некст тајм – Вистина.мк

Близнаците Мартин и Стефан од „Некст тајм“ слават роденден, а мајка им Сузана им го честиташе на најубав начин: Разгледница од спомени за своите синови (ВИДЕО)

Антонио Димитриевски — Wed, 20 Sep 2023 07:57:48 +0000

Близнаците Мартин и Стефан од братското музичко дуо „Некст тајм“ со своите стилизирани преработки на најпознатите македонски песни со патриотска содржина, ги освоија срцата на публика не само во Македонија, туку и ширум светот кај македонската дијаспора... Од Америика и Канада до Нов Зеланд и Австралија. Нивниот албум „Мајка“ на кој се најдоа споменатите песни го доби токму тој наслов заради неговото симболично значење. Нивната родна земја - мајка Македонија и нивната мајка Сузана, жената која ги родила како двете најважни и единствени мајки во нивните животи. Зашто како што мајка може да ги сака своите чеда, не може никој друг... Македонија веќе покажа дека тоа е така, а за нивната мајка Сузана излишно е и да се трошат зборови. Впрочем, со последниот свој гест таа тоа само уште еднаш, по кој знае кој пат и ќе го потврди. Имено, нејзините близнаци Мартин и Стефан денес, 20 септември 2023 слават роденден... 37-от по ред! Веќе зрели мажи, едниот од нив - Мартин однеодамна и оженет, но за нивната мајка, впрочем како и секое чедо за својата, вечно ќе останат нејзини деца! Затоа таа решила роденденот покрај останатото, да им го честита и јавно, на социјалните мрежи и тоа на најубав начин. Со видео- разгледница од спомени за своите синови! Во неа Сузана ги вткала некои од најубавите и најемотивни моменти од детството па се до денес на нејзините близнаци. Кадри од првите родендени, кога Мартин и Стефан биле уште многу малечки... Преку првите нивни детски фестивалски и ТВ настапи... Па се до овие денови, кога нејзините близнаци как братско дуо „Некст тајм“ се едни од најголемите македонски музички ѕвезди. „Среќен роденден мили мои, Ви благодарам што ме правите среќна и што чекорите по правиот пат“ - напишала гордата мајка покрај постот во кој е споделена нејзината роденденска видео честитка. Славениците видеоподарокот од нивната мајка го преземале и исто така го постирале на својата официјална Инстаграм страница, покрај кој во описот додале: Денес е наш ден!!! Денес е нашиот Роденден!“

View this post on Instagram

A post shared by Next Time (@nexttimeband)

Фото: Фејсбук/Suzana Filipovska/Инстаграм/nexttimeband

Стефан од „Некст тајм“ со саканата замина во Венеција: Но, разочарувањето беше поголемо од било кога (фото)

Слаѓана Атанасова — Tue, 22 Aug 2023 09:06:23 +0000

Стефан Филиповски од братското дуо „Некст тајм“ веќе подолго време ужива во љубовна врска со атрактивната црнокоса со необично убаво име, Тинеа, која живее во Виена и има српско-хрватско потекло. Тие двајцата одлучија летна дестинација да им биде романтичниот град Венеција, а за водич Стефан ја одбра неговата девојка. - Мојот туристички водич - се пошегува тој под објавата која ја сподели на неговиот Инстаграм профил.

View this post on Instagram

A post shared by Stefan Filipovski (@stefan_filipovski)

Се разбира, кога се патува особено на вакво убаво место каде има што да се види задолжително е да се направи и понекоја фотографија за спомен. Токму тоа го направи и Стефан на една од раздвижените туристички улици кога застана да се фотографира со позадината која ја отсликува атмосферата на градот. Веројатно, неговата љубов била позади апаратот во моментот кога Стефан се наместил да позира но, кога ја видел воопшто не бил задоволен. - Ми ја уништи сликата ! - разочарано напиша тој. Наместо Стефан, вниманието го украде случајна туристка која влета во кадарот и ја наруши целата композиција. Но, Стефан иако разочаран, веднаш најде начин да го тргне она што беше „вишок“. - Ја избришавме - гордо се пофали Стефан откако со девојката на дело ги покажаа своите фотошоп вештини. Преку семоќните фото апликации лесно ја избришаа случајната минувачка и го решија проблемот. За потсетување, неговиот брат Мартин неодамна љубовта ја круниса со брак со долгогодишната девојка, ракометарката Андреа и во семејството Филиповски добија снаа. Стефан пак, можеби наскоро ќе се реши на истиот чекор и ќе ја побара раката на оваа вешта убавица. Фото: Принтскрин/Инстаграм/Стефан Филиповски

Село Русиново подготвено за „Илинденски видувања – Вршник 2023“

Антонио Димитриевски — Mon, 31 Jul 2023 11:39:51 +0000

Во беровското село Русиново по пауза од неколку години се возобновува манифестацијата Илинденски видувања – Вршник 2023. Настанот како што велат од организациониот одбор ќе се одржи „На Мегдане„ во село Русиново почнувајки од 1 август, а завршувајки со концерт на „Некст Тајм“ на Илинден. Традицијата за Илинденски видувања – Вршник, како што додаваат организаторите датира од 70-тите години од минатиот век, се со цел заедничко одбележување на македонскиот национален празник Илинден. -Во село Русиново постои долга традиција на општонародна прослава за Илинден која влече корени уште од 70-тите години каде со збратименото Смилево, (родното место на Дамјан Груев) заеднички се одбележувал Илинден како најголем Македонски национален празник. Традицијата покасно во 90-тите е прекината, за да во 2009 година се одржи манифестацијата Вршник во организација на Општина Берово заедно со мештаните од Русиново. Со оваа чествување на Илинден се продолжува долгата традиција, која се надеваме дека во иднина ќе биде континуирана, истакнаа од организациониот одбор. Главна карактеристика на настанот ќе биде подготовката на традиционална Русинска и Малешевска локална храна и печење под Вршник. -Традиционалната храна ќе биде изложена за дегустација, а собраните средства од продажбата ќе бидат наменети за хуманитарни цели за луѓе од Русиново. Од подготовката на традиционална храна ќе издвоиме подготовка на зелник, попарник, баница, јагне и тавче сето тоа под вршник, потоа разни други специјалитети како грав во грне, ориз со црева и дроб, качамак со масло, клиси и ребра во тава, варен компир во котле, теганици, баклава и друга храна карактеристична за овој крај, додадоа организаторите. Во рамки на настанот и дводневната програма ќе настапат повеќе музички звезди со настап на музичари по потекло од Русиново, а главни ѕвезди на вечерта на 2 август ќе бидат членовите на групата Некст Тајм. Настанот е поддржан од компанијата Зегин и здружението „Малешевци за Малешевијата“ кои упатувајки го слоганот „Русинци за Илинден каде и да сте дома да сте“ упатија отворена покана до сите Малешевци да присуствуваат на Илинденски видувања Вршник 2023 и да бидат дел од традицијата која е препознатлива за секој еден човек по потекло од Малешевијата. АГЕНДА – 01.08.23 Вторник 19:00 часот – Отварање на прославата со најава на програма и читање на спонзори 19:20 часот – Малешевски мерак со Златко Мадевски и Душко Ѓорѓиевски + Драги Полизовски + Анета Арсовска + Методи Столески 02.08. – Среда – ИЛИНДЕН 13:00 часот – Припрема на традиционална локална храна и печење под ВРШНИК . (традиционална Русинска и Малешевска храна)

Од вредните раце на Русинските домаќинки во моментот се спремаат повеќе видови вкусна традиционална Малешевска храна и печење на зелник, попарник, баница и други јадења под ВРШНИК . . .

14:15 часот – Малешевски мерак со Златко Мадевски и Душко Ѓорѓиевски + Драги Полизовски + Андријана Ацевска КЕШ + Раде Младеновски 14:30 часот – Изложување, презентација и продажба (со хуманитарен карактер) на подготвена локална традиционална храна Презентација на традиционални Русинска и Малешевска храна подготвена на традиционален начин под ВРШНИК, која ќе биде изложена за дегустација, а собраните средства од продажбата ќе бидат наменети за хуманитарни цели за луѓе од РУСИНОВО. -Зелник под вршник -Попарник под вршник -Баница под вршник -Јагне под вршник -Тавче под вршник -Боб (грав) во грне -Јагне под вршник -Ориз со црева и дроб -Кашамак со масло -Клиси и ребра во тава -Варен компир во котле -Теганици -Баклава 18:30 часот – Детска музичка програма со изведба на песни за деца Од детскиот фестувал Поточиња ќе се претстави Искра Николов која веќе пет години активно настапува од кои четири како вокал. За најмладите таа ќе ги испее песничките од фестивалот на кој учествува. 19:00 часот – Настап на Фолклорен Ансанбал „ЗЛЕВСКИ БИСЕРИ“ 19:30 часот – Продолжува со – Малешевски мерак со Златко Мадевски, Душко Ѓорѓиевски + Драги Полизовски + Андријана Ацевска КЕШ + Раде Младеновски 22:30 часот – Настап на бендот NEXT TIME 01:00 часот – Свечено затварање на манифестацијата со огномет

Свадбен танц под облаците на дождот: Мартин Филиповски – „Некст Тајм“ и ракометарката Андреа Белеска по Кичево, направија интимна свадбена веселба и во Скопје (ФОТО)

Антонио Димитриевски — Mon, 26 Jun 2023 08:45:47 +0000

Како што ветија, а Вистина и веќе пишуваше, така и сторија: Мартин Филиповски - „Некст Тајм“ и ракометарката Андреа Белеска по Кичево, каде си се ветија еден на друг пред Бога во манастирот „Св. Богородица – Причеста“ , а ставија и потпис во матично, свадбена забава за семејството и потесниот круг на пријатели направија викендов ( 24 јуни 2023) и во Скопје. Овој пат на локација на отворено, каде се веселеше, пиеше, пееше и наздравуваше во име на љубовта на младите, кои по осум години врска решија да стават прстени и влезат во брачна заедница. Разбирливо, свадбената забава како што е редот први ја отворија младите со свадбен танц под облаците кого ниту дожфот не можеше да го расипе или спречи... Напротив, само го увеличи, давајќи му дополнителна романтична нота на моментот за паметење. А истиот тој беше збогатен со раскошен огномет, кој траеше додека младоженецот и младата го изведуваа свадбениот танц на ѕвездите... Тој музичка, таа ракометна! Секако, журката не би била комплетна доколку музичарот со својот брат - близнак и нивниот придружен бенд пријатели не засвиреа и не запееја нешто од својот познат репертоар... А таа вечер се налеваше во име на љубовта, па таква беше и една од познатите македонски патриотски песни која „Некст Тајм“ и ја изведоа... „Налеј, налеј“... Овој пат за среќа, радост и бериќет на младите и нивните заеднички години живот што им претстојат. И секако, свадбена веселба без свадбена торта не бидува, па првата лажичка споделена од раката на невестата во устата на зетот и обратно... Како што се ранат две гулапчиња,за потоа чинот да биде зачинет со свадбен бакнеж за вечност! За неизмерна убавина... И (од)надвор и одвантре! Нека се среќни, вечни, заљубени и секако... многудетни! Фото и видео: Instagram story/martin_filipovski

Ново време, со нови навики: Стефан од „Некст тајм“ поласкан со комплимент како познат клиент (фото)

Слободанка Илиева — Mon, 06 Feb 2023 10:26:24 +0000

Стефан Филиповски од братското дуо „Некст тајм“ неодамна беше во Белград, љубовната станица каде најчесто се среќаваат со својата сакана Тинеа. Тој неодамна за Вистина.мк откри дека повеќе од една година е во љубовна врска со Тинеа, а љубовта на далечина за нив не претставувала никаква пречка, бидејќи ако ја има во срцето, тогаш таа е многу блиску без оглед на километрите – гласи девизата на Стефан.

View this post on Instagram

A post shared by Stefan Filipovski (@stefan_filipovski)

Овој пат, средбата им беше зачинета со тоа што беа на веселба каде се славеше љубовта, осносно беа гости на свадбена прослава во Белград од каде пејачот испрати поздрав до фановите и пријателите на Инстаграм. Меѓу неколкуте фотографи на „стори“ тој го покажа и се пофали со своето оригинално палто кое го носеше, а исто е со дизајнерски потпис, но и оригинална етикета од внатрешноста. Ако некогаш се делеа автограми, сега познатите добиваат пофалби и тоа на несекојдневен начин, баш како онаа со која се пофали пејачот. Дизајнерот на кого веројатно Стефан му е редовен клиент, па веројатно и еден од омилените, во внатрешноста од палтото му оставил уникатна порака: -„Од Сидор за Стефан „Некст тајм“, најсилниот вокал било кога“ – пишува дизајнерот. Веруваме дека Стефан со задоволство го носи ова парче гардероба, па почувствува потреба да покаже обострана почит кон дизајнерот. Добро скоено, однадвор, а и одвнатре, парче кое сигурно заслужува посебно место во плакарот. фото:Инстаграм/Стефан Филиповски

„Next Time“ направија концерт за паметење: Само една има вистина…Македонија има светска музика (ФОТО)

Антонио Димитриевски — Sun, 18 Dec 2022 11:19:36 +0000

Македонија уште еднаш покажа дека има музичка сцена која по ништо не е инфериорна во однос на ѕвездите од регионот. Ниту по песните, концертната изведба, целокупната сеценска кореографија, звукот , светлото и светлосните и видео ефекти, фитбекот на публиката.... и севкупната атмосфера што еден концерт го прави голем и величествен. Токму таков беше оној во саботата (17 декември 2022) на братското дуо-близнаци од „Некст тајм“ и нивната многубројна музичка дружина на сцената на концертот во салата „Јане Сандански“ во Скопје. Иако истата можеби не беше исполнета до последното место, за што вината секако не ја сноси бендот, туку оној што се јавува како организатор на ивентот, кој ниту маркетиншки не беше доволно рекламиран, ниту медиумски доволно покриен. Особено што се работи за концерт кој има специфичен карактер и на кој не се изведуваат и пеат комерцијални хитови и познати поп рефрени, туку има многу поинаква и подлабока суштина. Но, тоа е поука и за оние што се нафаќаат да организираат нешто за што очигледно излегува дека се недораснати, а и искуство повеќе за оние, кои со нив прифаќаат да соработуваат. Затоа пак салата „Јане Сандански“ беше максимално исполнета со енергија, патриотски набој и емоци, наплив на национално чувство и родољубие, припадност кон татковината, кон својот народ, мајката земја - Македонија.--- Уште од првите звуци на сајзерите, првиот ритам на тапаните и првите испеани зборови, беше јасно дека близнаците Стефан и Мартин со својата одбрана музичка екипа се подготвени на публиката да и приредат ноќ за паметење, вечер за поистоветување не само со музиката која ја содржат нивните преработки, туку и со традицијата и будењето на свеста кои сме, што сме, колку вредиме, каде припаѓаме, низ што се' сме минале, што се' сме дале за да го добиеме ова што денес го имаме... Своја држава, свое парче земја, нашата Македонија. Преработките на старите македонски изворни песни со родољубива и патриотска тематика во модерни аранжмани и на сцената звучеа светски. Од „Нешто ќе те питам бабо“ и „Јовка-кумановка“, преку „Налеј, налеј“... па се' до „Кога падна на Пирина“... Се разбира со многу изненадувања помеѓу... Полина Тасева како суверен женски вокал уште во првата песна, брилијантниот маестро Николче Мицевски зад клавијатурите кој ги направи сите аранжмани за преработките на „Некст тајм“, а патем отсвири и сегмент од неговиот деби соло албум „Нова ера“, парче кое како создадено се „сроди“ со познатите музички теми на бендот. Се разбира сето ова проследено со извонредната свирка и врвните инструментални квалитети на фантастичните музичари на сцената, особено виолинистот и тапанарот во придружниот бенд, кои со своите бравурозни инструментални точки покажаа дека се музички виртуози. Кулминацијата секако ја предизвикаа неколку моменти со кои концертната атмосфера еруптираше... Најпрвин на „Ја излези Ѓурѓо“, веќе востановената „неофицијална химна“ не само на „Некст тајм“ туку и на навивачките групи ширум Македонија, од кои дел како вардаровите „Комити“ или „Војводите“ од Тетово беа на концертот, создавајќи заедно со останатата публика во салата, величествена атмосфера. Со запалени факели и едногласно пеење на „Ѓурѓо...“ или „Слушам кај шумат шумите“, но и подигање на патриотскиот набој на целата претстава со громогласно навивање: „Никогаш Северна, само Македонија“... Колку за потсетување, колку на народот му е „мило“ што насила му ја прекрстија татковината! Она што можеби беше најнеочекувано изненадување беше акустичниот дел во кој Николче Мицевски клавијатурите ги замени со хармониката, па заедно кавалот на брилијантниот Гоце Димовски („Синтезис“) и веќе споменатата виолина, како и вокалот на Стефан, отпејаа неколку познати македонски фолк класици кои одново во своите ноти и стихови ја имаат родољубивата тематика и патриотската содржина, а се посветени на нашата мајка земја - Македонија. Така, „Заветна“ на легендарниот Пепи Бафтировски или безвременската „Бисер балкански“ на уште една македонска легенда, Гоце Николовски, предизвикаа нова кулминација на национални емоции, патриотски чувства, ежење... Како потсетување на корените, кои сме и од каде потекнуваме, но и дека се' уште не има и никогаш нема да престанеме да постоиме. За крај последното, најавено и очекувано изненадување, како специјален гостин на концертот... Веројатно најдобриот македонски машки вокал и најголемата машка поп ѕвезда во моментов, единствениот Влатко Лозаноски, чија „Километри“ публиката ја пееше во еден здив со него. За потоа како за крај, тој заедно Стефан и бендот поддржани од грлата на разнежнетата публика уште еднаш да ја изведат, овој пат во „дует верзија“ химната на групата... „Ја излези Ѓурѓо“ како јаготка на шлагот на двочасовниот концертен спектакл, во кој се уверивме дека... само една има вистина: Македонија има светска музика! Но и изведувачи, автори, аранжери и музичари на кои би биле горди со секој нивен настап било каде во Европа и светот. Зашто кога е културата и уметноста во прашање, Европа и светот оддамна се овде... во Македонија! Политиката и политичарите се тие кои понизно и поданички чекаат во ходникот со години, лажејќи не дека ќе не внесат онаму, каде што ние всушност оддамна сме! Концертот на „Некст тајм“ и другарите, беше само уште еден од доказите! А.Д.

НЕКСТ ТАЈМ: „Веруваме дека на сите што почитуваат македонска музика, нас и нашиот труд, не би им било трошок за билет што чини колку едно бокалче ракија во кафеана“

Антонио Димитриевски — Fri, 09 Dec 2022 13:21:46 +0000

Мартин и Стефан Филиповски, близнаците од братското дуо „Некст Тајм“ пред големиот концерт на 17-ти декември 2022 во салата на Спортскиот центар „Јане Сандански“ во Скопје, покрај сите обврски околу пробите, креативниот дел и содржината на настапот, подготовките и организацијата на самиот концерт, стигаат да одоговорат и на многубројните покани на медиумите кои овие денови браќата ги бараат за гостувања по разни радио, ТВ и Интернет емисии, за изјави, разговори, интервјуа... Нашиот портал Вистина.ком.мк направи ексклузивно интервју со Стефан и Мартин, кое ви го пренесуваме во целост. Во 2009 година го имавте првиот солистички концерт во Универзална сала. Од денешна преспективна, може ли да се направи споредба на предконцертната возбуда која ја чувствувавте тогаш и оваа сега? Некст Тајм: Во 2009 година памтиме дека бевме премногу возбудени, тоа беше наш прв поголем проект во кариерата дојде брзо , на само една година после офомувањето на дуото. За наше задоволство и среќа тој концерт помина одлично, салата беше преполна, имаше една посебна енергија на тој концерт. Сега се чувствуваме позрело како музички така и умствено. Веруваме дека ќе направиме нешто посебно, нешто што ќе се памти и нешто за што ќе се зборува. Возбудени сме исто како кога бевме деца и во тоа е убавината, што секогаш има простор за нови докажувања. Од 2014 до 2022 година направивте пет преработки на стари македонски песни со патриотска содржина, проекти за кои секако се потребни многу финансии. Вредеше ли? Некст Тајм: Направивме осум преработки но пет со видео запис, другите три обработки се најдоа на нашиот најнов албум „Мајка“, плус една бонус на песната „Ја излези Ѓурѓо“. Искрено кажано вредеше секој цент. Сметаме дека сите овие години работејќи на овие песни, сите што земаа учевство и помогнаа се ова да изгледа како што изгледа, сметаат дека не е до парите, туку до тоа колку душа има во овие македонски песни и колку сме сите среќни што сите почнувајќи од нас па до Николче Мицевски, Огнен Шапковски, Кристијан Теодоров, Мелем Продукција (сите) Студио ХЛ Момироски и сите останати што веруваа во нас. Не можеме да опишеме што ова се значи за нас. Но најголемиот успех е тоа што македонската публика ги прифати перфектно сите овие песни. Зачестија и вашите настапи на големи сцени, дали сега сте задоволни од статусот кој го уживате на домашната сцена? Некст Тајм: Да точно е тоа дека се насочивме на големата сцена и некако во таа насока се видовме како артисти, но тоа се должи на тоа што публиката не прифати така. Да ја нема публиката не би имале ни таков статус. Затоа сме премногу среќни што најголемиот наш трофеј е публиката. Од друга страна кај новинарите не мислиме дека сме биле музички некогаш добро пофалени. Се пишувало рушат рекорди, ја кренаа публиката, нема кој нема да расплаче новата обработка или сличнои за тоа сме благодарни, но не сме слушнале каков статус ни даваат новинарите за нашите музички квалитети. Цело лето беве со настапи и полни концерти никој ништо не напиша. Која песна од преработките ја сметате за најуспешна, има ли таква што ја издвојувате? Некст Тајм: Сметаме дека сите имаат своја убавина, сите од видеата постигнаа милионска гледаност на социјалните мрежи. Новата песна „Кога падна на Пирина“ исто така се движи натаму. Но сите знаеме дека Ѓурѓа е општо прифатена песна, и стана наша, но и на повеќето луѓе, музичка химна. Велите дека имате два мајки, мама Сузана и мајка Македонија. Колку големи патриоти се Мартин и Стефан? Некст Тајм: Така е, ние сме премногу горди на нашата мајка што ни дозволи да се бавиме со тоа што сакаме да се бавиме а тоа е музиката. Таа беше до нас и во добро и лошо, и веруваше најмногу и кога не ни идеа работите од рака. Голем период од кариерата не финансираше, и ни помагаше да можеме да платиме песни и спотови, но еден период рековме доста е или сами ќе опстоиме или нема да се занимаваме со музика и тогаш како дар од Бога, Господ не насочи кон Ѓурѓа. Искрено после таа песна се осамостоивме во кариерата и финансиски. А, на прашањето дали сме патриоти ,одговорот лежи во песните од албумот. Не може да пееш вакви песни, ако не ги чувствуваш. Ја сакаме Македонија и таа ние мајка земја. Постои ли стратегија за што понатаму, ќе се прават уште преработки или се застанува со албумот „Мајка“, па се цели кон нешто ново? Некст Тајм: Искрено сите погледи се фрлени кон големиот концерт затоа што тоа е нешто најбитно во моментов за нас. Следната година сме на турнеја надвор од Македонија, поточно Австралија, а во преговори сме и за други земји. Но, искрено размислуваме за авторска музика и следното нешто ќе биде авторска музика и нов албум. Каква е сатисфакцијата кога публиката ви стои на нозе и го пее заедно со вас секој стих, особено кога тоа се случува на спортските натпревари, постои ли трема, поголема одговорност? Некст Тајм: Таквите моменти не се опишуваат со зборови, би сакале сите артисти да имаат можност да го искусат тоа. Веруваме дека тие моменти ќе ги памтиме до крај на нашите животи. Нормално дека имаме трема, но имаме и искуство така што се ставаме под контрола со првата нота испеана кон и за нив. Се бараат ли гратиси за претстојниот концерт, ќе има ли барем за пријатели или ќе оставите момент за почит кон вашата работа со купен билет? Некст Тајм: Ха, ха, ха... Ова е најдоброто прашање. Нашата фамилија си купи карта, веруваме дека сите што почитуваат македонска музика, не почитуваат нас и нашиот долгогодишен труд , не би им било трошок за билет што чини колку едно бокалче ракија во кафеана. Што ќе си посакате во Новата 2023 година? Некст Тајм: Да сме сите здрави и живи, фамилиите на број, саканите до нив, поголеми успеси од минатата година. Да нема војни, да има мир. А ние ќе си посакаме да бидема поуспешни попаметни и доста креативни за следни проекти. Автор: С.И.

ФК „Вардар“ славеше 75, навивачката група 35 години постоење: „Некст Тајм“ го „запалија“ стадионот со песна, „Комитите“ со пиротехничко шоу (ВИДЕО)

Антонио Димитриевски — Thu, 24 Nov 2022 07:53:12 +0000

Најтрофејниот македонски фудбалски клуб „Вардар“ одигра пријателски натпревар по повод 75. роденден и славеше над „Железничар“ од Сараево (2-0), исто така еден од најтрофејните клубови од Босна и Херцеговина. На овој дуел јубилеј славше и навивачката група „Комити“ - 35 години од своето постоење. На Арената „Тодор Проески“ во Скопје владееше вистинска славеничка атмосфера, пред нешто околу 15.000 љубители на фудбалот. Трибините пулсираа во име на „црвено-црните“, а се приреди и пиротехничко шоу во знак на јубилеите. Што се однесува до натпреварот, Вардар постигна по еден гол во двете полувремиња. Реализатори во победата беа Филип Јаневски и Ерен Парталко. Сите играчи кои беа во записникот, добија шанса. За Вардар настапија: Гачевски, Ристески, Глишиќ, Вецески, Мишковски, Мицевски, Јусуфи, Јаневски, Маркоски, Христов и Попзлатанов кои беа во стартниот состав, а од клупата влегоа Целески, Јовчев, Стоилевски, Дошев, Папули, Величковски, Николовски, Парталко, Велковски, Николов, Блажевски и Цветков. Покрај натпреварот најинтересен беше забавно-музичкиот роденденски дел во кој братското дуо „Некст Тајм“ имаше свој настап. Во свој стил, во духот на македонската патриотска традиција Мартин и Стефан со својата изведба н нивните познати изворни обаботки буквало го „запалија“ стадионот со песна, а „Комитите“ со своето пиротехничко шоу! „Ја излези Ѓурѓо, ја излези сестро, да ги и видиш комитите...“ - ечеше од грлата на петнаесетилјадната публика верни навивачи на „Вардар“ кои пееја во еден глас заедно со „музичките близнаци“ и сите заедно го увелеичаа спектаклот за двојно славје - 75 роденден на клубот и 35-иот на неговата верна навивачка група. Како изгледаше и звучеше атмосферата во славеничкиот дел од спекталот на арената „Тоше Проески“, проследете во продолжение:

View this post on Instagram

A post shared by Next Time (@nexttimeband)

Извор: Гол.мк Видео и Фото: gol.mk/nexttimeband Инстаграм принтскин

Голем и солистички концерт на „Некст Тајм“ во Скопје!

Антонио Димитриевски — Tue, 15 Nov 2022 12:14:19 +0000

На 17-ти декември во Спортскиот центар „Јане Сандански“ во Скопје, голем солистички концерт ќе одржи македонскиот музички бренд - „Некст Тајм“. Тие ќе бидат придружувани од нивниот бенд, на чело со маестралниот композитор и музичар – Николче Мицевски, со кои ќе го презентираат нивното музичко творештво, како и материјалот од нивниот последен албум „Мајка“. Публиката со нетрпение го очекуваше токму овој момент за тие во живо и на голема бина да ги отпеат нивните најголеми хитови како што се: „Ја излези Ѓурѓо“, „Нешто ќе те питам Бабо“, „Слушам кај шумат шумите“, „Кога падна на пирина“ и уште многу други. „Пријатели ве очекуваме во голем број, да уживаме во македонска музика и музички СПЕКТАКЛ“ – порача Стефан на социјалните мрежи. „Ве чекаме на концерт! Сметаме на вашата поддршка. Фала. 17-ти декември, „Јане Сандански“ – објави и Мартин на својот профил на Фејсбук. Специјален гостин на концертот ќе биде еден од најдобрите вокали на овие простори, нивниот колега и многу добар пријател, Влатко Лозаноски – Лозано. Влезниците се веќе пуштени во продажба и истите може да ги купите преку продажната мрежа на MkTickets, како и во повеќето градови во Македонија.

Во општина „Гази Баба“ се одржа голем музички настан по повод 8-ми Септември

Антонио Димитриевски — Thu, 08 Sep 2022 08:43:22 +0000

Општина Гази Баба по повод 8ми Септември, Денот на независноста на Македонија организираше голем музички настан. Настанот се оддржа вчеравечер, среда, на 07.09.2022 година со почеток од 20:00 часот на плоштадот во Автокоманда. На преполниот плоштад настапија: Некст Тајм, Ламбе Алабаковски, Бојана Скендеровски и Влатко Миладиновски.

Утрово на својата официјална страна на Фејсбук, градоначалникот Бобан Стефковски сподели објава и неколку фотографии. Во својата објава градоначалникот Стефковски пишува:

Моја Гази Баба, Ви благодарам од срце. Повеќе од 5000 граѓани на плоштадот во Автокоманда порачаа: Ние сме Македонци и нашата татковина е Република Македонија. Нека е вековита самостојна, суверена и независна Македонија. – напиша Стефковски.