пмг – Вистина.мк

Четврто издание на фестивалот „Крај Вардарот Џез“

Антонио Димитриевски — Wed, 03 May 2023 12:35:09 +0000

Четвртото издание на фестивалот „Крај Вардарот Џез” во организација на дискографската куќа „ПМГ Џез” ќе биде отворено на 18-ти мај. Трите фестивалски вечери ќе се случуваат на малата сцена во Македонската филхармонија и во Младинскиот културен центар. Организаторите предвидуваат најквалитетна и најразновидна програма досега и неколку промоции на нови музички изданија. Фестивалот е дел од програмата за размена на фестивали („FEX-Festival Exchange”) на европскиот проект „МОСТ” за развој на сцената на светска музика на Балканот, и соработува со еден од најрелевантните промотери на музика во земјава – „Аудиокултура”. Во четврток на 18-ти мај, во 20 часот на малата сцена во Филхармонија, фестивалот ќе биде отворен со настап на Дамир Имери Трио (Македонија), тивка легенда на современата македонска музика. Тромбонист и мултиинструменталист, човек кој првите десетина години од својот работен век ги минува во МРТ, каде соработува со уметници од форматот на Драган Ѓаконовски – Шпато, Александар Џамбазов, Илија Пејовски… Настапувал на сите музички сцени низ земјава и соработувал со истакнати светски познати музичари: Душко Гојковиќ, Реј Чарлс и Џани Басо. Во триото, покрај него, членуваат и Ади Имери и Александар Ванчовски. Мајсторски третираат современ џез според сопствените афинитети и се добро познати во пософистицираните музички кругови. Истата вечер, на фестивалот ќе настапат и Перфорто (Perforto) од Полска, со Ола Ржепка на пијано и Лукаш Марчинијак на електрична гитара. Гостувањето на Перфорто на „Крај Вардарот Џез Фестивал” е поддржано во рамките на европскиот проект „МОСТ” во програмата за размена на фестивали и се реализира во соработката со Катовице ЏезАрт Фестивал од Полска. Перфорто е жичано дуо за електрична гитара и пијано, а користат и дополнителни инструменти од дрво, метал, хартија и други материјали. Во импровизацијата ги истражуваат физичките карактеристики на звукот, како што се висината, темброт, интензитетот и неговите последици во временска линија. Интензивно, деликатно, продорно и радикално музичко доживување. Во петок на 19 мај, во 19 часот, во лобито на кино Фросина – МКЦ во рамки на „Крај Вардарот Сесии со Аудиокултура” ќе биде промовирано најновото винил издание на ПМГЏез, компилацијата „Крај Вардарот Џез Vol.2″. Од 21 часот во киното Фросина ќе се реализираат два концерти, на Букршлиев/Томевски и Кондовски/Дробицки (Македонија). Соработувајќи долги години како композитори и изведувачи во повеќе македонски џез ансамбли, Филип Букршлиев и Благојче Томевски успеаја да развијат телепатска вештина за музичка комуникација, благословена од необичната звучна палета, формирана од инструментите што ги користат: бас кларинет и гитара. Во оваа прилика ќе го промовираат материјалот од албумот „Something Lonely in the Bone” (ПМГЏез, 2023 година). Настапот на „Кондовски/Дробицки” е логична прогресија на нивните чести соработки, што резултираше со неколку изданија на ПМГЏез. Владан Дробицки (тромбонист) е еден од водечките џез музичари во земјата, додека Глигор Кондовски (виолина, електроника) исцртува езотерична фигура, лизгајќи се помеѓу класика, експеримент, џез, фотографија и филм. Во сабота, во денсинг салата на МКЦ, во 21 часот ќе настапат „Ларта” (Македонија), проектен состав на тапанарот Дино Милосављевиќ, кој, минатата година за „ПМГ Џез” издаде прв самостоен албум „Fragments”, во соработка со долгогодишните пријатели Ѓоко Максимовски – бас, Васко Бојаџиски – саксофон и Владан Дробицки – тромбон. Милосављевиќ е еден од најистакнатите тапанари во регионов. Соработува со врвни и познати музичари и уметници, како „Сетстат”, „Кабадајас”, „Алшар” – проект на Никола Коџабашија, „Беневентан трио” и „Инфјус”. Милосављевиќ е еден од основачите на „Skopje Drum Talks”, првото здружение за едукација и поддршка на тапанари во земјава. Фестивалското издание ќе се заокружи со ѕвездите на фестивалот „Чуи” (Chui) од Хрватска, загрепски квартет, чија визија е спој на џез со современа клупска танцова музика, електроника и рокенрол. Уште со првиот албум од 2012 година, обезбедија култен статус на хрватската музичка сцена. Во 2017 снимија албум со џез оркестарот на Хрватската Радио Телевизија и композиција со легендарната дива Јосипа Лисац. Досега имаат издадено 6 студиски албуми. Седум пати се закитија со најпрестижната хрватска музичка награда „Порин” во различни категории, и четири пати со наградата на независните музичките новинари Рок&Оф. Работат и музика за театар и за филм. Чуи ќе настапи во состав Тони Старешиниќ (клавијатури и електроника), Војкан Јациќ (саксофон и електроника), Иван Левачиќ (тапани) и Конрад Ловренчиќ (бас). Досега имаат настапувано на сите големи џез и рок фестивали низ Хрватска и Европа. Хрватската музичка критика ги доживува како моментално главна концертна атракција во нивната земја. За затворањето на фестивалот, по 23 часот предвидена забава со ПМГ Џез диџеј сет на Мирко Попов, во лобито на киното Фросина.

Марија Каева со песна ви посакува – „Добро утро“ (ВИДЕО)

Антонио Димитриевски — Sat, 21 Aug 2021 10:27:23 +0000

Пејачката и радиоводителка Марија Каева која публиката своевремено најмногу ја памети по нејзината песна „Фројд е жив“, по подолго време повторно се појавува на музичката сцена со ново парче музика и видеоспот. Како што објави таа „Добро утро“, е една од осумте нумери кои ќе бидат издадени како албум, што е работен со Владан Дробицки. Текстот се на Марија Каева, како и музиката која ја компонирала заедно со Илин Дробицки кој го потпишува и аранжманот на песната. Музичката продукција е дело на Владан Дробоцки!

„Во изминативе осум месеци со Владан Дробицки работевме на осум песни кои наскоро ќе бидат издадени како албум. Ова е првиот сингл на кој ни гостува тринаесет годишниот автор Илин Дробицки кој ме однесе во еден поинаков музички свет и ме инспирираше да се надоврзам вокално на една негова песна во која се чини времето тече сосема поинаку“ вели Каева.

Видео спотот го изработил Мирко Попов, во продукција на ПМГ рекордс а обвивката на синглот е на Виолета Качакова.

За прв пат стартува џез фестивалот „Крај Вардарот Џез“ во паркот зад МКЦ

Антонио Димитриевски — Mon, 13 Jul 2020 11:18:14 +0000

Во организација на дискографската куќа ПМГЏЕЗ на 23 и 24 јули, во паркот позади Младинскиот културен центар ќе биде одржаното првото издание на фестивалот „Крај Вардарот Џез“. Првата фестивалска вечер ќе почне во 19.45 часот со настапот на скопскиот џез музичар Филип Букршлиев. По него настапува веројатно најквалитетниот џез состав во земјава, ветераните „Сетстат“. Потоа, скопските џез музичари „Зулу 3.4“. Вечерта ќе ја заокружи „Кантон6Квартет“ техно-џез хибрид. Следната вечер, фестивалот ќе започне во 20 часот. Настапува светски реномираниот, македонски џез хармоникаш и мулти-инструменталист Јордан Костов со неговиот квинтет. По него џез триото „Cobalt code unit“. За крај, скопскиот состав „Светлост: Одрон Ритуал Оркестар“ Влезницата е по симболична цена од 100 денари, а двете фестивалски вечери ќе се одвиваат според сите протоколи предвидени за организација на настани од овој тип, поради актуелната ситуација со коронавирусот. Задолжително е носење маска, столчињата ќе бидат поставени на 2 метри растојание. Организаторите на фестивалот апелираат до публиката да се држи до сите норми на однесување, се со цел да се заштитиме меѓусебе и наедно да покажеме пример дека настаните од културата можат да се одвиваат безбедно и во вакви услови. Бројот на посетители е ограничен на 300 места за седење.