Овој петок, 23-ти февруари 2024 во Градска кафеана Пелистер, од 11.45 до 12.45 часот Croatia Records Makedonija Ве поканува на пладневно матине со Јурица Паѓен, фронтмен на легендарниот загребски состав „Аеродром“ и некогашен повремен член на култната „Азра“ на Џони Штулиќ.

На средба со новинарите ќе бидат претставени двете актуелни изданија на Јура и „Аеродром“, објавени под етикета на Croatia Records – студискиот албум „Дневни ритуали“ и колекција хитови „Greatest Hits Collection“.

Јурица Паѓен на музичката сцена е повеќе од 50 години. Членувал во „Група 220“, „Парни ваљак“, „Азра“..., бил дел од „Севдах шатл бенд“ на Џони Штулиќ, снимил неколку соло-албуми, соработувал со многу музичари од регионот..., но главниот дел од кариерата и го посветил на групата „Аеродром“. Ги паметиме хитовите – „Фратело“, „Обична љубавна пјесма“, „Дигни ме високо“, „Стави праву ствар на право мјесто“, „Што си у каву ставила“...

Голем пријател на групата „Леб и сол“, уште од осумдесеттите, кога служел војска во Скопје, Паѓен ќе не потсети на убавите времиња во градот во кој го поминал дел од својот живот, а на 24-ти февруари во сабота ќе настапи на концертниот спектакл „Памтим само сретне дане“ во Македонска филхармонија.

Битолскиот состав „CODE 369“ викендов настапи во Славонски Брод, во рамките на традиционалниот Славонија фест – CMC 200.

На градската тврдина Брод тие во живо го промовираа својот деби-албум „Stages of Love“, објавен под закрилата на најголемата регионална издавачка куќа „Кроација Рекордс“,

Пред фестивалот, на конференција за медиумите, заедно со уште неколку регионални состави, тие пред новинарите дојдени за фестивалот го представија своето првенче.

Албумот „Stages of Love“ содржи дванаесет песни, и тоа е првиот албум што го создадоа и снимија под името „CODE 369“ (КОД 369). Нивната музичка мисла е секогаш на границата помеѓу алтернативниот рок и комерцијалната рок и поп музиката, задржувајќи ја свежината, слободата и авангардни идеи на првите категории и прифатливоста на другата.

Во нивните текстови може да се препознаат универзалните човечки и литературни вредности, љубовта како движечка сила и силата на поединецот како движечка сила кон најдоброто во себе – порачуваат од „Кроација Рекордс“.

„CODE 369“ е македонски бенд од Битола, формиран во 2020 година. Тие се продолжение на долгогодишната музичка дејност на членовите на „Памперс“: Ирена Димовска (вокал), Даниел Митревски (гитара, придружни вокали) и Иле Лулевски (тапани, придружни вокали).

Во музиката на „CODE 369“ се внесени нови музички моменти на фанк, џез и класични инструментализации, кои проткајуваат во препознатливата рок-основа и влијанија на современата музика во домен на поп и рок.

„Добиваме навистина убави реакции од публиката за нашите песни, тие го сакаат тоа што го компонираме и нашата музика ја прифатија како своја. Уживаат да не слушаат и тоа е нашата омилена награда“, изјавува пејачката на бендот, Ирена Димовска.

Летово, пред сите овие случувања, „CODE 369“ потпиша петгодишен ексклузивен издавачки договор со „Кроација Рекордс“. На нивната работна посета во Загреб тие го снимија и првиот сингл на хрватски јазик, со наслов „Права љубав“.

Кинотека на Република Македонија во соработка со „Croatia Records“, најголемата дискографска куќа во регионот, за сите кои во месец јули ќе бидат во Скопје, подготвуваат интересна музичка програма, како освежување за летните горештини. Имено, додека животот по пандемијата полека се враќа во нормала, и додека се чекаат големите музички случувања „во живо“, Кинотека и „Croatia Records“ од 1 јули, па секој следен четврток во седмиот месец тековната година, на летната сцена на Кинотека, во летното кино „Мирно лето“, ќе прикажат по еден концерт од богатата BLU RAY програма на дискографскиот гигант, кои, според сензибилитетот одговараат на местото и на времето. Така, според распоредот, на 1 јули ќе биде емитуван концертот на Влатко Стефановски – Live at Lisinski, од 17 април 2018 г., кога во Загреб беше промовиран неговиот албум „Мајчин јазик“. Таа волшебна вечер гостите на Влатко беа Љубојна, Хојсак & Новосел и единствената Јосипа Лисац.

Токму Јосипа Лисац ќе биде главната ѕвезда на програмата „Концерти во Кинотека со Croatia Records“, веќе на 8 јули, кога ќе биде емитуван концертот Јосипа Лисац from Croatia Records Studio – „…ту у мојој души станујеш…“, кој големата дива му го посвети на нејзиниот легендарен сопруг Карло Метикош. Концертот беше реализиран во студиото на „Croatia Records“ во Загреб на 30 октомври 2018 година.

На 15 јули во Кинотека ќе биде емитуван концертот на Раде Шербеџија и неговиот Западни колодвор бенд, одржан во Хрватско народно казалиште во Загреб, а една недела подоцна – на 22. јули во програмата е впишан концертот на Амира Медуњанин во пулска Арена, снимен на 3 август 2018 г.

За самиот крај на зацртаната програма, на 29 јули ќе биде прикажан концертот на музичкиот волшебник J.R. August – Live in Hrvatski Glazbeni Zavod.

Станува збор за концерт на музичката сензација на годината во Хрватска, човекот кој освои три музички награди Порин, вклучувајќи ја и онаа за албум на годината, со што стана прв лауреат во Хрватска кој освои награда за најдобар албум, иако албумот не беше на хрватски, туку на англиски јазик.

На концертот во Hrvatski Glazbeni Zavod, кој ќе биде емитуван во Кинотека – J.R. August го промовира токму наградуваниот албум „Dangerous Waters“.

Сите концерти се снимени со врвна аудио и видео опрема, па гледање на истите претставува вистинско доживување за сите сетила, што овој пат ќе биде привилегија за македонската публика.

Сите детали врзани за Концерти во Кинотека… (тајминг за стартот, алтернативниот простор доколку заврне…), ќе бидат објавени дополнително.