никола зацески – Вистина.мк

Љубов, среќа, тага и солзи во новата песна на Никола Зацески – „За вас“ (ВИДЕО)

Антонио Димитриевски — Wed, 05 Jan 2022 12:58:28 +0000

Песна по песна, скромно и ненаметливо, младиот пејач Никола Зацески ја гради својата музичка кариера по враќањето од Австралија во Македонија. По „Мојот пат“, „Срцето мое тука чука“, по одличната преработка на „Лихнида“, талентираниот Зацески продолжува да твори и да создава нова музика. Овојпат Никола и неговиот тим ја промовираат песната „За вас“, нумера на која работеа едни од најдобрите во нашата земја. Музиката и аранжманот се дело на познатиот Николче Мицески, текстот го потпишуваат Никола заедно со одличната Весна Малинова, а се снимаше во студиото „XL“ на Дејан Момироски. Станува збор за нумера во која буквално ќе може да се пронајде секој од нас, бидејќи инспирацијата е љубовта кон семејството. „Ова за мене е најдрагоценото нешто што сме го креирале до сега со мојот тим, бидејќи секоја буква и нота има длабоко значење за мене и е преполно со емоции од љубов, среќа, тага, солзи - сето тоа испреплетено во една песна. Живеењето неколку години надвор од Македонија разбудија уште поголеми емоции кон мојата татковина и родители (фамилијата), па од таму моите први песни се инспирирани од нив“ - вели младиот Зацески. За екранизацијата на ова емотивно „соголување“ на Никола Зацески се погрижи талентираниот Никола Митревски, кој се потишува како режисер на видеоспотот. Погледнете, слушнете и уживајте, ова е направено и... „За вас“:

Никола Зацeски сигурно чекори по „Мојот пат“ (видео)

Слободанка Илиева — Tue, 29 Dec 2020 10:01:42 +0000

Многу брзо откако изминатиот месец го објави својот прв сингл насловен „Срцето мое тука чука“ посветен на Македонија, пејачот кој му го даваат епитетот дека има волшебен глас, има нова песна за публиката. Во овие празнични денови Никола Зацески и неговиот тим ви подаруваат втор музички наслов „Мојот пат“. Музиката, аранжманот и продукцијата се на Николче Мицевски, додека тексот е на Борче Нековски. Песната е снимена во студиото ХL Момировски, додека видео продукцијата и режијата на спакуваното видео е на пеце Здравковски. “Огромна благодарност до целиот тим кој работеше со голема посветеност на овој проект, огромна благодарност и до сите мои роднини и пријатели за поддршката. Посебно би ги издвоил сите мои фанови кои после првиот сингл ми возвратија со неверојатна позитивна енергија и љубов. Љубовта за мене е основната инспирација и мотивација и од таму произлезе и мојот втор сингл „Мојот Пат” . “Мојот Пат” е едноставен, искрен со чиста љубов и од срце. Се надевам дека во овие лоши моменти барем за малку ќе го исполни и Вашето срце со љубов и позитивна енергија” – Никола Зац. Погледнете:

Никола Зацески првата песна ја посвети на Македонија – „Срцето мое тука чука“ (ВИДЕО)

Антонио Димитриевски — Thu, 19 Nov 2020 13:25:18 +0000

Пријателите, но и музичките критичари, за Никола Зацески велат дека поседува „волшебниот глас“. Досега аматерски снимил неколку свои изведби на познати македонски хитови, како „Велигден“ и „Километри“, но за првиот самостоен проект собра врвна екипа на професионалци од Македонија и од Австралија, каде што живее веќе две години. Песната се снимаше во студиото „ХЛ Момироски“, за музиката и за продукцијата беше задолжен Николче Мицевски, а текстот на песната „Срцето мое тука чука“, посветена на Македонија, го напиша Весна Малинова. Интересната видео приказна снимена на неколку локации во нашата земја ја реализираа: Пеце Здравковски, Ѓорѓи Вацев, Христијан Српцански, а главните ликови ги играат манекенките Клаудија Бабаровска и Симона Митревска. Продуцент е Горан Вељановски. „Многу успешно и со преголема енергија се заврши комплетното снимање за мојата прва песна и спот во Австралија и Македонија. Со нетрпение чекам да го споделам со вас овој мој прв најголем проект, во чие создавање учествуваа врвни професионалци. Се надевам дека ќе успее да допре нашата порака до секој од вас. Пораката е едноставна и нејзина цел е оние кои ќе ја слушнат песната да почувствуваат љубов, среќа, радост, убавина…“ – вели Никола за своето првенче. Инаку, тој својот талент и искрена љубов кон музиката, посебно кон македонската, ги покажува од најрана возраст. Учи да свири пијано на десет години, кога почнува и да пее. Завршил средно музичко училиште во Битола, а подоцна и Факултет за музичка уметност „Св. Кирил и Методиј“ во Скопје. Никола работел и како професор во средното музичко училиште „Климент Охридски“ во Битола. Уште за време на своите студии Никола учествува на многу интернационални музички натпревари во Русија, Полска, Франција, Шпанија и Бугарија, освојувајќи 11 награди, а како хорист освоил пет меѓународни признија. Покрај интернационалните успеси, како дел од Македонската Опера и Балет настапува на Охрискиот, Битолскиот и на Скопскиот фестивал. Своето оперско пеење го усовршува во Русија, Италија и во Австрија. Освен оперска музика почнува да пее и поп и традиционални македонски песни. Уште кога имал 7 години станал играорец, а подоцна и кореограф и остварил соработка со националниот ансамбл „Танец“. Во 2018 година се сели во Австралија, каде се приклучува на танцовиот ансамбл „Тоше“, како главен кореограф. Бил дел од голем број хуманитарни концерти во Македонија, Австралија и низ целиот свет и станува водечки член на „Игри без граници“, организација посветена на создавање и организирање настани од хуманитарен карактер, со цел подигање на свеста и обезбедување на финансиски средства за децата во Македонија и целиот свет. Во февруари годинава во Мелбурн го организира хуманитарниот настан „Насмевка за овој свет – Насмевка за едно дете“, во спомен на Тоше Проески. https://www.youtube.com/watch?v=mAeSmcnWB3Y&feature=emb_logo Извор:Естрада+