„Cut Your Nipple” го најавија деби албумот „Тhe Jungle Book” со синглот „What We Stand For” (ВИДЕО)

Антонио Димитриевски — Tue, 09 Mar 2021 12:38:05 +0000

Со промоцијата на првиот сингл „What We Stand For”, победниците на „Лузер Фест” 2019 – „Cut Your Nipple” го промовираат и својот тукушто издаден прв студиски албум под етикетата на Пасворд Продакшн. Насловен е „Тhe Jungle Book” и се состои од 11 песни, кои жанровски се движат од панк, алтернативен рок до фанк, преку што се отсликува разноликоста и талентот на бендот. Младиот демо бенд „Cut Your Nipple” е основан во 2018 година од страна на Марко Печеновиќ (бас и вокал), Павел Кузманоски (гитари) и Теодор Јаневски (тапани). Членовите на бендот се автори на музиката, а како продуцент се потпишува Дени Крстев од Студио 1060 – каде што изминатата година се снимаше албумот. Бендот вака го опишува својот прв албум: „The Jungle Book е приказна за нас и нашата џунгла во која сме израснати заедно со животните кои се обидуваат да ни ја одземат иднината и кариерата, додека истовремено ни даваат огромна креативност. Деновите ни поминуваат со единствената мисла како да се преживее, а како единствени свесни суштества за своето постоење, навистина е лесно. Книгата е напишана едноставно и со прости детали кои нè возат низ природната мелодија на агресивниот оптимизам, како кога си на дивата страна од џунглата и се чувствуваш беспомошно, но опремен со добри мисли кои никогаш не те напуштаат. Интеграцијата на љубовта, гневот, слободата и болеста нè доведува до статус кво, а ние се обидуваме некако да мрднеме оттаму: процесот е секогаш бескрајна луда забава, која преоѓа во сè поголем апсурд. Животните што смрдат, урлаат, те гризат и постојат во тој вакуум простор, во нечистите воздух и вода, во отпадот, се дел од таа журка на која се забавуваме во ова дело. Можеби не е најдобрата книга што ќе ја прочитате, но дефинитивно е најдобрата книга што ќе ја слушнете.” „Cut Your Nipple” настапија и на целодневната телевизиска културна програма на „Таксират” наречена ПИН ТВ, хибридна верзија на ПИН конференцијата која традиционално се одржува во Скопје секој ноември. Се претставија со уникатно видео, изработено ексклузивно за целите на програмата на ПИН ТВ, а оваа селекција од нивната музика за прв пат можеа да ја чујат илјадниците гледачи и музички професионалци од целиот свет. Албумот е веќе достапен на поголемите дигитални музички платформи како Spotify, Apple Music, Amazon Music, Deezer, Tidal, а може да се преслушува и на Youtube. Погледнете го видеото за првиот пилот сингл „What We Stand For” кој го најави излегувањето на дебитантското издание на бендот. https://www.youtube.com/watch?v=IAHhNcjGT1E

Cut Your Nipple – Вистина.мк

„Cut Your Nipple” го најавија деби албумот „Тhe Jungle Book” со синглот „What We Stand For” (ВИДЕО)