ѓоко јовиќ – Вистина.мк

„На Велигден“ не е само Џокси: Некои наши пејачи ја преработија неговата легендарна тема, а кај други големиот христијански празник е вткаен во нивните песни (ВИДЕО)

Антонио Димитриевски — Mon, 17 Apr 2023 07:45:52 +0000

Кога е еден од најголемите христијански празници во прашање, секогаш во пресрет на Велигден покрај се друго, на памет ни паѓа и песната... И тоа онаа, најпознатата, легендарната која тогаш радијата најчесто ја вртат... „На Велигден“, напишана и испеана од македонскиот кантавтор Ѓорѓе Васиќ, алиас Џина Папас Џокси како што го познава јавноста по негвиот уметнички прекар. Но, со текот на годините „На Велигден“ испадна дека не е само синоним за Џокси... Прв кој го преработи неговиот евергрин беше тогаш младиот Ламбе Алабакоски, излезен од музичката работилница на Дарко Димитров и М2 продукцијата и нивното македонско музичко талент шоу - „Портага по ѕвезди“. Младиот пејач иако во свој стил, сепак речиси идентично ја донесе преработката на „велигденската поп химна“. По него уште една македонска пејачка во 2017 година влета во обид да ја долови и на себесвојствен начин да ја донесе „празничната песна“. Песната доби своја женска верзија кога во студиото „Ентерпрајз“ на Валентино Скендеровски ја испеа пејачката Пепа Димитрова, а аранжманот го направи Дамир Имери. Нејзината интерпретација во смут џез варијанта со етно елементи сосема поинаква, а сепак препознатлива на оригиналот. Самиот Џокси на манифестацијата „Златна бубамара на популарноста“ во 2020 година во живо заедно со членовите на хорот на АКУД „Мирче Ацев“ донесе уште една малку поразлична верзија на сопственото „животно остварување“. За време корона пандемијата, додека траеа деновите на карантинот, Џокси одново зедно со голема група од 60 помалку или повеќе познати охридски музичари, пејачи и аматери наречена „Охрид биг карантин бенд“ ќе донесе сосема нова, поинаква, необична „онлајн“ верзија на големиот хит. Конечно, „На велигден“ не е само Џокси... Покрај оние наши пејачи кои ја преработија неговата легендарна тема и кај некои други македонски поп и фолк ѕвезди големиот христијански празник се споменува и во нивните песни! Така на пример во прекрасната „Километри“ на Влатко Лозаноски од 2018-тата, стихот кој е поврзан со големиот христијански празник гласи: „Ми фали за Велигден јас да си дојдам, ми фали да сум дома...“! Македонскиот фолк пејач Ѓоко Јовиќ пак, исто така има песна во чиј наслов е вткаено името на големиот христијански празник - „За Велигден“. Излезена во 2019 година, иако во неа се споменува големиот христијански празник и несомноно дека истата токму тогаш и е најмногу во фокусот и ја достигнува кулминацијата на својата популарност, сепак македонскиот фолкер неа ја правел наменски, зашто пред се’ се работи за печалбарска песна која во себе ја крие патината на македонскиот печалбар, неговиот живот во туѓина и тагата по родниот крај. Уште една позната македонска фолк пејачка, Елена Георгиева исто така има своја наменска песна за празникот што го слави Христовото воскресение и победата на животот над смртта. Нејзината тема е насловена „Молитва за Велигден“. И македонската фолк легенда Благица Павловска исто така има испеано велигденска песна и тоа заедно со познатиот музичар Цане Петров („Биоритам“), која исто така е наменска, празнична и носи наслов: „Хрисистос воскресна“ . На тема „Велигден“ песни посветени на еден од најголемите христијански празници има уште... Но за нив, задравје Боже догодина, во следната велигденска прилика! Христос воскресна - навистина воскресна!

Ѓоко Јовиќ и Теодора – таткото и ќерката со заедничко авторство во песната – „Пламен на љубовта” (ВИДЕО)

Антонио Димитриевски — Mon, 25 Jul 2022 05:40:10 +0000

Миленикот на сите генерации, фолк пејачот Ѓоко Јовиќ остана доследен на своето, па така и овој пат во етер пушти ново парче музика со што донесе свежина и кај публиката во ова жешко лето. Она што е посебно за почит и што разбуди емоции кај многумина е тоа што текстот за „Пламен на љубовта” го напишала токму ќеркичката на Ѓоко, Теодора Јовиќ, на чиј текст музиката ја компонирал самиот Ѓоко, додека аранжманот, миксот и мастерингот го потпишува Иван Јованов, попознат како Iwayo. Спотот со кој е визуелизирана песната е изработен од „M16 - Sydney“ и “IN- Production“ сниман во Австралија, а кадри од Ѓоко се снимени во Македонија и со тоа е направен функционален видео спој на илјадници километри далечина, видео кое содржински ја следи приказната од стиховите во целост. Дека Теодора Јовиќ е талентирана и цврсто чекори по стапките на нејзиниот татко Ѓоко говори токму оваа песна. На Вас останува да ја слушнете, погледнете видеото и да уживате во нивната... „Пламен на љубовта“.

Ѓоко Јовиќ во новата балада оставен сам среде – „Пустина“ (ВИДЕО)

Антонио Димитриевски — Thu, 10 Feb 2022 10:19:25 +0000

Кога е песната во прашање, Ѓоко Јовиќ има со што деновиве повторно да се пофали. Неговата нова балада насловена „Пустина“ е веќе излезена, а на неа работела веројатно најдобрата авторска двојка во Македонија. Братско - сестринското авторско дуо, композитрот Лазар Цветковски, кој ги направил и аранжманот, снимањето, миксот и мастерингот и неговат сестра, текстописецот Магдалена Ена Цветковска чии се стиховите на песната. Хитовски ориентирана балада со суптилно интегрирани фолк мотиви, аранжмански модерно спакувана, продукциски одлично испеглана, совршено прилагодена на вокалните способности на пејачот, во која како во калап се вклопиле одличните стихови. Ѓоко Јовиќ истата ја визуелизирал и со одличен видеоспот кој го потпишуваат австралијанците „M16 продукција“ од Сиднеј, односно Беби и Омер. Како сето тоа звучи изгледа, проследете во видеото во продолжение:

Ѓоко Јовиќ е пример за естрадна ѕвезда и среќен семеен човек: Четири дечиња, семејна хармонија и нов хит! (ФОТО+ВИДЕО)

Антонио Димитриевски — Thu, 10 Feb 2022 09:58:31 +0000

Пред нешто повеќе од три месеци познатиот македонски пејач Ѓоко Јовиќ и неговата сопруга Ивана по четврти пат се остварија во улога на родители. Тие го добија синот Дарин, кој сега е најмладиот член во нивното многудетно семејство. Ѓоко кога се роди малиот Дарин напиша дека неговата сопруга е вистински херој, а времето што помина од тогаш е најсреќниот период во нивното семејство. Една насмевка неодамна на тогаш двомесечниот Дарин, на среќниот татко му ја наполни душата, па пејачот моментот го овековечи со фотографија покрај која напиша: „Цели два месеци ја чекав оваа насмевка“! Тие покрај најмалото синче, уште ги имаат и ќерката Теодора и синовите Михаил и Јован, кои се радуваат и помагаат околу нивното братче. Тие живеат вистинска семејна бајка, а колку пејачот ужива во татковството можеме да видиме и од неговиот Инстаграм. Овој пат, откако објави фотографија на која се гушка со еден од своите синови, Јовиќ им ги растопи срцата на своите бројни обожаватели од Македонија и дијаспората, посебно со емотивната порака што пејачот ја напиша. На фотографијата малиот Јован го бакнува својот татко, а врз фотографијата тој напишал: „Не сум знаел дека човек со бакнеж може да се стопи“, стојат како коментар зборовите на Јовиќ. Најстариот син Михаил пак, очигледно тргнал по стапките на татко му, па музиката уште отсега му голема љубов, хоби, а утре можеби и професија со која ќе го наследи татка си и ќе го продолжи неговиот пат на успехот. А, има ли поголем идол, поголема инспирација и подобар учител, ако учителот ти е дома. Како функционираат таткото Ѓоко и синот Михаил заедно на музички план, покажаа во кусото музичко видео клипче, каде синот свири, а таткото пее:

View this post on Instagram

A post shared by Gjoko Jovik (@gjokojovik)

Но, кога е песната во прашање, Ѓоко Јовиќ има со што деновиве повторно да се пофали. Неговата нова балада насловена „Пустина“ е веќе излезена, а на неа рабортела веројатно најдобрата авторска двојка во Македонија. Братско - сестринското авторско дуо, композитрот Лазар Цветковски, кој ги направил и аранжманот, снимањето, миксот и мастерингот и неговат сестра, текстописецот Магдалена Ена Цветковска чии се стиховите на песната. Ѓоко Јовиќ истата ја визуелизирал и со одличен видеоспот кој го потпишуваат австралијанците „M16“ од Сиднеј, односно Беби и Омер.

Ѓоко Јовиќ и ја посвети на Македонија новата песна – „Прелетај соколе“ (ВИДЕО)

Антонио Димитриевски — Thu, 17 Dec 2020 09:07:10 +0000

Еден од најпознатите македонски фолк пејачи, Ѓоко Јовиќ, деновиве медиумски го промовираше спотот за најновата песна која носи наслов “Прелетај соколе”. Музиката ја компонирал самиот Ѓоко Јовиќ, а аранжманот го направил Дамир Имери, додека стиховите ги напишал младиот, но веќе докажан текстописец Александар Стевановски. Песната е снимана и миксана од Љупчо Павловски кој го ирзботил и мастерингот и сето тоа во тонското студио „Анастасија“. Видеото за оваа песна се снимаше на повеќе локации во Скопје и околината, а спотот и овојпат го изработија неговите долгогодишни соработници од ИН Продукција, а во него покрај пејачот како актер се појавува и г-ѓата Митра Дениќ. Според авторот и пејач, песната е посветена на нашата татковина Македонија, како што самиот Јовиќ истакна во неодамнешното интервју за ИН ТВ потенцирајќи дека истата е работена со многу труд и љубов, но сепак крајниот збор ќе остави да го каже публиката. Во продолжение погледнете го видеото и уживајте во “Прелетај соколе”: https://www.youtube.com/watch?v=r9IEenTEE_M&feature=emb_logo

Ѓоко Јовиќ ја пронајде својата – „Ѕвезда најсветла“ (ВИДЕО)

Антонио Димитриевски — Tue, 04 Aug 2020 12:03:30 +0000

Како што вели и песната „Ѕвезда најсветла“, така и Ѓоко Јовиќ е една светла точка во ова време - невреме кое го диктира коронавирусот со тоа што неуморно работи на нови проекти и и' се оддолжува на публиката за сета почит која таа му ја дава и укажува. Имено, оваа фолк балада е е дело на најдобрите автори, на братско-сестринскиот авторски тандем Лазар и Магдалена Цветкоски, кои го создадоа ова музичко парче, додека видеоспотот е снимен во далечната Австралија. Во него главната улога ја има атрактивната австралиска девојка, а самиот Ѓоко се појавува како уметник кој на платно ќе ја наслика девојката со која што претходно, сосема случајно се запознава во ненамерен судир. „Песната е испеана и посветена за публиката, но да бидам искрен, и за мојата сопруга Ивана која секогаш ми е најголемата поддршка за се што правам, и која ми е најголемата причина за среќа со тоа што ми подари три дечиња. Објавена е во време на пандемија предизвикана од вирусот баш со цел да ги охрабри и развесели сите слушатели, и да испрати една порака дека музиката е вечна, дека ништо, па и една ваква пандемија не може и нема да ни го скрати задоволството да уживаме пак сите заедно. Јас на тоа искрено се надевам и посакувам да се случи во што побргу“ - вели Ѓоко. Во продолжение погледнете го спотот кој што е направен од врвните професионалци Беби и и Омер од „М16“ во Сиднеј, во прекуокеанската Австралија: https://www.youtube.com/watch?v=8Zj-vRWKhuM&feature=emb_logo Извор: естрада+

Ѓоко Јовиќ секој ден тоне во нејзините – „Очи океани“ (ВИДЕО)

Антонио Димитриевски — Thu, 19 Mar 2020 12:43:33 +0000

Македонскиот фолк пејач Ѓоко Јовиќ ја објави својата нова песна. По минатогодишните хитови со кои ја зацврсти својата позиција на домашната музичка сцена, ги освои срцата на нашинците во прекуокеанските земји, но и се обиде да направи пробив на регионалната естрада, пејачот изненади со песна, која воопшто не е народна. Неговата „Очи океани”, ако ги затворите очите без да го гледате видеото или за прв пат ја слушнете на радио, ќе помислите дека е нова песна на Влатко Лозаноски. Имено, Ѓоко така мајсторски ја отпеал, што во интерпретацијата помалку и потсетува на Лозано, а песната наликува на неговите хитови. А како и не би, кога неа ја потпишува к братско-сестринскиот авторски тандем, композиторот и последниве години најголемиот наш хитмејкер Лазар Цветкоски и неговата сестра, текстописецот и женски вокал, Магдалена Цветкоска-Ена. Кога на сето тоа ќе се додаде убавата за око визуелизација на песната, која е направена за време на престојот на Јовиќ во Австралија, а е снимена во Сиднеј, станува повеќе од јасно дека Ѓоко Јовиќ може слободно да бира кому ќе конкурира: на најголемите ѕвезди и од забавната и од македонската фолк естрада... иако тој по многу нешта веќе оддамна е меѓу нив! Видеото го потпишува „M16 - Sydney“ односно Беби и Омер, а покрај авторскиот, комплетниот музички дел (снимање, микс, мастеринг, продукција) го изработил Лазар Цветковски, додека Ѓоко и Ена ги пеат и придружните вокали во песната. Како звучи и изгледа визуелизацијата на новиот хит на Ѓоко Јовиќ - „Очи океани“, проследете во продолжение:

Ѓоко Јовиќ донесе уште една печалбарската класика – „Решив дома да се вратам“ (ВИДЕО)

Антонио Димитриевски — Wed, 27 Nov 2019 12:27:46 +0000

Македонскиот фолк пејач Ѓоко Јовиќ ја продолжува својата традиција да промовира нова песна екранизирана со видеоспот. Деновиве тој промовираше токму ваков пакет за песната “Решив дома да се вратам”. Овој пат без неговите „Енерџи бенд“, самостојно како соло изведувач тој донесе песна со печалбарска тематика, една од оние кои најмногу се слушаат и поминуваат кај нашите иселеници во дијаспората, каде Ѓоко многу често гостува и настапува. Автор на музиката е самиот тој, додека стиховите ги напишал Александар Стевановски, а аранжманот заеднички ги потпишуваа Ѓоко Јовиќ и Марко Дениќ. Песната е снимена во студиото „Анастасија“, а за снимањето, миксот и мастерингот бил задолжен Љупчо Павловски. Видеото е снимано на повеќе локации во Охрид и охридско, во продукција на охридската „ИН Продукција“. Главен лик во видеото е еден од најпознатите актери во Македонија, Владо Дојчиноски, кого гледачите најмногу го познаваат преку неговите ТВ улоги од ликовите во „Македонските народни приказни“. Тој воедно е потпишан и како режисер на видеото, во кое покрај него и Ѓоко Јовиќ, ликовите ги толкуваат и членовите на најтесното семејство на пејачот, татко му Тодор и синчето Михаил Јовиќ. „Нам многу ни се допаѓа, но ќе видиме ќе го оставиме тоа на публиката, иако дел од песната уште претходно објавив на Фејсбук. Отсвирено на клавир по дома и многу беше прифатено... Песната како песна е добра, но мислам дека спотот е многу подобар. Владо тоа го изведе во најдобар ред, со одлично смислено сценарио“ - изјави Јовиќ, а Вие во продолжение проследете ги песната и видеото:

Ѓоко Јовиќ влегува на регионалниот пазар со „Мила моја“ (ВИДЕО)

Антонио Димитриевски — Wed, 17 Jul 2019 12:22:45 +0000

Македонскиот пејач Ѓоко Јовиќ покрај самостојната кариера заедно со своите „Енерџи бенд“ се обидува полека да влезе и на балканскиот, односно регионалниот пазар на просторот на бившите ЈУ републики. Така тој заедно со „Енерџи бенд“ неодамна ја издаде песната „Тешко је у души“, а не мина многу време оттогаш, па еве го Ѓоко Јовиќ соло, со нова песна на српски јазик.

„Мила моја“ е нејзиниот наслов, чие видео заедно со песната премиерно беше претставено деновиве. Станува збор за авторско дело на популарниот пејач Пеѓа Меденица, чиј потпис стои на музиката и стиховите, а аранжманот, миксот и мастерингот се на Енџи Мавриќ.

Јовиќ заедно со Ксенија ги отпеа и придружните вокали, а сето тоа визуелно го заокружи екипата на охридската „Ин продукција“.

Главните улоги во видеото им припаднаа на извесни Јоцо и Мартина, а како изгледа и звучи сето тоа дознајте во продолжение. https://www.youtube.com/watch?time_continue=63&v=s_7k54uX42k

Ѓоко Јовиќ и „Енерџи бенд“ во балкански поход со „Тешко је у души“ (ВИДЕО)

Антонио Димитриевски — Fri, 21 Jun 2019 10:27:24 +0000

Покај самостојните песни, македонскиот фолк пејач Ѓоко Јовиќ активно ја продолжува и соработката со „Енерџи бенд“, со кои се обидува да го освои балканскиот пазар.

Така, откако ја објавија „Ми имали смо све“, екипата деновиве ја претставија и новата заедничка песна насловена „Тешко је у души“.

Станува збор за авторско дело на добро познатите српски автори Саша Николиќ ( музика и аранжман) и Стеван Симеуновиќ (текст), додека за екранизацијата на песната се погрижила екипата на продукцијата „М16“.

Како изгледа и звучи сето тоа, дознајте во продолжение. https://www.youtube.com/watch?v=1Nq9pJEcZsw