Камерниот оркестар на Битола – Вистина.мк

Битолскиот камерен оркестар по Рок, ќе изведе и „Електро симфонија“

Антонио Димитриевски — Mon, 08 Jul 2019 11:53:40 +0000

Камерниот оркестар на Битола изминативе години ја воодушевува публиката во целиот регион со одличната „Рок-симфонија“, а билет повеќе се бараше и за нивните концерти насловени „Дамска симфонија“, „Засекогаш во срцата“, „Џејмс Бонд симфонија“, „Џон Вилијамс симфонија“… А сега, на ред дојде и најновиот проект на музичката дружина предводена од маестро Владимир Димовски, кои на 8 август на ракометното игралиште во Битола ќе ја претстават новата „Електро-симфонија“.

Како и на претходните концерти, така и на овој ќе имаа специјални гости што ќе настапат како вокални солисти, па публиката ќе има можност да ги слушне нивните македонски колеги Сара Мејс, Агни Авшар и Светлана Јовановска, како и гостинките од Бугарија – Маги Џанаварова и Ели Раданова.

Кралски концерт со Камерниот оркестар на Битола

Антонио Димитриевски — Sat, 26 May 2018 06:00:59 +0000

Камерниот оркестар на Битола и „Ројал фри сингрс“ од Виндзор ќе одржат концерт во Центарот за култура во Битола, кој ќе се одржи в недела, 27 мај, со почеток од 20.00 часот. Диригент ќе биде маестро Бенедикт Ганер, а придружник Џон Чентри, додека како солисти ќе настапат Сузан Пигот (сопран) и Џереми Ендрус (баритон).

На концертот ќе бидат изведени дела од композиторите Џон Рутер, Вилијам Вилкокс, Пјетро Масгањи, Драган Шуплевски и други. Влезот е бесплатен.

Битолскиот камерен оркестар со филмски концерти во Битола и Скопје

Антонио Димитриевски — Mon, 05 Mar 2018 12:44:57 +0000

Откако ја заокружи минатата 2017 година со „Дамската симфонија“, Камерниот оркестар на Битола новата сезона ја започнува со музика од најголемите филмски хитови. Имено, на 18 март во Центарот за култура – Битола, во рамките на концертот насловен „Џон Вилијамс симфонија“ ќе прозвучат теми од „Војна на ѕвездите“, „Супермен“, „Индијана Џонс“, „Паркот Јура“ и „Шиндлеровата листа“, чиј автор е американскиот композитор и петкратен добитник на Оскар, Џон Вилијамс. Овој спектакуларен концерт на Камерниот оркестар е во соработка со музичари од Македонската филхармонија и Македонската опера и балет, а солист на виолина е Климент Тодороски.

Само два дена подоцна, на 20 март, истиот концерт ќе има можност да го проследи и публиката во Скопје, во МОБ, со почеток од 20.00 часот. Влезниците за битолскиот концерт ќе бидат пуштени во продажба на 17 и 18 март во билетарницата на Центарот за култура – Битола, додека за скопскиот можете да ги набавите во билетарницата на МОБ, секој работен ден од 10.00 до 20.00 часот.