кокан димушевски – Вистина.мк

Жаклина Стевковска ќе ве потсети дека животот нема реприза и секој ден е – „Посебен ден“ (ВИДЕО)

Антонио Димитриевски — Fri, 08 Jul 2022 10:52:30 +0000

Македонската кантавторка и актерка, Жаклина Стевковска која повеќе од четири децении е активна на македонската музичка сцена, по пауза од една година се враќа со нова песна. Последното од неа го слушнавме во 2001-ва година на фестивалот на забавни мелодии „Макфест 2001“ каде настапи со песната „Мојот град“. Сега таа се враќа со драматичната балада „Посебен ден“, на која таа самата е автор на музиката и текстот, додека аранжманот го направил Кокан Димушевски - клавијатуристот на легендарните „Леб и сол“, а песната е снимена во студиото „До-Ре-Ми“. Музички исклучително зрела, аражмански беапрекорно спакувана, со моќни стихови кои длабоко емотивно допираат до душата, преиспитувајќи го сопственото его, стравовите и смислата на сопственото постоење и опстојување во двојка, во секој ден кој е важен и посебен. „Посебен ден“ е своеиевидна урбана беседа за љубовта која толку многу ја посакуваме, а толку себично или ја чуваме за себе или безсмислено ја расфрламе. По нејзината легендарна „Писма неотворени“, се чини дека ова е една од најсилните теми на Стевковска со која акустичарската кантавторка се преставува себе си и своето музичко творештво. Темата е визуелизирана со едноставно, но доволно добро видео кое ја пренесива силната порака вткаена во песната и нејзините стухови: „Чувајте се себеси, своите сакани и блиски секој ден, зашто животот нема реприза и... секој ден е посебен!“ Проследете ја во продолжение „Посебен ден“ на Жаклина Стевковска:

Ќе го препознаете ли ова дете, денес е македонска музичка легенда: „Кој се насмее ќе јаде ќотек!“ (ФОТО)

Антонио Димитриевски — Mon, 02 May 2022 07:20:29 +0000

Времето ги менува луѓето, годините сите не трансформираат во секој поглед... И како личности, но најмногу физички. Многумина не можете да ги препознаете како изгледале како деца или момчиња, или пак обратно - кога ќе ги видите нивните некогашни фотографии нема шанси да препознаете за кого се работи. Ова момче кое можеби некои и веднаш го препознаа, денес е вистинска македонска музичка легенда. Музичар, композитор, автор, клавијатурист или поточно мултиинструменталист... Долги години вработен во Музичко-касетната продукција на МРТВ, член и повремен диригент на Танцовиот оркестар, но најмногу познат по неговата кариера како еден од членовите на најголемата македонска џез/рок група на сите времиња - „Леб и сол“. Мајстор и виртуоз зад клавијатурите, композитор и аранжер, концерт мајстор автор на некои од култните композиции на бендот... Еден од најголемите и најпознатите македонски музичари на сите времиња, вистинска македонска музичка легенда. Или поедноставно кажано Кокан Коко Димушевски. Фотографијата која Коко ја споделил на својот Фејсбук датира од неговите училишни денови. Дотеран, стокмен, серизоен, вистинско примерно дете. Настрана што тој самиот „не си се бендисува“ или ептен се бендисува, па на сите што ќе се насмеат кога ќе налетаат на фотографијата им порачал: „Кој се насмее ќе јаде ќутек!“ Коментарите „фрштат“, а некои од најинтересните се како овие подолу, на пример: „Ко да те терале хармоника да вежбаш“; „Лепотан... Дотеран ко за на доктор“; „Мајсторе, оргинал главна ролја во Сиви Дом“... Кој знае дали после ова некој „ќе јаде ќутек“ или со задоволство ќе мези и пие од ликот од фотографијата?! Фото: Фејсбук принтскрин/Kokan Dimushevski

Некогашниот тапанар на „Леб и сол“ во канџите на короната бие битка за живот: „Држи се Драгољубе, мораш да победиш“ – му порача неговиот колега и пријател, Кокан Димушевски (ФОТО)

Антонио Димитриевски — Wed, 03 Mar 2021 08:21:14 +0000

Деновиве во сите медиуми во регионот одекна веста дека познатиот екс - ЈУ рок-музичар Драгољуб Ѓуричиќ е пренесен на интензивна нега во болницата „Драгиша Мишовиќ“ во Белград. Тој бил префрлен во болница по дијагностицирањето на Ковид-19, јавуваат медиумите. Некогашниот тапанар на „Леб и сол“ со денови имал висока температура од 39 степени, а дури пет дена подоцна решил да побара лекарска помош. Познатиот музичар свиреше во “ЈУ група“, „Леб и сол“, „Кербер“, со Ѓорѓе Балашевиќ и Здравко Чолиќ, а соработувал и со речиси сите најпознати изведувачи и музичари во некогашна Југославија. Со „Леб и сол“, тој свирел во најпознатите светски сали и клубови во Лондон, Париз, Мадрид, Рим, Милано, Стокхолм, Торонто, Ванкувер, Чикаго, Њујорк и Лос Анџелес.На крајот на 1998 година Драгољуб го основа својот бенд „Drums Company“, кој се состои од бројни тапанари чии заеднички настапи се сметаат за спектакли. Со групата која ќе го смени името во „Балкански лавина“ досега одржувал концерти во сите поголеми градови на поранешна Југославија, Унгарија, Холандија, Холандија, Норвешка, Германија, Италија, Шведска, Австрија, Монако, Грција... Драгољуб Ѓуричиќ исто така компонирал и музика за над 20 театарски и балетски престави. Сепак, периодот од 6 години поминати со „Леб и сол“, па потоа уште некое време по неговото второ враќање во бендот остави не само неизбришиви музички траги, туку и создаде цврсти пријателски врски со членовите на бендот кои трајно остануваат. Дружењето со Драгољуб кој не е само врвен музичар, туку и голем човек со фантастичен карактер тешко дека може да се заборави. Токму веста за неговата борба на „живот и смрт“ со опакиот вирус очигледно најмногу ги погоди и некои од членовите на „Леб и сол“. Така, клавијатуристот и негов пријател Кокан Димушевски прв му ја даде својата јавна поддршка преку социјалните мрежи. Немајќи како поинаку да му помогне на својот некогашен колега и добар пријател, Коко му испрати порака преку својот Фејсбук профил, така што сподели заедничка фотографија која очигледно датира однеодамна, што покажува дека двајцата врвни музичари останале верни пријатели до ден денес. „Држи се Драгољубе МОРАШ ДА ПОБЕДИШ !!!“ - му порача Кокан на својот пријател праќајќи му силна позитивна енергија да собере сили за да ја добие битката со опакиот вирус кој покоси многумина, меѓу кои и врвни уметници од Македонија, регионот, Европа и светот... Од Драган Вучиќ и Зоран Џорлев, до Миша Алексиќ (Рибља Чорба) и Ѓорѓе Балашевиќ... и уште милиони други, познати или обични луѓе ширум светот. Останува надежта дека „балканската лавина“ ќе го однесе со себе опакиот вирус во неповрат, а Драгољуб Ѓуричиќ ќе ја добие битката со Ковид 19! „Музиката се темели на ритам, животот исто така. Ако срцето не отчука три пати во ритам, четврти пат можеби нема ни да чука“ - ќе рече во една прилка Драгољуб. Му посакуваме да извојува победа во оваа животна битка, а неговото срце уште долго, долго да чука... во ритамот на животот!

Родендени, јубилеи, годишнини… Вака се потсетија на нивните значајни датуми Ноне Неделковска, Кокан Димушевски и Сузана Гавазова (ФОТО)

Антонио Димитриевски — Tue, 29 Sep 2020 08:07:09 +0000

Секој од нас има свои денови кои му се најважни во животот. Секако, денот на раѓање, слава, именден, разни јубилеи, годишнини од брак... И уште низа важни датуми кои за сите други се можеби само обични денови, но за некого од нас, ден за потсетување, евоцирање спомени, ден што нешто значи во неговиот живот. Затоа такавите денови и се одбележуваат, се слават, се ставаат на пиедесталот меѓу најважните датуми во нашиот живот. Можеби времето и околностите заради познатите настани сега и не дозволуваат онакви прослави какви што паметиме, ама тоа не значи дека од значајните датуми во животот треба да се откжеме, да ги заборавиме, преспиеме... И секако, не значи дека не треба да бидат одбележани на соодветен начин. Тоа го правиме сите ние, па и познатите личности, меѓу кои и естрадните. И тоа секоја на свој начин. Повод и причина за славење имаа три наши познати музички лица. Една некогашна поп ѕвезда, еден од најдобрите и најпознати македонски музичари и врвни инструменталисти, и една од најголемите актуелни фолкерки: Ноне Неделковска, Кокан Димушевски и Сузана Гавазова. Најмладата од нив, Ноне славеше роденден, а Кокан и Сузана годишнина од бракот. И секој на свој начин го одбележа значајниот датум од животот, а на таков начин и го споделија на социјалните мрежи. Ноне го прослави својот роденден. Овој пат дома, во родниот Велес. На дамите навистина не им се бројат годините, но македонската „џепна венера“ не се срами да ги каже, па и самата ги откри. Можеби затоа што и воопшто не изгледа за годините. Туку како да има половина од тоа! Од сите роденденски честитки што се „слејаа“ на адресата на Ноне, највпечатлива онаа од мама Мимоза, која на својата ќерка - морепловка и посака: „Океан од здравје, море од среќа и љубов, езеро од успех, река од пари, животот да биде убав, сите да те следат, до години стари. Вечност Бог да ти подари, Среќен роденден“. Македонскиот клавијатурист, музичар, член на култните „Леб и сол“ и долгодишен член на Танцовиот оркестар на МРТ, Кокан Димушевски исто така имаше причина за одбележување добра бројка... Годишнина од бракот со неговата сопруга Билјана. Оние што ги познаваат, знаат дека се заедно откако ги паметат, ама Коко сепак бројката не ја откри... Или ја откри, ма на поинаков начин, споделувајќи чудна „цифра“ - 3842, покрај заедничката фотографија со неговата животна сопатничка. Што и колку им значи, само тие двајца знаат да дешифрираат! Но, штом ја споделиле, сигурно многу им значи! Годишнина од денот кога го кажа судбоносното „ДА“ одбележа и македонската фолкерка Сузана Гавазова. 27-ми септември 2014 година или 6 години од денот кога Гавазова „облече бело“ , а насмевката ја „криеше“ под велот, додека одекнуваа свадбените ѕвона за неа и нејзиниот сопруг Јасмин. Гавазовова на денот на нивната венчавка се потсети и себе си и јавноста со споделени неколку, што видени, што досега невидени фотографии од свадбата, на која и самата во еден момент се фати за микрофонот за да ги развесели гостите, крене атмосферата и увеличи сопствената прослава! Впрочем, важните датуми затоа и постојат - за да се паметат и да не потсетуваат на најзначајните моменти од нашите животи... Моменти на радост, среќа, задоволство, убавина, исполнетост, моменти на живот, каков што постојано сакаме, секој ден да го живееме. Епа, нека е само за арно и убаво и... Нека ни се множат и годините и прославите. Наздравје! Фото: Фејсбук принтскрин

Концерт на Кокан Димушевски во Кавадарци

Антонио Димитриевски — Wed, 16 May 2018 10:49:07 +0000

Вечерва, 16 мај 2018, со почеток од 20.30 часот, во Домот на култура „Иван Мазов – Климе“ во Кавадарци, ќе одржи концерт легендата на македонската музика, некогашниот член на „Леб и сол“ – Кокан Димушевски. Музичарот со електронски инструменти и во придружба на Љубиша Кировски на виола, на љубителите на убавата музика од Кавадарци ќе и се претстави со концертот наречен „Private music“, со музички материјали од кои дел првпат ќе бидат исполнети токму во Кавадарци.

„Како да се дофати недофатливото? Да се искаже неискажливото? Да се улови неуловливото? Да се опише неопишливото. Празниот простор исполнет со смисла.Разделбата молчешкум. Ветувањето без цел и епилог. Како да се реши енигмата кон што стремеле мислителите од сите филозовски и естетички епохи, а да не се употреби немоќниот јазик на вербалниот израз. И да се остане, притоа свој, сопствен, личен и уникатен. И уверлив и прифатлив и разбирлив. Мојот одговор е овој. Неопишлив, но сфатлив за сите оние што се соочиле со мистериите на универзумот и со одгласот што се крие во секој нас. И којшто излегува некогаш. Во некој таен час, во тишината на ноќта или пред раѓањето на зората“, тоа е објаснувањето за „Private Music“, музичкиот проект на Кокан кој е компониран во 2016 и 2018 година. Билетите се веќе во продажба во билетарницата на Домот на култура во Кавадарци.