„Ѕуница“ – инклузивна театарска претстава во МКЦ

Антонио Димитриевски — Tue, 21 Nov 2023 13:19:20 +0000

На 23.11.2023 година, во МКЦ во 19 часот, ќе може да ја погледенете инклузивната театарска претстава „Ѕуница“. Децата од дневниот центар и нивните другарчиња, инспирирани од сликовницата „Ѕуница“, по втор пат спремија инклузивна претстава за вас. Режија: Роберт Ристов Сценографија: Сара Синани Драматург: Дарко Спасов Илустрација и графички дизајн: Иванка НиБа Фотографија и графички дизајн: Владанка Колева Преведувач на знаковен јазик: Соња Кимова Делевска Продукција на звук: Студио Абра-Кадабра Продуцент на звук: Христијан Аризанкоски Автор на музика: Драган Илиев Актери: Калина Груиќ, Арабела Тудиќ, Магдалена Стојкоска, Ангела Делевска, Калина Чанговска, Анамарија Здравеска Актери Доза Среќа: Никола, Христијан, Дарко, Коста, Денис, Рабије, Ава, Кан, Кристијан, Орхан, Ариел, Софи… Работено според сликовницата Ѕуница од Бранислав Николов и Иванка НиБа во издание на издавачка куќа „Светулка“ Пријатели: Град Скопје, МКЦ, издавачка куќа Светулка, … Во оваа приказна во авантура ве носат Бојана, Мендо, Зајче и Птичка кои сложно ќе одиграат една братска слога. Авторот беспрекорно отсликува четири профили на ликови кои се различни, но секој вреден на свој начин. Така е и со децата. За една група или заедница да остане сложна потребен ни е некој мудар како Бојана, силен како Мендо кој ќе нѐ износи на рамена, досетлив како Зајче и гласен како Птичка. Она што човек не може да го направи сам, во слога со пријателите ќе успее, па заедно со нив ќе може да помести дури и планина.“ Ѕуница за прв пат беше промовирана на Саемот на книга 2023 година, учествуваше со промоција и работилница на фестивалот „Млади европски приказни, млади креативци“, учествуваше на фестивалот „Литера“, Промоција во Гевгелија, Битола и во Охрид. Децата од сите градови веќе си имаат своја омилена строфа и илустрација, па направија ремек дела на работилниците кои беа организирани во склоп на пронмоциите. Сликовницата е достапна во најголеите книжарници кај нас но и онлајн на фб страната на Едиција Светулка. Влезот е со симболична цена од 100 денари.

„Ѕуница“ фестивал во Миравци

Антонио Димитриевски — Wed, 18 Aug 2021 12:25:16 +0000

Доколку овој викенд ве нанасе патот кон југот на Македонија не пропуштајте ја можноста да бидете дел од првото издание на музичкиот фестивал “Ѕуница фестивал”, кој на 21-ви и 22-ри август (сабота и недела) за прв пат ќе се одржи во прекрасните предели на “Белиот рај”, крај питомото Миравци. На овој автентичен летен фестивал, прв од ваков тип, уметници од различни возрасти ќе творат во природа слушајќи музика од различни музички правци, и тоа во различен временски интервал. Како што вели организаторот на овој музички фестивал, миравчанката Моника Јовановска дипломирана новинарка и организатор на повеќе музички настани во земјава и странство, овој фестивал ќе биде насочен кон промовирање на современата уметност и афирмација на електронската музика. Оваа млада девојка зад себе има доста признанија за нејзината работа како новинарка, но и како организатор на поголеми музички настани меѓукои ќе ги споменеме промо забавите за познати европски транс фестивали, серијалот забави со старата скопска чаршија… Таа во последниот период живее во Малта каде организира концерти и изложби во соработка со најстариот малтешки културен центар. Таа за нејзиниот најнов проект “Ѕуница фестивал” вели: „Пред се ви благодарам на интересот за првото издание на “Ѕуница фестивал“. Јас организирам музички настани веќе 5 години во Македонија и Малта (каде што живеам), па ете се решив да направам и фестивал на модерна музика и уметност во мото родно место Миравци, кој планирам да се одржува секоја година. Идејата за овој проект израсна од идејата за уникатен фестивал, кој ќе и понуди на публиката алтернатива за задоволување на потребата за автентичен летен фестивал во прекрасниот јужен предел на Миравци, и ќе ја потврди и оправда иницијативата на најдобар можен начин. Ова ќе биде фестивал на кој благодарение на многубројните фанови и најдобрите артисти од локалната, регионалната и светската музичка и уметничка сцена, секоја година ќе се собираат во одличната атмосфера на „Белиот рај“, ќе создаваат цртежи, слушајќи музика и ќе се исполнат и себе и присутните млади со позитивна енергија. На нашите простори се нема одржано фестивал од ваков тип до сега , каде што уметници од различни возрасти ќе можат да творат во природа, слушајќи музика, и сета таа музичка вибрација ќе ја пренесуваат на своите платна и цртежи. На крајот од фестивалското дружење планирано е да се разгледуваат уметничките дела и на панел дискусија ќе се разговара за тоа како различните музички правци делуваат врз креативниот процес кај уметниците, и која е конекцијата помеѓу музиката и уметноста. Целта е да се поттикне креативниот дух кај граѓаните, да се спојат креативците од различни области, да се информира и едуцира младината за значењето и важноста на меѓусебната соработка, како и унапредување на комуникациските вештини преку учење на нови и интересни алатки”, вели организаторот на “Ѕуница фестивал“, Моника Јовановска. „Бел Рај” Миравци е локацијата каде што ќе се случува првото издание на „Ѕуница Фестивал“, и целиот простор ќе биде декориран со рачно изработен декор од страна на Борис Петровски и неговиот деко тим Afadrenalin. На првиот фестивал ќе творат уметници, а ќе има музички настапи на: Роботек, Томи Бојаџи, Иван Пеев, Меланге, Nemanja Dinic Dinke, Андреја Салпе, Defect 13th, Galactic Explorers, Kox, Morning Delusions, Bad Juju, додека музичките миксови за дневната програма на која впрочем ќе цртаат уметниците се од: Горан Кан, In Spirit, Abdy, Мирко Попов и Ален Хаџи-Стефанов. Во реализација на овој фестивал помагатели се Општините Гевгелија, Валандово и Дојран. Влезница нема да се наплаќа, а се што треба да направат посетителите е да донесат со себе само позитивна енергија и добро расположение за слушање одлична музика. Извор: ТВ Нова – Гевгелија

ѕуница – Вистина.мк

„Ѕуница“ – инклузивна театарска претстава во МКЦ

„Ѕуница“ фестивал во Миравци