не знаеме кога. Но знаеме дека наскоро ќе го имаме првиот настап, за кој во моментов сме во преговори, па ќе видиме како ќе се одвиваат работите понатаму“, додава Петар, чиј потпис стои на матрицата и на неговиот дел од стиховите, а Дима си ги пишува своите.

Во реализацијата на видеото за „Пролет“ учествуваа и нивните пријатели Анастасија Зисовска (камера) и Бојан Георгиевски (монтажа), а како изгледа и звучи сето тоа дознајте во продолжение. https://www.youtube.com/watch?time_continue=130&v=Hj_MHBTEzuM

Рап – Вистина.мк

Украина со рап и изворен фолклор победи на Евросонг: И ние гангста рап-оро имавме далеку пред Украинците, само… не го препознавме?! (ВИДЕО)

На Син4ак и 9Дима им е тешко и во „Пролет“ (ВИДЕО)