пијан славеј – Вистина.мк

Игор Станоевски – Игимен во чест на татко му, заедно со Пијан Славеј ги вратија времето и спомените во – „Мисла од свила“ (АУДИО)

Антонио Димитриевски — Wed, 15 Feb 2023 12:47:09 +0000

Младиот ликовен уметник, музички автор и гитарист, Игор Станоевски, алијас Игимен сними нова песна која е подготвена за радио промоција, со најава со која го привлече вниманието, а го поврзува со своите семејни корени. „Станува збор за наследена песна од татко ми за која напишав текст, а на неа гостува вокалистот Бранислав Николов алијас Пијан славеј од култните „Фолтин”. Оваа песна е снимена во “Студио Алшар”. Тон Мајстор е Ивица Јанкуловски со кого ја делиме и продукцијата на песната. Се појавуваат Дарко Мучев Мучо на бас и Бодин Попов на тапани, додека гитарите ги свирам јас, во насока и стилот на татко ми со цел да го доловам неговиот тон“, вели Игор. Интересно е што музичката тема датира од крајот на 70-тите или почетокот на 80- тите години и е дел од арсеналот на песни кои ги наследил од својот татко, познатиот музичар и новинар Петар Станоевски, кој за жал прерано не напушти. „Со неа сакам да го најавам претстојниот албум Unforgetable You посветен на татко ми. Албумот е завршен минатата година. Меѓутоа мислам дека му недостигаше песна на македонски јазик, покрај неколкуте теми на англиски јазик, како и инструменталните композициции кои доминираат на албумот“ , раскажува музичарот за песната и албумот во најава. Петар или Перо– Пешак како што го знаеја во скопските музички кругови, беше новинар и уредник во дневниот весник “Вечер”, одличен музичар и извонреден гитарист, посветен на рокенролот и блузот. Дел од дуото „Ловци на бисери”, со кои своевремено извадија и касета и остварија низа гостувања во различни музички емисии и сопствено шоу на Македонската телевизија. Како звучат Игимен и Пијан Славеј во „Мисла од свила“, проследете во продолжение (КЛИКНИ ТУКА):

Промовирано ЕП-то на „Пијан славеј“

Антонио Димитриевски — Thu, 19 May 2022 12:59:31 +0000

Во пресрет на 21. OFFest (1-4 јуни), Скопскиот џез фестивал, во среда, на 18 мај 2022 во „Макка бар“ во 20 часот го промовираше новото издание на SJF Records – првата дискографска објава на ПИЈАН СЛАВЕЈ.

Ова EП содржи 5 авторски композиции на ПИЈАН СЛАВЕЈ (Бранислав Николов), во вкупно времетраење од 18 минути. Покрај физичкото компакт-диск издание, Pijan Slavej EP ќе биде достапно и на сите популарни глобални дигитални платформи и стриминг сервиси. Pijan Slavej EP е 48. издание на SJF Records.

Дуке Бојаџиев и пријателите музичката соработка ја „преобразија“ во – „Пеперутка“ (АУДИО)

Антонио Димитриевски — Fri, 14 Jun 2019 12:49:00 +0000

Спонтаните соработки често се покажуваат како едни од најдобрите, а доказ за тоа е и најновата песна на Дуке Бојаџиев – „Пеперутка“ – која се роди како резултат од неочекувана средба со неговите колеги Бранислав Николов алијас „Пијан славеј“ и Гоце Јованоскиод „Фолтин“ и Георги Шарески. „Во февруари 2019, за време на мојата посета на Берлин за Берлинскиот филмски фестивал, случајно ги сретнав Пијан Славеј и Гоце од ’Фолтин’ (еден од моите омилени македонски бендови), како и мојот долгогодишен пријател од деновите во музичкиот колеџ Беркли, гитаристот и композитор Георги Шарески. Од спонтаните разговори за можна соработка, се вратив во Њујорк инспириран од моите колеги музичари и ја напишав ’Пеперутка’. Георги ги сними гитарите во студио во Берлин, Гоце ги сними басот и вокалите на Пијан Славеј во Битола, а сето тоа го довршив јас во моето студио во Њујорк“, раскажа Бојаџиев како се роди оваа приказна. „Пеперутката“ доаѓа по минатогодишниот албум „Синергија“и е одлично загревање за концертот на 8-ми август што ќе го одржи во рамките на фестивалот „Охридско лето“ на сцената Долни Сарај во Охрид.Автор на музиката е самиот Дуке, кој стои и зад продукцијата, а заедно со Пијан Славеј ги напишаа и стиховите за песната. Како звучи нивната музичка соработка преобразена во „Пеперутка“ , дознајте во продолжение. https://www.youtube.com/watch?v=aIgryPvN42Q