макфест – Вистина.мк

Огнен Здравковски има нов љубовен – „Порок“ (ВИДЕО)

Антонио Димитриевски — Tue, 31 Oct 2023 06:54:48 +0000

Огнен Здравковски учествуваше на 38. издание на фестивалот „Макфест 2023“ во Штип, каде настапи со својата најнова песна која носи наслов „Порок. Огнен настапи во ревијалната вечер и со својата изведба во живо ја воодушеви многубројната публика во културниот дом „Ацо Шопов, како и гледачите пред ТВ екраните... Автори на оваа песна се потпишуваат веќе докажаните музички имиња, Елвир Мекиќ како автор на текстот, додека музиката и аранжманот се дело на Дамјан Лазаров. „Јас сум прездоволен од мојот настап на Макфест, добивам само позитивни коментари. Најважно од се ми беше песната да и се допадне на публиката, а според тоа што го слушам и читам на социјалните мрежи, им се допаѓа „Порок“ - вели Здравковски. Инаку за потребите на оваа негова најнова песна, Огнен сними и видеоспот во српската престолнин, каде соработуваше со екипата на „Sneak Media“, кои снимаат и со најпознатите тамошни ѕвезди. Покрај Огнен, во спотот се појавува и познатиот српски модел Андреа Милутиновиќ, која одлично ја заврши својата задача. Она што е важно да се спомене, е тоа што Огнен не застанува тука, тој веќе со својата екипа од соработници размислуваат и за новата песна и новите проекти, а до тогаш него ќе може да го видите и слушнете на настапите ширум нашата земја. Како звучи и изгледа неговиот музички „Порок“, проследете во продолжение:

Откако видеото за макфестовскиот настап го најавуваше со „жешки сцени“, Кристина Димитри „блискоста“ со Љуба Перуќица во спотот мораше „да ја објаснува“ во српските медиуми ( ФОТО)

Антонио Димитриевски — Wed, 25 Oct 2023 09:37:56 +0000

Македонската екс мисица, сега естрана пејачка Кристина Димитри за потребите на својот макфестовски настап во дует со српскиот пејач Љуба Перуќица, сними видео кое изобилува со жешки сцени. Блискоста меѓу атрактивната тетовка и српскиот фолкер во скокотливите кадри беше евидентна, па многумина веднаш се посомневаа дека тука се работи за нешто повеќе од само „професионална провокација за дразнење на јавноста“, односно само фрлена јадица на која публиката треба да загриза на песната „Посилна“. Иако Перуќица е во брак со ултразгодната и атрактивна екс ТВ водителка Катарина Колозеус, со која секој ден чекаат да го добијат првото дете, уште со првите фотографии од снимањето на спотот за песната „Посилна“ кои се појавија на социјалните мрежи, веднаш наидоа на бурни реакции. Пред премиерата на спотот за оваа песна беше претставен и „тизер“ на кој како и на објавените фотографии тие двајца изгледаат како заљубен пар. За неколку секунди беа претставени најжешките сцени од Кристина и Љуба, а пред премиерата ова видео веќе предизвика возбуда на работ на афера, која по макфестовскиот настап дури и кулминираше со написи во одердени медиуми дека дека жена му само што не се породила, а Љуба Перуќица веќе се разведува?! Така, откако видеото за макфестовскиот настап го најавуваше со „жешки сцени“, Кристина Димитри „блискоста“ со Љуба Перуќица во спотот мораше „да ја објаснува“ и во српските медиуми. Особено што Љуба е познат по тоа дека “тешко може да се воздржи“ кога има атрактивна и секси жена покрај себе, та било тоа и на снимање, како што беше случајот сво видеото за неговата песна „Еротична“... До душа, таму партнерка му е неговата сопруга Катарина, па... Ама, сеедно! Новинарите ја контактирале Кристина бидејќи сакале да проверат што мисли, дали сопругата на пејачот Катарина ќе биде љубоморна кога ќе види што снимале Љуба и таа. „Беше прекрасно на снимањето. Имаше позитивна енергија од тимот што го направи видеото, а Љуба е многу смешен и позитивен лудак“ - изјави Кристина, а потоа се осврна на наводниот можен развод. „Ми беше чест да соработувам со Љуба, кој е еден од најдобрите вокали на овие простори. А неговата сопруга, која е убава и харизматична, знае што значи шоубиз. Па секако нема да има развод“- низ насмевка прокоментирала атрактивната македонска пејачка. Но тоа како да не било доволно, па оние кои баш и не и поверувале отишле чекор понатаму и се обратиле кај бремената Катарина за да ја слушнат и нејзината вистина: „По снимањето на спотот со Кристина тргна приказната за разводот, бидејќи се зборуваше дека биле премногу блиски, но морам сите да ги разочарам, од тоа нема ништо. Hе го пуштам јас така лесно. Шегата на страна, мене мие тоа сосема во ред, а морам да откријам дека и јас самата сум делумно 'виновна' за нивниот дует. Кога Кристина го повика да и гостува во песната, веднаш му реков да се согласи, ја видов претходно кај Амиџиќ и ми изгледаше дека е добра 'риба', што ќе му фали? Сакам кога нешто снима да е опкружен со со убави и атрактивни девојки, тоа секако поубаво изгледа, а и мене ме мотивира да не се запуштам како поедини жени, кога ќе се омажат за саканиот маж. Вака знам дека секогаш некоја се мота околу него, па морам и јас малку да се трудам“ - одговорила бремената Катарина, сопругата на Љуба Перуќица која навистина излегла „посилна“ од аферите и аферџи(к)ите кои се обидоа да и го растурат бракот.

View this post on Instagram

A post shared by KRISTINA DIMITRY (@kristina.dimitry)

А нашата убавица? Има нова музичка порака... Еротска: „Ми го е*а денот!“ - е насловот. И одново Кристина Димитри ја најавува со... спуштени панталони!

View this post on Instagram

A post shared by KRISTINA DIMITRY (@kristina.dimitry)

Фото: Инстаграм/kristina.dimitry/katarina_kolozeus

Македонската традиција вткаена во фестивалот: Бојана Скендеровски како „Дилбер Стана“ – на „Макфест 2023“ носеше креација инспирирана од романот на Стале Попов (ФОТО)

Антонио Димитриевски — Tue, 24 Oct 2023 07:39:04 +0000

Годинешното 38. фестивалско издание на „Макфест 2023“ не помина без двократниот победник на единствениот фестивал на забавна музика кај нас - Бојана Скендеровски, која на сцената ја донесе одличната тема „Да те немам“. Станува збор за брза, клубска песна чии аранжман и музика ги потпишува самата, додека текстот е дело на Робин Зимбаков. Песната е во малку поинаков стил, но некако сакав на мојата публика да ѝ приредам мало освежување, а воедно сакав да донесам и нешто ново и поразлично и во мојот репертоар“, вели Бојана и открива дека нема да застане тука. Веќе наголемо, вели, се работи на нови песни, се размислува за дует, солистички концерт, а, секако, тука е и проектот „Македонијо во срце те носиме“ кој продолжува напролет. Освен што на сцената донесе стилски поразлична песна, Бојана се потруди и комплетниот настап и појавувањето да биде уникатно и впечатливо. „За мојот изглед овој пат беше задолжена Ивана Кнез, која инспирацијата за креацијата ја најде во приказната од романот „Дилбер Стана“ на Стале Попов – девојка заробена во прекрасна гардероба и сопствени соништа во копнеж и мечта по љубов. Бисерите како заштитен знак на Ивана Кнез симболизираат моќ за трансформација на негативното во позитивно, кога од проблем се создава волшепство исто како што школката од зрно песок го создава бисерот. Со вера, надеж и љубов, од жена за жени...“ - раскажува Бојана и вели дека и таа како во приказната за бисерот ќе се труди и понатаму да создава волшебства. Бојана е двоен победник на Макфест – прв пат во 2003. година кога ја отпеа темата „Немам одбрана“ и втор пат во 2015 г. кога триумфираше со „Диви цветови“. Уживајте во „Да те немам“ и бидете подготвени за новитетите што следуваат од Бојана: Фото: VoStip.mk

Ѕвезден сјај збогатен со свежа музичка надеж на втората ревијална вечер од 38-то издание на Макфест (Галерија)

Слободанка Илиева — Sun, 22 Oct 2023 08:24:51 +0000

Во сабота (21 октомври) се одржа втората ревијална вечер од 38-то издание на фестивалот на забавни мелодии „Макфест 2023“. Во домот на културата „Ацо Шопов“ настапија 13 афирмирани македонски музички имиња, на кои им се придружија и петте кои со гласовите на публиката и жирито беа избрани за најдобри од првата фестивалска вечер. Со настапот на познатите македонски музички имиња на макфестовската сцена, фестивалот дополнително го доби ѕвездениот сјај кој го имаше некогаш, па ова издание беше пример дека престижот да се настапува на „Макфест“ се врати назад, што за следните изданија поставии поголеми очекувања кога се настапите на најголемите македонски ѕвезди на фестивалот во прашање. Вечерта започна со настапот на петмината изведувачи, односно младите надежни имиња чии песни и настапи се издвоија претходно, во првата макфестовска вечер. Александра Трајческа, Blue, Драгана Јовановска, Јасмин Алиевски и Тијана Периќ беа имињата кои ја имаа привилегијата по вторпат да ги отпеат своите песни. По нив следеа најавените и веќе очекувани музички имиња, секој со песни во својот препознатлив фазон, делумно со шмек на новото модерно музичко време. Владо Јаневски, Андријана Јаневска, Таско и Магдалена, Панче Касапски, Ламбе Алабаковски и Полина, Симона Поповска, Огнен Здравковски, Марија Спасовска, Бојана Скендеровски, Александар Тарабунов, групата „Љубојна“, Зоран Илиев и Боно и Давид Миладинов... Сите буквално блескаа на макфестовската сцена, вдахновувајќи му нова душа на фестивалот. И сето тоа збогатено со специјалната визуелизација на сцената преку видеоскриновите на кои течеше видео приказна, специјално подготвена за секоја песна, која соодветствува со нејзиниот жанр, ритам и приказната во стиховите. Нешто што досега никогаш не се случило и не беше видено, давајќу ми на „Макфест“ уште една дополнителна содржина која ги следи тековите на новото време. Повеќето од пејачите како искусни или победници од изминатите изданија, макфестовската сцена ја чувствуваа како своја, а таа енергија пулсираше во секој од настапите, што публиката и тоа како знаеше да го почувствува, возвраќајќи го својот фидбек кон изведувачите со аплаузи и овации. Вечерта како изненадување во вид на најава на пејачите, покрај водителската двојка Марјана Станојковска - Димитар Атансовски имаше и неколку специјални презентери, а највпечатливо од сите беше појавувањето на Вера Јанковиќ, која години наназад беше заштитно водителско лице на фестивалот. На сцената застанаа и Миро Кацаров кој ги поздрави своите сограѓани штипјани, а до него беше и Светлана Црнокрак. Пејачите секогаш знаат да кажат дека дружењето е најважното од фестивалите, а овој пат тоа беше во комплетна смисла, бидејќи наградите беа изоставени, зашто заложбите на организаторот и уметничкиот совет на фестивалот се новата концепција на „Макфест“ да донесе што повеќе хитови и песни што ќе останат, без да ги оптоварува изведувачите со трка по награди. Единствена парична награда од 120 илјади денари беше доделена на Лара и Пајак за „Бела“ како најслушана песна меѓу две изданија на фестивалот со импресивни 27 милиони прегледи на Јутјуб. Се' на се“, годинешниот „Макфест 2023“ донесе нов ветер и нова енергија, вбризга свежа крв, направи квалитативен апдејт на лани започнатото, како надградба на она што некогаш било и останало музичка историја и ова што денешното време и модерните текови го бараат. Вистинска музичка фешта, ревија на хитови и парада на големи ѕвезди, како и оние кои допрва се раѓаат, чии настапи и песни ветуваат нова иднина за македонската музичка сцена. Нивното вртење во радио и ТВ етерот и присуството во медиумите во текот на годината, меѓу две фестивалски изданија, тоа допрва треба и да го потврди. Конечно и од виденото и прикажаното во двете фестивалски вечери, доволно може да се заклучи дека тимот што работеше и го правеше музичкиот избор, уметничкиот директор Роберт Саздов и членот на Уметничкиот совет Јован Јованов, направиле вистински погодок во желбата да ја спојат традицијата и денешнината, шлагерот и (т)рапот, поп музиката и фестивалската балада... Да направат совршен баланс на различни музички правци и жанрови, заено сите модерно спакувани во едно одлично фестивалско издание. Беспрекорната фестивалска организација на општина Штип на чело со градоначалникот Иван Јорданов и главниот координатор на фестивалот Александар Арсовски, како и целокупната екипа која работела на подготовките, се само уште една потврда дека кога се има желба и знаење и со сопствени сили и финансии може да се организира повеќе од добар фестивалски спектакл. Тоа го потврди и огромниот интерес на македонските медиуми кои беа бројни и масовно присутни при комплетното следење на фестивалот уште од самите негови подготовки до последната отпеана нота како никогаш досега во последните години, што е само некаква „јаготка на шлагот“ и потврда дека добриот ПР и маркетинг се влог кој повеќекратно носи добивка за сите... Најмногу за македонската публика и јавноста воопшто, која е желна за добра македонска музика, хитови, забава, дружење... А на годинешниов Макфест 2023 сето ова го имаше во изобилство! Во продолжение погледнете ја фото галеријата од втората вечер на Макфест 2023: фото: Vo Stip.мк принтскрин/ Приватна архива

Започна музичката симфонија за цела Македонија: Нови надежни имиња и модерна музика од првата вечер на 38-то издание на „Макфест“ (фото)

Слободанка Илиева — Sat, 21 Oct 2023 06:58:06 +0000

Вчеравечер, петок (20 октомври) се одржа првата вечер од 38-то издание на фестивалот на забавни мелодии „Макфест 2023“. Во домот на културата „Ацо Шопов“ настапија 13 помалку афирмирани македонски музички имиња, но доволно атрактивни со модерни песни кои оставија впечаток на прво слушање. Вечерта со хип-хоп танц на макфестовски песни ја започнаа водителите Марјана Станојковска и Димитар Атанасовски. По неколку композиции во блок се претставија предвидените нови песни и изведувачи за вечерта, по што беше најавено дека петте кои ќе ја добијат довербата од гласовите на жирито и публиката во салата, ќе го надополнат списокот со учество и во втората фестивалска вечер, закажана за в сабота, односно денес (21 октомври). На официјалната Инстаграм страница на фестивалот денес се објавени и петте избрани кои ќе се помешаат со веќе добро познатите популарни македонски музички имиња. Во најдобрата петорка се најдоа: -Александра Трајческа, Blue, Драгана Јовановска, Јасмин Алиевски и Тијана Периќ. Во ревијалниот дел пред крајот на вечерта настапија Силви Бенд и Лидија Коовска кои со изборот на добро познати македонски евергрини ја распеаја публиката, а сигурно и гледачите пред ТВ еканите кои го следеа директниот пренос на МРТ. Втората фестивалска вечер е резервирана за попознатите македонски музички имиња, меѓу кои и неколку од најголемите наши поп ѕвезди, кои годинава ќе настапуваат на „Макфест“. На неа покрај 13-те проверените пејачи и групи, ќе ги видиме и споменатите избрани од првата фестивалска вечер, што значи на сцената ќе се појават вкупно 18 изведувачи. Оваа вечер и годинава како и лани има ревијален карактер, што значи нема да има гласање и да се доделуваат награди за прво, второ, трето... место, зашто заложбите на организаторот и уметничкиот на фестивалот се новата концепција на „Макфест“ да донесе што повеќе хитови и песни што ќе останат, без да ги оптоварува изведувачите со трка по награди. фото: Инстаграм принтскрин

Со кревањето на фестивалското знаме започна „Макфест“

Слободанка Илиева — Fri, 20 Oct 2023 13:24:56 +0000

Со познатите песни, кои се македонски и балкански евергрини претпладнево се крена фестивалското знаме, започна фестивалот „Макфест“. Градоначалникот на Општина Штип, Иван Јорданов, Пајак и Лара (кои според публиката е насјлушаната песна „Бела“ во текот на годината), официјално го кренаа знамето на Макфест, кај хотелот „Оаза“ во Штип. Вечерва и утревечер во салата на Центарот за култура „Ацо Шопов“ во Штип ќе се испеат вкупно 26 забавни песни, од кои публиката вечерва ќе слушне 13, а пет од нив ќе влезат во втората фестивалска вечер. Александар Арсовски, организатор на „Макфест“ од Општина Штип вели дека вечерва во ревијалниот дел ќе настапат „Силви бенд“ и Лидија Кочовска. -На втората фестивалска вечер ќе имааме вкупно 18 композиции. Петте песни од првата фестивалска вечер ќе бидат избрани по пат на гласање од страна на публика во салата и од струлното жири кое ќе брои седум членови, вели Арсовски. Уметничкиот директор на Фестивалот на забавни мелодии „Макфест“, Роберт Саздов вели дека годинава има одлични песни, а на сцената имаат и млади изведувачи, но и искусни кои веќе настапувале на фестивалот, а нивните песни се и хитови. -Имаме музика од сите жанрови, ќе биде одлично. Тоа ви го ветувам, ќе бидете сите пријатно изненадени. Навистина, јас и Јован Јованов ја направивме селекцијата, ги контактиравме пејачите и оваа година очекувам дека ќе го надминеме минатогодишното издание. Има една изрека „Следи го својот сон, а не конкуренцијата“. Така што, ние имаме одредена визија, вели Саздов. Песната „Бела“ во изведба на Пајак и Лара е најслушана во текот на годината, од кои само на еден канал имаат 27 милиони прегледи. Пајак и Лара на денешната прес-конференција истакнаа дека се горди што имаат хит и тоа на балканско ниво. -Навистина ни е огромна честа што ќе ја примиме наградата за најслушана песна. „Бела“ е песна којашто навистина стана хит во Македонија и пошироко на Балканот. Благодарни сме што цела Македонија ни беше поддршка, дека македонскиот јазик се слуша и надвор. Тоа е многу добро што со една песна ја проширивме нашата музика, велат Лара и Пајак. Градоначалникот на Општина Штип, Иван Јорданов истакна дека годинава Фестивалот на забавни мелодии „Макфест“ чини околу шест милиони денари. Средствата се од буџетот на Општина Штип, но помагаат и општествено одговорни компании. -Втора година по ред и покрај тоа што не добиваме поддршка, како локална самоуправа од Министерството за култура, не дозволуваме овој фестивал да згасне, туку напротив, се трудиме да создадеме нови вредности, вели Јорданов. Фестивалот на забавни мелодии „Макфест“ почнува вечерва во 20:15 часот, директен пренос ќе има на МТВ, а водители оваа година се шармантните и забавни Маријана Стојановска и Димитар Атанасовски.

„Урбан ФМ“ – генерален покровител и медиумски поддржувач на „Макфест“: “Урбан ФМ е радио за млади, убави и ‘будали’ во душата… останатите и остарените слободно можат да сменат станица”

Антонио Димитриевски — Fri, 20 Oct 2023 06:30:58 +0000

1. Урбан ФМ покрај новата сопственичка структура однеодамна и музички и содржински се ребрендираше... Што ја наметна потребата од менување на дотогашната концепција? - Секоја промена неминовно и по дефиниција носи нешто ново со себе, а во случајот на Урбан ФМ ,тоа се рефлектираше како во програмската содржина и музичката уредничка политика, така и во кадровското проширување на тимот, просторно проширување со ново радиско и подкаст hey студио и технолошко и просторно модернизирање, трансформирајки се во она што би требало да претставува модерно радио кое го прати времето, како прво радио во Македонија кое се издигнува и програмски и технолошки и содржински на нивото на водечките светски радио станици. 2. Зошто токму изборот падна да се емитува македонска музика во изобилство, многу повеќе од останатата конкуренција: потребата за поразличност од останатите, видовте можност и празен простор кој може да се освои и пополни во радиоетерот или националното чувство и патриотскиот дух за зачувување на сопствената музика и музичконаледство, јазикот, културата... преовладаа?

-Одговорот би бил веројатно комбинација од двете влијанија, дополнето со чувството дека останатите медуими целосно ја запоставија својата законска обврска и улога во исполнувањето на јавниот интерес за промоција и развој на домашната култура и уметност ,вклучително и домашната музика која би требало да биде основна компонента на секоја медиумска програма. Урбан ФМ ќе се обиде низ својата програма да ги врати нештата во некоја нормална состојба, од онаа изместена реалност и улога во која останатите радиодифузери намерно или ненамерно застранија.

3. Колку е проблем да се дојде до музички материјал со постарите македонски евергрини, песни, хитови... а колку со она што денешните „нови деца“ го работат и издавбаат како песна, албум, носач на звук? -Воопшто не е тешко да се дојде и до постарата продукција, како и до поновата и да се каже дека е тешко би било само изговор. Во денешното време на технологија ако се сака и работи, има начини да се наполни солидна дури и целосна антолигиска база со македонска музика,а артистите од сите периоди на творење,со задоволство соработуваат и испраќаат своја музика во Урбан ФМ, препознавајќи ја и подржувајќи ја нашата мисија. 4. Каде во моментов се позиционирате себеси како медиум меѓу скопските и радиостаниците во Македонија воопшто и какви се плановите за што подобро место во радиооетерот, а со самото тоа и поголема слушаност и блискост до слушателите? -Имаме кристално чиста визија околу тоа,а тоа е деха Урбан ФМ е единствениот радиодифузер во моментов наменет за младата публика. Тргнувајќи од премисата и реалноста дека сите останати медиуми се остарени како по сопственичка структура, така и по кадровската структура и содржинско - технолошки и уредувачка и музичка програма застанати во некој минат век и времиња, Урбан ФМ создава млада програма, со млади луѓе и модерна технологија и со доминантно млада македонска и светска музика и содржини наменети исклучиво за младата публика, како и повозрасната публика која музички и духувно младо се чувствува во душата. Односно како што гласи нашето мото кое допрва ќе го комуницираме со јавноста: “Урбан ФМ е радио за млади, убави и “будали” во душата… останатите и остарените слободно можат да сменат станица”! 5. Како гледате на сите превирања во ЗАМП и каква е вашата соработка со оние кои треба да ги штитат правата на авторите, но и да бидат кооперативни соелектронските медиуми? -Од аспект на медиум, не е наше да ги коментираме превирањата и аферите околу состојбите со поделбата на средствата помеѓу авторите и тоа останува да го решаваат меѓусебно членовите на ЗАМП. Нас како медуими ниту не засега, ниту имаме легална основа да одлучуваме околу тоа. Медуимите, сите радио и ТВ станици, преку софтверот кој треба да ги доставува сите податоци за користена музика до ЗАМП, би требало да бидат базата на информации по која би требало автоматски да ги респредулуваат средствата собрани само од радиодифузерите, зависно од тоа чија мизика колку е користена. Зошто тој софтвер намерно и целосно не е ставен во функција и зошто средствата од сите медиуми, хорека сегментот и сите музички настани, се' уште се дели по рачно доставени листи од само еден радиодифузер, е прашање на кое треба да одговорат од ЗАМП? Она што ЗАМП во последниве години негативно започна да делува врз медиумите е еден премолчен факт кој тивко незаконски започна да се одвива во сенка, а тоа е дека некој во ЗАМП се досетил незаконски да наплаќа “радиодифузна такса” од трговски субјекти кои пуштаат радио на своите работни места и услужно продажни локации, подметнувајќи им го слушањето радио како користење на “фонограми со авторска музика од членови на ЗАМП”. И тоа испраќајки неовластени квази “инспектори” - инаку обични музички и правно необразувани луѓе за паушален надоместок од ЗАМП, да пополнуваат некакви фиктивни записници за користење “фонограми” од страна на трговски продажни места, преку кои со асистенција на една адвокатска канцеларија и подобни судии, носат извршни решенија за присилна наплата за слушање радио од бензински пумпи, трговски и услужни субјекти, директно плашејќи ги дека слишањето радио треба да се плаќа во ЗАМП. Ограничувајки ја слободата на медиумите и ставајки се над Уставот и законите кои пред десетина години ја укинаа радиодифузната такса во Македонија. Дополнително во ЗАМП не членуваат фонограмски продуценти ниту изведувачи на кои им следува надоместок за користење фонограм, согласно Законот за авторски и сродни права, па самата дубиоза станува поголема и понелогична во чие име ЗАМП ја злоупотребува оваа материја. Тоа е сериозен проблем за нас како радија,а сериозен проблем на измама за незаконско извлекување средства од стопанството од преку 70.000 трговски друштва во Македонија од страна на некој во ЗАМП, кој измислил непостоечки основ да собира средства и да го ограничува уставно загарантираното право на слобода на медиумите, меѓу кое и слушање радио програма. Ние како радија плаќаме во ЗАМП за користењето музика и никој нема право да го ограничува или наплаќа двојно и од било кого што ја слуша нашата програма. Во оваа прилика љубезно би ги замолиле да ни го остават слушателита на мира, да им понудиме правна помош да ги средат незаконските правилници за наплата кои можеби ги наследиле од некоја поранешна гарнитури, како и да гостуваат во нашата програма и да ја објаснат таквата ситуација. 6. Стариот хит „Video killed the radio star“ своевремено му претскажуваше брзо згаснување на радиото, кое сепак и покрај тоа опстана. Колку сега новите технологии, видоплатформи, Интернет канали , социјалните мрежи ве плашат и ви се сериозна конкуренција или пак истите ги ползувате за што подобро, побргу и поблиску да допрете до вашите слушатели? -Никој и ништо и никогаш нема да може да го уништи или замени радиото и тоа однови ке се јавува во нова форма и со нова сила и улога.Новите технологии и социјални мрежи отварат бескрајнни можности за еволуција и напредок на радијата и зајакнување на нивната улога во општеството. Урбан ФМ од 1-ви ноември започнува со 12 радио подкаст емисии кои ке ги водат млади музичари и уметници, кои публиката ќе може да ги слуша на нашата фреквенција,но ќе може и да ги гледа во живо на социјалните мрежи во вид на видео подкаст и тоа не само во МК туку во целиот свет, како радио кое е достапно на онлајн радиските платформи и социјални мрежи на секоја точка на планетата каде има пристоен интернет. Урбан ФМ веќе ги надмина границите и досегот на фрекфенцијата и не е повеќе регионално радио,туку светски радио дифузер,токму благодарение на новите социјални трендови и технологии. 7. Урбан ФМ како поддржувач на македонската музика годинава е е и генерален поддржувач и спонзор на најугледниот македонски фестивал на забавна музика – Макфест 2023 во Штип. Во што ќе се огледа, во кои се сегменти, вашата поддршка и соработка со фестивалот? -Макфест би требало да биде еден од столбовите за развој на македонската музика и ние во Урбан ФМ ја имаме истата мисија,така што соработката е природно условена и наметната.Со овој чекор сакавме да го поздравиме започнатиот процес на ослободување и реформирање на Макфест, финансиски да го поддржиме за што подобра организација и заеднички да го направиме актуелен и достапен Фестивалот до што поширока публика со заедничка маркетинг поддршка, со директен пренос и отворено студио од Штип на програмата на Урбан ФМ.

Веруваме дека е дојдено време кога сите треба да почнеме да вложуваме во развојот на македонската музика,наместо само да грабаме од неа, како што досега беше пракса.

8. Како генерални поддржувачи на Макфест 2023 што очекувате годинешното фестивалско издание да понуди? -Почит кон вложувањата,очекувањата и достоинството на артистите на сцената, авторите зад сцената и кон публиката пред екраните и радио предавателите. Ништо помалку од тоа.

Робин Зимбаков во име на „Урбан ФМ“

Мартинијан Кириловски добро знае дека кармата наплаќа се’, секоја грешка и грев во – „Крал и слуга“ (ВИДЕО)

Антонио Димитриевски — Tue, 01 Nov 2022 12:06:31 +0000

Мартинијан Кириловски го објави видеозаписот за својата најнова песна „Крал и слуга“. Прекрасната мелодија ја слушнавме на годинешниот Макфест, а сега можеме да уживаме и во видеото. Во него освен пејачот се појавува моделот, шармантната и заводлива Тамара Николовска. Режијата на видеото ја потпишува Марко Јовановски, а зад видеопроектот стои филмското студио „Aperture Productions“. Музиката и аранжманот се дело на Иле Спасев, кој ја снимил песната и ги изработил и миксот и мастерингот, додека а зад текстот се потпишува познатиот Тајзи. Спотот е објавен на каналот на Гранд продукција, откако Мартинијан потпиша договор со нив, по големиот успех кој го постигна при учеството во нивното регионално, музичко, талент шоу натпреварување, „Ѕвездите на Гранд“. Како звучи и изгледа макфестовската љубовна приказна на Мартинијан Кириловски во која тој е „Крал и слуга“, проследете во видеото во продолжение (КЛИКНИ ТУКА):

Пајак и Лара во дует пејат за секојдневието на еден вљубен пар и нивниот љубовен пат во – “Bella” (ВИДЕО)

Антонио Димитриевски — Thu, 27 Oct 2022 09:48:12 +0000

На штотуку завршениот “Макфест 2022”, едни од учесниците кои се појавија на фестивалската сцена беа и младите пејачки имиња, траперот Пајак и пејачката Лара Иванова кои заедно во дует со својата изведба ја промовираа нивната најнова песна која веруваат дека ќе биде голем хит. “Bella” е насловот на песната, а за неа се погрижија Христијан Настески – Пајак кој ги напишал музиката и текстот, додека пак аранжманот, миксот и мастерингот ги изработил Иван Јованов – Iwayo. За оваа песна уште пред стартот на фестивалот од страна на Урбан Рекордс беше снимен видео спот кој веднаш по макфестовската изведба беше промовиран на нивниот YouTube канал. Инаку Лара Иванова, го привлече вниманието на јавноста со музичките песни; „Ремек Дело“, „Некогаш ќе помине“, „Цвеќе на тагата“, „Душа“... Додека Пајак веќе долго време соработува со познатата продукција „Urban Records“, а неговите хитови „Ноќва“, „Срце“, „Проблем“ и многу други, имаат милионски број прегледи, што го потврдува дека овој млад пејач го очекува уште поуспешна кариера. Песната зборува за секојдневието на еден вљубен пар и за сите авантури што им се случуваат на нивниот љубовен пат. „Тоа, тоа, тоа што го правиш намерно, тоа, тоа јас по тебе трагам упорно...“, пеат Лара и Пајак, а вие во продолжение погледнете за што станува збор и како сето тоа изгледа во видеото (КЛИКНИ ТУКА):

Тамара на „Макфест“ пееше за за сите кои треба да продолжат напред, исправени пред нови животни предизвици во – „Замижи“ (ВИДЕО)

Антонио Димитриевски — Wed, 26 Oct 2022 09:01:43 +0000

Во рамки на 37-то издание на „Макфест“, во Штип, Тамара Тодевска ја промовираше својата нова песна насловена како „Замижи“. Станува збор за музичка приказна, чиј текст е напишан од Игор Џамбазов, а музиката и аранжманот се на Роберт Билбилов. На втората, ревијална вечер, во Домот на култура „Ацо Шопов“, Тамара го претстави нејзиниот нов сингл по нешто повеќе од една година. „На „Макфест“ ја започнав својата кариера, во далечната 91' со Маријана и Росана. Победивме со Врчак, со „Седмо небо“, а после следуваа: „Немирна“, „Готово е“, „Тажна љубов, среќна песна“... Знам дека и „Замижи“ ќе биде дел од низата на успешни музички приказни. Штип, фала Ви од срце, но фала и на сите кои ми праќате пораки за новата песна. Ве сакам!“ - сподели Тамара на својот Инстаграм претставувајќи ја песната чие аудио можете да го слушнете ако (КЛИКНЕТЕ ТУКА). „Станува збор за една нова музичка приказна која особено ми е драга и некако одма ми легна при срце. Се мислев за моментот кога да ја објавиме „Замижи“, но среќна сум што тоа го сторив токму на „Макфест“. Затоа што сакам да дадам поддршка на овој фестивал – меѓу единствените кој сѐ уште овозможува афирмација на македонската музика и на домашните изведувачи. „Замижи“ е за сите кои треба да продолжат напред, кои можеби жалат за минатото, за изгубеното, за одредени моменти, но сега се исправени пред нови животни предизвици. Убав е овој живот и вреди да се бориме“, вели Тамара за својата нова песна. Тодевска го истакна и своето задоволство од соработката со Џамбазов и Билбилов, кои се децениски нејзини соработници и пријатели. „Со Џамбаз и Роберт веќе исто „дишеме“ и одлично се согласуваме. Го знаат мојот вкус, енергија, стил и кога нешто добро функционира не би го менувала“, истакна Тамара, канејќи ги сите уште еднаш убаво да ја преслушаат „Замижи“ и погледнат премиерната промоција на нејзиниот макфестовски настап во видеото во продолжение(КЛИКНИ ТУКА): Фото и видео: Јутјуб и Инстаграм принтскрин/tamaratodevska