фестивал – Вистина.мк

„Земјотрес“ во МКЦ по 12-ти пат: Фестивал на свежа, домашна и независна музика

Антонио Димитриевски — Wed, 24 Jan 2024 13:36:18 +0000

Се тресеме. Сите заедно. Се тресеме од студ, се тресеме од неизвесност…. се тресеме од извесност. Се тресеме од туѓите избори, од памет не вадат нашите избори. Се тресеме 12 години со нашиот „Земјотрес“, се тресеме елегантно, ма прекрасно се тресеме. Скопје е трусно подрачје, совршена сцена за урбана зомби апокалипса во континуитет. Па се тресеме во континуитет. Се тресеме во ритмот на музиката, кожи наежени, младост подготвена да експлодира низ конзервата на ебеното примитивно општество. Се тресеме од општеството, а би сакал ние да го треснеме посред глупата му фаца.

Земјотресно Скопје. Дојдете да се тресеме заедно по 12-ти пат во МКЦ, а и МКЦ се тресе. Ладно му е. Додете да го гушнеме. Дојдете да се видиме, прегрнеме.

Настапуваат: Ади Имери трио, Андреја Салпе, ATA, Damage Control, Добрила и Дориан дуо, Donplaya, Gargara, Искра, Кенопсија, Културно Уметнички Работници, Lincoln Letter, Luke Levin, MC Kain, Meggy, Мирко Попов, Новиот почеток, ОВЦ Колектив, Tengri, The Ooz, Trendkill, Visionary...

„Зeмјотрес“ e nајголем фестивал на свежа, домашна и независна музика

Сабота, 3-ти февруари 2023, почеток: 19:00, крај: 04:00

Локација: Младински Културен Центар Влезници во претпродажба на bileti.mkc.mk + билетара на МКЦ

Македонскиот филм „М“ на Вардан Тозија ја доби наградата за најдобар филм на фестивал во Њујорк

Слаѓана Атанасова — Fri, 08 Dec 2023 19:30:18 +0000

Филмот „М“ на Вардан Тозија ја доби наградата за најдобар филм на њујоршкото издание на фестивалот „Dances with films“. -Воодушевен сум што ја примам наградата за најдобар филм на годинешното издание на „Dances with films“ во Њујорк. Претставуваше голема чест и уникатно искуство да се биде дел од официјалната селекција на овој исклучителен фестивал, со креативни и бескомпромисни филмски автори, на настан што прерасна во двигател на американскиот и интернационален филмски дух, вели режисерот Вардан Тозија, кој во Њујорк лично ја прими наградата. Фимот „М“ на овој фестивал ја имаше американската премиера. Според USA Тoday, фестивалот се вбројува меѓу „десетте најзначајни филмски настани на северноамериканскиот континент“, според CNN, важи за „лидер во позиционирање на свежи и нови таленти на филмската индустрија“, додека Indiewire го препознава како „нашироко признаен поради откривањето на иновативниот дух и талент во независната кинематографија“. -Уникатно воден филм со динамичен емотивен импакт, „М“ е спектакуларно достигнување во меѓународната филмска соработка, стои во официјалното образложение на Фестивалот. Приказната на Тозија за осамено момче од шумата, кое наидува на низа предизвици и авантури, барајќи ја својата самовила, токму во официјалната селекција на овој фестивал ја претстави македонската кинематографија пред американската публика. По премиерата се одржаа дискусии меѓу режисерот и членови на индустријата, како и разговори со публиката. Светските права за дистрибуција на македонскиот филм “М“ ги поседува американската компанија OneTwoThree Media.

Овој викенд во Бра, Италија, ќе се одржи „Cheese 2023“ – Меѓународниот фестивал посветен на сирењето

Дејан Донев — Fri, 15 Sep 2023 06:57:43 +0000

„Cheese“, најголемиот и најважниот меѓународен настан, светски фестивал посветен на природни сирења, занаетчиски млечни производи.., организиран од мрежата на Слоу Фуд, ќе се случува овој викенд во Бра (Италија) од 15-ти до 18-ти септември годинава. Во организација на Slow Food International и Citta di Bra, со поддршка на Regione Piemonte, овогодишната прослава на сирење и млечни производи на едно место ќе ги собере сите мајстори за сирење, сточари, производители и експерти од целиот свет кои се среќаваат за да ги претстават своите производи, да споделат идеи и заеднички решенија за предизвиците со кои се соочуваат, но настанот е отворен и за сите љубители на сирење: се најавуваат конференции, дегустации и работилници или вкупно 122 настани. Ова е „Cheese“ надвор од границите. Фестивал во Бра, сирење на почесна позиција Мајсторите за сирење, сточарите, производителите и експертите од целиот свет се среќаваат во Бра, Италија, на фестивалот „Cheese“, за да ги претстават своите производи, да споделат идеи и заеднички решенија за предизвиците со кои сите се соочуваме, почнувајќи од климатската криза. Традицијата е воспоставена: по 23 години и 11 изданија, „Cheese“ секоја втора година, се фокусира на сирењата, а овој четиридневен настан е суштински важен за целата планета. Организаторот е Slow Food International , градот Бра со подршка на регионот Пиемонте. На меѓународниот пазар ќе бидат присутни изложувачи од 14 земји. Нашата земја на Фестивалот за сирење во Бра ќе биде претставена како ризница на гастрономски и културни традиции, како и крстопат на народи, религии и култури. Република Македонија, чие присуство е финансирано од Министерство за земјоделство, шумарство и водостопанство на Македонија, ќе ги пречека посетителите со интересна програма на дегустации и активности. Елена Каровска Гошевска, програмски координатор во Слоу Фуд Македонија ќе учествува на конференцијата, Септември: време на сезонско селење на стоката. Македонија исто така ќе биде во центарот на работилницата за вкус Сезонско селење на стоката во Македонија на 17 септември а преку оваа работилница, низ кулинарското наследство на Македонија ќе се откријат боите на соживотот меѓу планините и езерата, преку производите на Президиуми, од соленото „парче млеко“ (со планинските сирења од Маврово Река) до слаткото од диви смокви и буковска пиперка, не заборавајќи ги, се разбира, типичните пијалоци во земјата. Вкус на уникатното кулинарско наследство на Македонија и осознавање преку храна, ќе биде преку работилницата за вкус „Сезонското селење на стоката во Македонија“. Станува збор за вековна традиција и нејзиното богато наследство на сирење, проткаено со историја и култура.

Започнува првото издание на фестивалот “Taste The South” – Гевгелија

Антонио Димитриевски — Thu, 14 Sep 2023 13:27:02 +0000

Денес со почеток во 18:00 часот започнува првиот фестивалски ден на гевгелискиот "Вкуси го Југот" - "TasteTheSouth". Шаторите се поставени, музичката бина истотака, се финализираат последните подготовки на штандовите на изложувачите каде три дена посетителите ќе можат да го почуствуваат и вкусат тоа што го нуди Гевгелија и регионот. Во 18:00 часот започнува музичката програма со настап на Ансамбал Бојмија, потоа Анета Ристова Василева, Инфузиона 2, Баклава, Диверзија Миле Кузмановски, Дац и Александар и Игор Џамбазов и Гуру Харе бенд. Водител и шоумен ќе биде Актерот Сашко Коцев кој со својот настап ќе не води низ вкусовите на југот. Денес сите патишта водат кон Гевгелија, дојдете да го вкусите југот на едно уникатно фестивалско доживување.

Од утре фестивал на инклузија во општина Кисела Вода

Слаѓана Атанасова — Wed, 06 Sep 2023 11:21:53 +0000

Од утре, четврток, 07 до 10 септември 2023 година, во паркот Македонија, пред Домот на култура „Билјана Беличанец” ќе се одржи Фестивал на инклузија на тема “Културни политики за инклузија”. Настанот е во организација на Здружението за едукативни и хуманитарни активности ВИЗИЈА ПЛУС – Скопје, во соработка со Здружението за активно вклучување и соодветен третман на лицата со попреченост – Икуалити. Програмата вклучува различни изложби, дискусии, работилници, проекции на филмови и концерти. Фестивалот ќе биде отворен утре, на 7-ми септември во 20 часот, со изложбата на уметнички фотографии на Драги Неделчевски и Небојша Гелевски, насловена „Запознавање и прифаќање” и музичкиот концерт на македонскиот трап-изведувач Пајак. Следните два дена ќе бидат исполнети со неколку работилници за деца и млади, изведба на инклузивен хор на деца со и без попреченост како и концерт на македонскиот фанк/алтернативен бенд „Funk Shui“, проекции на неколку филмови, инклузивна театарска претстава на танцовото студио Еурека Катерина, ретро музичка забава со Ламбе Алабаковски и пријателите „Македонија во 90-2000-тите”, забава со ди-џеј и уште многу други интересни настани.

Почна 12. Џез фестивал „Прилеп џез викенд“

Слаѓана Атанасова — Fri, 01 Sep 2023 11:15:02 +0000

Со два концерта, еден на дуото Добрила-Доријан, вториот на интернационалниот состав на Јордан Костов (Јордан Костов, „Jingarabushi“) на малата сцена во Центарот за култура „Марко Цепенков“ во Прилеп и официјално почна 12. Фестивал на џезот – „Прилеп џез викенд“. Му претходеа два настана во придружната програма – во понеделникот концерт на Џенгис Ибрахим на археолошкиот локалитет Врбјанска ќука и на 29 август, во вторникот во Клубот Калинка настапија „Next to Silence“.

Фестивалот вечер и утревечер на 2 септември кога ќе се заокружи ќе понуди уште 4 концерти. Публиката ќе ги види и „Soothsayer“, бенд кој го сочинуваат тројца млади, но веќе етаблирани музичари, потоа групата „Фолтин“, а последната вечер се концертите на гостите од Србија „3Gonome3“ и составот „Intergalactic mutant funk“.

Добрила Грашеска, од дуото Добрила и Доријан пред публиката го претставија својот проект „Пиле шарено“ кој донесува познати македонски песни со нов аранжман и видување.

Има веќе две години како го почнавме овој проект со мојот другар Доријан Јовановиќ со кого свириме заедно во „Чалгија саунд систем“. Во овој проект влеговме како дует. Она што најдобро го знаеме, тоа македонската традиционална музика и ја прикажуваме низ филтерот на нашето видување на музиката. Тоа значи низ нашиот современ спектар на поглед и на разбирање на музиката, на звуците, на шумовите. Во овој проект „Пиле шарено“ внесовме малку повеќе електроника, повеќе експериментирање со музиката.Пристапуваме од поинаков агол на она што го знаеме. А то во џезот е најважно. Во џезот се битни импровизацијата и слободната интерпретација на она што е знајно, рече Грашеска.

Доријан Јовановиќ смета дека се потребни повеќе џез фестивали од помал формат за да се претстават сите талентирани изведувачи.

-Прилепскиот џез фестивал е многу помал, да речеме од Скопскиот џез фестивал, но овие фестивали, во овој момент, ми се чини, се многу битни зашто може да претстават многу повеќее од помалите артисти, изведувачи кои имаат простор и можност да го покажат она што го работат. Затоа е големо значењето на овој џез фестивал. Треба да ги има повеќе. Во Прилеп има добра почва фестивалот, има традиција и еве се одржува успешно 12 години, смета Јовановиќ.

По 12 години прилепскиот џез фестивал има извршено влијание и на публиката и на порезентацијата на музичари од земјава и од Регионот.

- „Прилеп џез фестивалот“ продолжува да го претставува најдоброто како од Македонија така и пошироко, од Регионот.Фестивалот е позициониран на мапата на Фестивали и има оставено веќе значајни траги. Сите изведувачи кои настапиле досега во овие години извршиле силно влијание и врз публиката и врз креирање на една фестивалска историја. Им се дава шанса, најмногу на македонски музичари, на млади музичари, се промовираат нивните проекти, експериментални. Секогаш се покануваат и гости од Регионот, рече Снежана Ристеска, советник за култура во Прилеп.

Фестивалот „Прилеп џез викенд“ е во организација на здружението за субкултура „ПП Џез фестивал“. Извор: Макпрес

На 24-ти август: Фестивал на староградска музика „Ех, таа серенада” во Битола

Антонио Димитриевски — Mon, 21 Aug 2023 12:36:51 +0000

На 24-ти август ќе се одржи првото издание на македонскиот фестивал на староградска музика „Ех, таа серенада” во Битола. Културниот и информативен центар во Битола е општинска установа од културата која повторно ја возобновува музичката традиција на серенадата, карактеристична за овој град. Фестивалот ќе се оддржи на платото на Офицерски дом – КИЦ Битола, кој што воедно и организатор на оваа манифестација. Во една фестивалска вечер ќе бидат изведени 16 авторски композиции, а ќе настапат исто толку познати изведувачи. За големиот интерес и квалитет на манифестацијата зборува и големиот број на пријавени автори (преку седумдесетина), од кои се селектирани најсоодветните за овој музички жанр. Со особено задоволство ги најавуваме музичките имиња како; Ламбе Алабаковски, Катерина Таневска, Перо Христов, Елене Георгиева, Драган Мијалковски, Сефедин Бајрамов, Мишко Крстевски, Димитар Андоновски, „Трио Џентлемен” и многу други.

Фестивалот „300 Работи, Триста“ од 10 до 12 август во Битола, филмови, книги, изложби…

Слаѓана Атанасова — Thu, 10 Aug 2023 10:20:13 +0000

Фестивалот “300 Работи, Триста“ е една од поистакнатите културни манифестации во Битола и регионот, која веќе привлекува бројни посетители и учесници. Досега, фестивалот ја имаше честа да прими повеќе од 180 уметници од различни делови на светот, меѓу кои и Србија, Албанија, Франција, Италија, Грција, Шпанија, Чешка, Словачка, Естонија, Финска, Индија, Р. Кина, САД, Канада и други. Оваа богата и разновидна лепеза на уметници ја чини оваа манифестација една значајна културна одредница која го збогатува културното битисување на Битола. Официјалното отварање на фестивалот ќе биде на 10 август во 20 часот со битолската премиера на филмот „Некрстени денови“ (Ballad of Piargy, 2022), дело на нашиот познат и признат режисер Иво Трајков, во киното Манаки. На 11 август во Офицерскиот дом со почеток од 20:00 часот ќе биде промовирана Книгата – „Прирачник за сценаристот: Водич на писателот за сценарио за документарни и играни филмови“ на Игор Трајковски Фоја, рецензенти Иво Трајкв, Томаш Петрањ, Антонио Митриќески, и Сашо Кокаланов. Промотер на книгата е нашиот познат глумец Марјан Георгиевски. Покрај промоцијата на оваа дело, ќе биде отворена и изложбата на уметнички дела со наслов: ЛИМИНАЛ, од младата и преспективна авторка, Јана Танчевска. Овој настан музички ќе биде збогатен со музички изведби на Николче Петкоски. Затварањето на фестивалот ќе биде на 12 август со проекција на краткометражниот игран филм „Синиот час” по сценарио и во режија на Ана Јакимска во 20 часот, во просторот пред Радост. Покрај филмот ќе биде промовирана и книгата – „Колегиумски записник 010“, збирка на литературни дела, фотографии, дизајни и цртежи. Овој зборник е продолжение на низата „Колегиумски записници и тоа: 1, 2, 3, 4, 5, 6, 7, 8 и 9. Во просторот ќе има изложба на фотографии, ликовни дела, секако со посебен акцент на младата публика и дебитанските автори. Целиот настан ќе биде музички пропратен со настап во живо на Box Beater. Извор: Република

Филмот „М“ го отвора 22. издание на меѓународниот фестивал на европски филм „Синедејс“ во паркот МКЦ

Антонио Димитриевски — Mon, 10 Jul 2023 12:44:41 +0000

Дистописката приказна за осумгодишниот Марко, на македонскиот режисер Вардан Тозија, филмот „М“ го отвора 22. издание на Меѓународниот фестивал на европски филм „Синедејс“ на 13 јули, во паркот зад Младинскиот културен центар (МКЦ) во 21 часот. Годинашното издание на Фестивалот на европски филм ќе трае само шест, наместо вообичаените десет дена и ќе понуди повеќе од 40 филмски наслови. Под слоганот „Муви најт“, проекциите ќе се одржуваат во паркот зад МКЦ, киното „Фросина“и џебното кино во во МКЦ и летното кино на отворено во „Кинотека“.

„Две децении „Синедејс“ го гради угледот на квалитетен меѓународен филмски фестивал, единствен домашен фестивал акредитиран од ФИАПФ, но годинава со исклучително намален буџет. Решивме Фестивалот да трае шест дена, односно онолку колку што ни дозволи чергата, ќе имаме премиерни на македонски филмови, потоа ремек-дело со филмска програма, која директно ја увезуваме од Кан, како први од сите фестивали во Европа“ изјави на денешната прес-конференција Маргарита Арсова, програмски координатор на „Синедејс“.

И годинава натпреварувачката програма на „Синедејс“ е селекција на Бернд Будер. Во фестивалската програма ќе видиме светски и македонски филмови и копродукции што „гравитираат“ во Официјална селекција, Гала програма, SEE програма, МК Shorts (кратки филмови) и Ретроспектива на филмови посветена на Дејвид Боуви како актер. Асова најави дека на годиншаното издание ќе има наслови на Вим Вендерс, Кен Лоуч, Нани Морети, Аки Каурисмаки, Франсоа Озон, Александар Сокуров, новиот филм на Горан Столевски, а има и пет премиери на македонски кратки филмови.

Поради буџетските рестрикции програмата е тесно селектирана на сметка на квантитетот за да извадиме што подобар квалитет, истакна Арсова.

Организаторот го најави мастеркласот на нашиот Митко Панов и прикажување на филмот „Сведок“, а овогодишната програма на „Синедејс“ предвидува и дополнителни два мастеркласа, на Јуре Матичич, програмски раководител на „Местни кино Домжале“ Словенија и гуруто за презентација и ‘пакување на филмови Габриеле Бруненмајер, која работи како независен консултант за Мидпоинт институтот. Отворањето и затворањето на „Синедејс“ е во знак на македонските режисерски имиња.

Филмот „М“ е дистописка приказна за осумгодишниот Марко, дете кое е затворено во границите, во заштитата на својата магична шума. Низ годините живее, незнаејќи што се случува со светот надвор. Чувано е и скриено од посесивен, строг, опседнат татко, кој секако, знаејќи дека тој е сѐ што му останало, се труди да го сочува од сознанието за тој свет. Сѐ додека еден ден љубопитноста не го натера тоа дете да излезе од границите на шумата, да истражи, да види што има зад тој забранет свет. Наоѓа едно другарче и почнува да истражува. Тоа истражување води кон одреден след на настани кои ќе го доведат во една голема авантура, вели режисерот Тозија за „М“. Филмот е сниман пред три години, но поради бројните предизвици, дури сега се случува неговата премиера. Сценариото е потпишано од Тозија и Даријан Пејовски, кинематографер е Влатко Самоиловски, сценографијата е на Кирил Спасески-Кикич, костимите се на Андреа Кустовиќ и Николина Костаншек. Улогите ги толкуваат Матеј Сиваков, Александар Ничовски, Сашко Коцев, Тони Михајловски, Камка Тоциновска, Бојана Грегориќ Вејзовиќ, Оливер Митковски, Владимир Тулиев… Продуцент на „М“ е „Фокус покус филмс“ од Скопје во копродукција меѓу Хрватска, Косово, Луксембург и Франција. Сашко Коцев, кој го толкува ликот на таткото на Марко во филмот, рече дека филмот ќе го памети по тешкиот и исцрпен кастинг кој траел доста долго, но и по неверојатната желба да ја добие улогата.
Кога го прочитав сценариото, во главата си зацртав дека мора да ја добијам улогата, кога ме поканија на кастинг. Онаа среќа, кога ќе ти јават дека си ја добил улогата, тоа не може никој да го опише со зборови. Но, не се израдував до крај, бидејќи во исто време ми потврдија уште два филма. Во истиот месец август, снимав три филма, тоа беше една актерска шизофренија. Но, овде бев многу опуштен зашто бев во една здрава режсерка рака и мислам дека овој филм ќе ја крене малку летвичката погоре во однос на тоа што понатаму ќе се случува. Ова е филм од 2 милиони евра снимен со 270 илјади евра. Како? Само Дарко Попов, Вардан Тозија и Влатко Самоилковски си го знаат тоа, а бога ми и ние. Беше напорно, тешко снимање. Тоа лето ќе го паметам по работа со деца. Во исто време се снимаше филмска серија за деца, овде бев татко на некое дете, па претходно снимав филм каде што играв татко, и си помислив, дали остарев што играм само татковци? Многу е тешко да не се спуштиш на тоа негово ниво да бидеш помеѓу, дали актерски или ментално, да не повредиш, навредиш, тоа се чисти, детски души. По тоа ќе го паметам филмот, дека таа работа беше тешка, но не значи неуспешна, рече Коцев.
Затворањето на Фестивалот е повторно со македонска премиера, филмот „Бизнисот на задоволството“ на Гоце Цветановски. Mузичката програма на фестивалот „Синемјузик“ годинава го најавува концертот на скопскиот бенд Културно-уметнички работници, кој неодамна го издаде својот седми албум, потоа Педро Кастиљо и белградскиот експериментален бенд Визељ. Фото: МКЦ

Деветто издание на „Скопје синема сити“ викендов во кинотека

Слаѓана Атанасова — Thu, 15 Jun 2023 11:03:11 +0000

Под мотото „Приказните зад музиката“ во Кинотеката на Македонија, на 17 и 18 месецов ќе биде одржано деветтото издание на „Скопје синема сити“, фестивал посветен на музички документарни филмови. Фестивалот годинава во својата програма вклучува изложба и три документарни филмови посветени на творештвото на едни од највлијателни фигури во историјата на музиката, Леонард Коен и Френк Запа како и за нашата антологиска музичка група „Леб и сол“.

Фестивалот ќе биде отворен со групна изложба на музички фотографии насловена „5х10“. Станува збор за избор од по пет фотографии на пет истакнати македонски фотографи кој посветено повеќе од две децении фотографирале на концерти и музички фестивали. Публиката ќе има можност да види фотографии на Маја Аргакијева, Огнен Ацевски, Роберт Атанасовски, Зденко Петровски и Стефан Рајхл.

Како што е најавено, по изложбата следува проекцијата на види „Алелуја: Леонард Коен, патешествие, песната“ (2002) , филм создаден за песната на Леонард Коен која од отфрлен албум во 80-тите, по чудни околности, ќе стане една од најизведуваните песни на сите времиња. Ова е приказната за животот на песната „Hallelujah“ и сите музичари кои ја изведувале, од Коен до Џеф Бакли.

Следниот ден, во недела, 18 јуни, ќе следат филмот за „Леб и сол“ насловен како „Вкусот на успехот“ и филмот за Френк Запа, „Изеди го прашањето: Запа со свои зборови“.

Фестивалот кој традиционално доделува Награда за животно дело за успеси на полето на филмот и музиката, годинава ќе му ја додели на Џијан Емин, за неговите достигнувања во светот на филмската музика. Претходни лауреати во изминатите години, меѓу останатите, беа Руичи Сакамото, New Order, Ник Кејв.

Визуелното решение за деветтото издание е дело на Даница Орцева, студент на Brainster.

Фестивалот „Скопје Синема Сити“ е во организација на здружението Номад-Арт Скопје и е помогнато од Општина Карпош, од Министерството за култура и од Кинотека. Извор: Мак Пресс