коприва – Вистина.мк

Лажна гибаница со коприва и ориз: Сочен и раскошен фил, а совршена за постење (фото)

Слаѓана Атанасова — Mon, 27 Nov 2023 13:43:33 +0000

Наш предлог за овој викенд е да направите одлична посна пита за појадок или ручек која одлично го спојува вкусот на зелје, компири, ориз и коприва. Воопшто не е комплицирана, се подготвува како гибаница и се пече за само 20 минути.

Состојки:

кори за пита
зелје
коприви
2 компири
1 чаша ориз
2 млади кромидчиња
1/2 кесичка прашок за пециво

Подготовка:

Ставете го оризот да се свари, а на половина од готвењето додадете ги компирите исечени на ситни коцки, како и младиот кромид. Зелјето и копривата обарете ги, па процедете и исечкајте ги. Додадете ги во тенџерето со ориз. Истурете малку вода и варете додека оризот не е подготвен. Не претерувајте со вода. Зачинете со сол, бибер и додадете уште некој зачин по желба, па посипете со прашок за пециво.

На дното од тавата ставете две кори, следната стуткајте ја и потопете ја во смесата со ориз. Наредете ги во плех додека не остане само една и покријте сè со неа. Се пече во загреана рерна на 180°C околу 20 минути.

Извор: Попара.мк

Здрава супа од коприва: Брзо и лесно се прави, а помага при многу проблеми

Слаѓана Атанасова — Thu, 22 Dec 2022 12:24:41 +0000

Копривата е лековито растение кое расте речиси насекаде. Како што започнува нејзината сезона, искористете го максимумот и направете вкусни јадења. За да заштедите што е можно повеќе од нејзините хранливи материи, не треба долго да ја готвите, само малку пржете ја. Копривата го подобрува функционирањето на дигестивниот систем, го детоксицира организмот, добра е за чистење на крвта и бубрезите, позитивно влијае на панкреасот и помага во намалување на шеќерот во крвта… Ова се само дел од придобивките. Состојки: 300 грама коприва, 5 компири. Подготовка: Сварете ги компирите и кон крајот додадете ги копривите кои сте ги исчистиле. Оставете уште неколку минути, а потоа сè соединете со миксер или во блендер. Зачинете и декорирајте по желба. Извор: Извор.мк

Природен лек: Чај против опаѓање на косата

Слободанка Илиева — Mon, 31 Oct 2022 13:45:18 +0000

Копривата е една од најдобрите и најделотворните лековити билки. Целото растение е лековито, така што се користи и коренот, и листовите и семето. Копривата е богата со разни корисни состојки, калциум, фосфор, железо, витамин Ц, А, Б2 и К, каротин, пантотенска киселина и др. Копривата е најпозната како средство за прочистување на крвта и зголемување на бројот на црвените крвни зрнца. Во народната медицина се користи и за други цели како регулирање на нивото на шеќер во крвта, против заболувања на јетрата, слезинката и жолчката, против грчеви и чиреви на желудникот, за белодробни заболувања, за лечење на болести предизвикани од вирузи и бактерии и т.н. Копривата одлично делува на косата, го спречува нејзиното опаѓање и го поттикнува растот. Тинктурата од коприва посебно благотворно делува на секој тип на коса. Ако ја миете косата со чај од коприва, таа ќе биде убава и бујна, ќе го спречите паѓањето и прекумерното мрсење. 4 до 5 раце свежа или сува коприва се преливаат со 5 литра вода и се варат на тивок оган додека водата не зоврие. Се остава да стои 5 минути и потоа се користи за миење на косата. Ако се користи корен од коприва, една полна рака се остава да отстои во ладна вода преку ноќта, и наредниот ден се загрева на тивок оган додека водата не зоврие. Потоа се остава да отстои десетина минути, па се мие косата. Користете благ и квалитетен шампон и на крај убаво измијте ја косата со чајот од коприва. Исто така, одличен лек против опаѓање на косата ќе добиете и ако копривата ја смешате со жалфија и чичков корен. 25 г. коприва, 25 г. жалфија, 25 г. чичков корен се прелеваат со 3 литра вода и се варат додека водата не зоврие. Се остава да се излади, се прецедува и потоа се мие косата. Можеби најпознатиот лек од коприва против опаѓање на косата е тинктурата од коприва и алкохол, која навистина дава одлични резултати. Се подготвува едноставно: 100 грама корен од коприва убаво се мие и се става да отстои во 1 литар ракија или 70% алкохол 8 дена. Шишето ставете го на сонце. После тоа се прецедува во друго чисто шише се додаваат неколку капки рицинусово масло. Масирајте го коренот на косата секој втор ден. извор:попара.мк

Состојка која често се користи ја намалува плодноста кај мажите

Слаѓана Атанасова — Tue, 09 Aug 2022 12:47:52 +0000

Најново истражување покажува дека состојка која често се користи влијае на плодноста кај мажите, а поради тоа се размислува да се користи како контрацепција кај посилниот пол. -Голем дел од мажите сакаат и прифаќаат да ја преземат контролата над контрацепцијата, вели авторот на најновото истражување. Студијата на австралискиот Универзитет Монаш открила дека природната состојка го попречува функционирањето на спермата. Овие податоци се објавени во магазинот “Plos One”. -Во студијата при парење на глувци, екстракт лист коприва, 50 милиграми дневно ја намалила плодноста кај мажите за 53 проценти во споредба со мажите кои биле третирани само со етил алкохол, се вели во студијата. Според истата целта е да се пронајде природна алтернативна хормонска контрацепција и се чини дека билката која жари би можела да биде решение.

Многубројни добробити ви носи копривата

Христина Ѓоргиевска — Fri, 12 Jun 2020 12:00:06 +0000

Во ова растение има големо количество калциум, магнезиум, железо, калиум и витамин А и Ц. Тоа што е богата со железо, ја прави копривата соодветна за лечење на анемија и замор. Редовното пиење на чај од коприва ја смирува мускулната болка. Растението се користи и за проблеми со варењето на храната, подуен стомак и хемороиди. Билката во форма на капсули се користи за лекување на габична инфекција кај жените. Пиењето на чај од коприва го чисти телото од токсини, го намалува апетитот, што го прави идеално средство за слабеење. Консумацијата на чај од коприва и надворешната примена се користи и за кожата на главата и косата, придава сјај и волумен. Копривата помага и за поубав тен на кожата на лицето, како и при псориазис и екзема. Извор: Курир.мк