нина спирова – Вистина.мк

Македонија не знае ни каде и живееле, ни каде и почиваат легендите: По две години откако почина конечно е откриена мистеријата на која локација почива легендарната македонска пејачка Нина Спирова (ФОТО)

Антонио Димитриевски — Wed, 31 Aug 2022 07:27:05 +0000

Легендарната македонска пејачка Нина Спирова, дамата со „кадифен глас“ која ги отпеа евергрините „Еден бакнеж“, „Молчи, молчи“, „Езеро мое“, која почина на 11 септември 2020 на 82 години, е погребана во селото Коштуниќи меѓу Чачак и Горњи Милановац во Србија, објави писателот Синан Гуџевиќ во порталот Новости.хр! Во текстот „Гробот на Нина Спирова“ објавен 29 август 2022 г., тој пишува дека Спирова таму е погребана на 13 септември 2020, со што се разреши и мистеријата каде точно почива една од најпознатите македонски пејачки на забавна, староградска и народна музика на сите времиња, која изведе забавни мелодии кои станаа евергрини. Последната информација што беше јавно позната во земјава беше дека Спирова живее во Филаделфија, САД и се сметаше дека таму и починала, нешто што никогаш и не се случило, а ова сега го потврди и Гуџевиќ. Гуџевиќ кажува дека свештеникот поп Дејан Ракиќ, кој го извршил погребот во Коштуниќи, кој дваесет години живее во селото и ја познавал Спирова. „Тој вели дека во парохијата дошол во 2000 година, а во тоа време Спирова веќе живеела во Коштуниќи. Била блиска пријателка со една мештанка од Коштуниќи, која работела во Америка, во Филаделфија. Кога таа мештанка се пензионирала, се населила во Коштуниќи, а тоа ја привлекло и Нина Спирова да се насели. Со нив две живеела и мајката на таа мештанка. Поп Ракиќ добро се сеќава на самиот погреб. Тој вели дека пријателите и роднините ѝ подигнале споменик на Нина Спирова. Спирова имаше статус на истакнат уметник во Србија, но не и во Македонија, имаше српска пензија, но не и македонска“, пишува Гуџевиќ, кој ја објави и фотографијата од нејзиниот гроб. Спирова, со специфичен кадифен глас и емотивна интерпретација, е родена е во Прилеп во 1938, почнала да настапува од 16 години. Ќе останат како трајни вредности нејзините интерпретации на „Бог да бие кој прв почна“, „Пилето ми пее“, „Не си го продавај Кољо чифликот“, „Судбо моја, судбино“, „Зајди, зајди, јасно сонце“, „Кажи, кажи либе Стано“ . Спирова засекогаш се повлече од естрадната сцена во почетокот на 1980-те години. Во тоа време од Скопје се преселила во Белград и Загреб, а се сметаше и дека подоцна живеела во Германија, па во Филаделфија, САД, што е апсолутно неточно. Таа никогаш не живеела во Филаделфија, понекогаш ја посетувала и нејзината пријателка од Коштуниќ таму. Новинарите, какви што денес ги има, напишаа дека Спирова живее и во Америка и во Германија, а луѓето поверуваа во тие вести и ги сфатија како веродостојни. Нина Спирова живеела во Земун, на улица 22. Октомври, број 11. Таа е родена како Нина Спиркоска. Нејзиниот брат Димко се презива Спиркоски, така и сестра и Милка додека не го зема презимето на сопругот Пухариќ. Таткото на Нина Спирова, Кирил Спиркоски (1908-1986), се оженил во 1932 година за Љубица Кључаричек (1914-1991), родум од Челин кај Врбовац во Хрватска. Љубица дошла во Прилеп со група пејачи и таму го запознала Кирил. Кон Нина Спирова, македонската културна јавност имала некоја необјаснива деменција во сеќавањето. Македонските структури и институции кои се занимаваат со музика и мноштвото колеги пејачи со години наназад велеле дека не знаат ништо за неа и дека можеби веќе не е ни жива. Како македонската и југословенска Ела Фицџералд и Едит Пјаф (таканаречена од легендарниот Драган Ѓаконовски - Шпато) исчезна од сеќавањата и од меморијата на македонската јавност и институциите на државата, останува задача на истражувачите?! Во својата кариера Нина Спирова учествувала на првите изданија на Скопскиот фестивал, а има соработувано со најпознатите македонски автори, композитори и музички аранжери, меѓу кои Драган Ѓаконовски – Шпато, Љубомир Бранѓолица, Димитар Масевски и многу други. Има снимено над 80 композиции само за музичката продукција на МРТВ, од кој поголемиот број се хитовите: „Молчи, молчи“, „Еден бакнеж“, „Езеро мое“, „Далечен крај“, „Пелистерски очи“, „На овој ден“. Со „Еден бакнеж“ на композиторот Петар Пешев учествувала на фестивалот Опатија во 1962 и добила прва награда. Овој евергрин беше носечка музичка тема во филмот „Сенки“ на македонскиот режисер Милчо Манчевски.

„Еден бакнеж“ – пејач(к)и рој: Теа во чест на Нина… и безброј сни за сите нас! (ВИДЕО)

Антонио Димитриевски — Wed, 16 Sep 2020 08:30:35 +0000

Неодамна замина и таа, легендата на македонската староградска и забавна песна, единствената Нина Спирова. Испеа безброј староградски песни и новосоздадени шлагери, а нејзината интерпретација го остави можеби најсилниот љубовен печат на сите времиња, во историјата на македонската забавна музика. Таа ќе остане запаметена по своите евергрини и нејзината специфична изведба, која можеби е највпечатлива во вечната тема, безвременскиот македонски шлагерски бисер, „Еден бакнеж“. И токму тој, нејзиниот „музички бакнеж“ имаа „желби рој и безброј сни“ одново да го препеат и испеат голем број пејачи кои доаѓаа на сцената по неа, но никој не успеа како неповторливата Нина. Нина замина во вечноста, но нејзиното име и дело останаа во аналите на македонската музичка историја, нејзините изведби во сеќавањата на публиката, а нејзините песни запишани во вид на аудио и видео записи, како аманет за навека на идните поколенија, од кои се раѓаат новите генерации македонски музички ѕвезди. Во чест и сеќавање на Нина Спирова, младата македонска пејачка Теа Трајковска сподели на својот инстаграм сопствена изведба на вечниот евергрин „Еден бакнеж“. Песна која симболично години подоцна беше една од насловните нумери во филмот „Сенки“ на Милчо Манчевски, чие пак име “Сенки“, исто така го носи и неодамна објавената најнова песна на младата пејачка. Со спојот на таа симболика во чест на големата Нина, Теа сама зад пијаното ја пее безвременската „Еден бакнеж“. Сигурно не за да докаже дека и таа умее и знае, туку за да покаже дека сопствените вредности треба да умееме навреме да ги препознеме, никогаш не треба да престанеме да си ги цениме и почитуваме и вечно да ги чуваме. Само така и останатиот свет и нас ќе не почитува! „Еден бакнеж“ од Теа за последно збогум на Нина и безброј сни... за сите нас!

View this post on Instagram

Tribute to Nina Spirova ♥️ #MkMuzika

A post shared by THEA (@theatrajkovska) on Sep 15, 2020 at 9:56am PDT

Почина Нина Спирова, легендарната македонска пејачка

Антонио Димитриевски — Fri, 11 Sep 2020 20:24:28 +0000

На 82-годишна возраст, денеска, 11 септември 2020 година, почина доајенот на македонската музика, легендарната пејачка Нина Спирова. На домашната музичка сцена остави трајни вредности по кои вечно ќе биде запаметена како една од најплодните пејачки на староградска музика. Таа има исполнето и снимено голем број познати музички хитови, од страна на светски аранжери како и голем број на обработки на македонски народни песни. Незаборавн се нејзините интерпретеации на „Бог да бие кој прв почна”, „Пилето ми пее”, „Не си го продавај Кољо чифликот”, „Судбо моја, судбино”, „Зајди, зајди, јасно сонце”, „Кажи, кажи либе Стано”, како и нејзиниот најголем забавен евергрин „Еден бакнеж”. Има учествувано на првите изданија на Скопскиот фестивал, а има соработувано со најпознатите македонски автори, композитори и музички аранжери, меѓу кои Драган Ѓаконовски - Шпато, Љубомир Бранѓолица, Димитар Масевски и многу други. Има снимено над 80 композиции само за музичката продукција на МРТВ, од кој поголемиот број се хитовите: „Молчи, молчи“, „Еден бакнеж“, „Езеро мое“, „Далечен крај“, „Пелистерски очи“, „На овој ден“ итн. Родена е на 26 октомври 1938 година во Прилеп, а поради нејзината скромност и повлеченост од јавниот живот, за неа се познати многу малку приватни податоци.Спирова засекогаш се повлече од естрадната сцена во почетокот на 80-тите години. https://www.youtube.com/watch?v=WiwglLg8aH8