На изборот за најдобрите европски дестинации за 2021 година, во организација на „European Best Destinations“, победил градот Брага кој што се наоѓа во Португалија. Брага има што да им понуди на туристите, а од неодамна за странците е најдобра европска дестинација за оваа година. Трет по големина во Португалија, сместен во северозападниот дел од земјата, истовремено е еден од најстарите и најсовремени градови во оваа европска земја. Се наоѓа на надморска висина од 180 метри. Туристите го издвојуваат Брага како задолжителна дестинација за сладокусците, но и љубителите на шопинг. Овој град исто така е задолжителна дестинација за оние кои што сакаат да посетуваат цркви и манастири. Неверојатно романтичен, Брага е еден од градовите во Европа чии жители квалитетот на живот го оцениле со највисока оцена. Не мора да се грижите ниту за коронавирусот затоа што организациите за економска соработка и развој ја препознале Брага по брзиот и иновативен одговор на властите да ја запрат епидемијата и да ги заштитат најзагрозените. Исто така, Брага е прогласена и за најдобра дестинација за инвестиции во Европа. Динамична, културна, гастрономска, историска - Брага е дестинација која што може да се посети во било кој дел од годината. Овој град „живее“ 365 дена годишно, безбеден е и нуди широка лепеза на можности за квалитетен и незаборавен одмор.