12. издание на „Десонанз“ ќе се одржи виртуелно

Антонио Димитриевски — Thu, 28 Oct 2021 12:31:23 +0000

Во октомври се навршуваат 13 години од постоењето на Десонанз Фестивал – еден од најпроминентните културни настани во Македонија. Заради пандемиските услови, фестивалот не се одржа минатата 2020 година. Овогодинешното 12-то по ред издание на Десонанз ќе се одржи виртуелно, согласно безбедносните мерки. Онлајн програмата ќе биде распоредена во два фестивалски денови, а фокусот ќе биде насочен кон локалната современа електронска музика, соопшти организаторот. Преку јутјуб каналот на Десонанз Фестивал, на 29.10 и 30.10 премиерно ќе бидат емитувани авторските настапи на: Марко Рикалоски, Филип Митров и Tears In Rain. Десонанз Фестивал е организиран благодарение на финансиската поддршка на Delegation of the European Union Skopje и Europe House Skopje. Институционален партнер на фестивалот е Кинотеката.

Десетто издание на Десонанз фестивалот

Слободанка Илиева — Wed, 31 Oct 2018 13:26:11 +0000

Десонанз Фестивалот за електронска музика, визуелни уметности и нови медиуми оваа година го прославува своето јубилејно, десетто издание. Десетто издание е во организација и партнерство со Гете-институт Скопје и ,,3.14 Броколи,, и е сублимат на сите претходни години во однос на фокусот и презентирање на современата електронска музика и уметност. Фестивалот ќе почне денеска, а ќе трае до 3 ноември и ќе се одржи на повеќе локации во Скопје. Предвидена е работилница за Pure Data софтвер, презентација на првиот custom made грамафон направен во Македонија, мултимедијални видео инсталации – ,,10 години Десонанц Фестивал,, и ,,Полимат,, (видео-омаж посветен на делото и работата на Johan Wolfgang von Goethe), како и настапи на реномирани музички артисти. Квалитет и Контекст. Современата музика ја достигна сингуларноста, точка во која сите жанрови, сите инструменти и сите звуци сочинуваат една Музика. Кога аналогното станува дигитално, електронското станува акустично, кога панкот е диско, класичната музика е метал и тишината е инструмент, единствените два критериуми кои се битни за музиката се Квалитет и Контекст. Водејќи се по овие два принципи, програмата на Desonanz Festival 2018 е богатство од врвна музика од широк спектар на жанрови, внимателно селектирана и ставена во контекст кој го вади најдоброто од уметноста во просториите на Македонската филхармонија, Музеј на Град Скопје, Отворено Графично студио и клубот Епицентар, нагласуваат неговите организатори. Гала концертот и свеченото отворање се вечерва во Македонска филхармонија. Две имиња на современата музика чии звуци и видео-колажи долги години се извор на восхит и инспирација за генерации на електронски музичари, амбиенталисти, класични композитори и видео уметници. Fennesz е композитор, гитарист и еден од великаните на модерната класична музика, чест соработник на Дејвид Силвијан, Рјуичи Сакамото, Џим О’Рурк и секако проектот Fennesz+Lillevan, еден од најимпресивните мултимедијални проекти на денешницата и често дел од програмата на престижните светски фестивали од рангот на Transmediale, Unsound, Ars Electronica и сл. Lillevan е германски ликовен и видео уметник, пионер на модерната видео-уметност и нејзината соодветна примена во музички контекст. Неговиот мек и органски стил на видео продукција со бројни аналогни артефакти е уникатен и нашироко препознатлив и имитиран во светот на денешната електронска музика. Инициран и организиран во 2009 година од Гете-институт-Скопје, Десонанз станува синомим за презентирање на најновите музички достигнувања во електронската музика, cutting edge мултимедијални настани, визуелни уметности, нови медиуми. Идејата е фестивалот да придонесе за развој и презентација на артисти од локалната сцена и поврзување со светски етаблирани артисти, пред се од германско потекло. Целта за оформување на повеќе локални мултимедијални колективи и платформи кои се под директно влијание на самиот фестивал е остварена и реализирана со оформување на мултимедијалниот колектив Биткреш (BTKRSH). Фестивалот во изминатите години нуди и образовен карактер преку музички работилници: Ableton, Field Recordings, употреба на домашни уреди за креирање на музика, како и видео-работилници: Quartz Composer, Resolume, 3D Video Mapping. извор:алфа.мк

десонанз – Вистина.мк

12. издание на „Десонанз“ ќе се одржи виртуелно

Десетто издание на Десонанз фестивалот